ഇന്ത്യയിലോ അമേരിക്കയിലോ ഉള്ള ശതകോടീശ്വരന്മാർക്ക് രാജ്യത്തിന്റെ നയം നിർണ്ണയിക്കാൻ അവകാശമില്ലെന്ന് കമൽ ഹാസൻ വ്യക്തമാക്കി. സ്റ്റാർലിങ്കിന്റെ വരവ് തടയുന്നത് ചില വ്യവസായികളാണെന്ന ഇലോൺ മസ്കിന്റെ ആരോപണത്തോട് പ്രതികരിക്കുകയായിരുന്നു അദ്ദേഹം.
ദില്ലി: ഇന്ത്യയിലോ അമേരിക്കയിലോ ഉള്ള ഒരു ശതകോടീശ്വരനും രാജ്യത്തിന്റെ നയം നിർണ്ണയിക്കാൻ അവകാശമില്ലെന്ന് നടനും രാജ്യസഭാ എംപിയുമായ കമൽ ഹാസൻ. ഇന്ത്യയിൽ സ്റ്റാർലിങ്കിന്റെ പ്രവർത്തനം ആരംഭിക്കുന്നത് ചില വ്യവസായ പ്രമുഖർ തടയുകയാണെന്ന ഇലോൺ മസ്കിന്റെ ആരോപണത്തോട് പ്രതികരിക്കുകയായിരുന്നു അദ്ദേഹം. "ഇന്ത്യ ഒരു ജനാധിപത്യ രാജ്യമാണ്, അല്ലാതെ കോളനിയല്ല. ഞങ്ങൾ ലോകത്തെ സ്വാഗതം ചെയ്യുന്നു, എന്നാൽ ഇന്ത്യക്കാരായ ഞങ്ങൾ തന്നെയായിരിക്കും ഞങ്ങളുടെ ഭാവി നിർണ്ണയിക്കുക," എന്നാണ് കമൽഹാസന്‍റെ പ്രതികരണം.
ഇന്റർനെറ്റ് സേവനങ്ങളുടെ ചെലവ് കുറയ്ക്കുന്നതോടൊപ്പം ദേശീയ സുരക്ഷ ഉറപ്പാക്കേണ്ടതിന്റെ ആവശ്യകതയും കമൽ ഹാസൻ ഊന്നിപ്പറഞ്ഞു. നെറ്റ്‌വർക്കുകളെയും സ്‌പെക്ട്രത്തെയും വെറുമൊരു വാണിജ്യ സ്വത്തായി കാണാതെ തന്ത്രപ്രധാനമായ അടിസ്ഥാന സൗകര്യങ്ങളായി വേണം കാണാൻ എന്നും ഇന്ത്യയുടെ സുരക്ഷാ മുൻകരുതലുകളിൽ യാതൊരു വിട്ടുവീഴ്ചയും പാടില്ലെന്നും അദ്ദേഹം വ്യക്തമാക്കി. തുറന്ന വിപണി ആവശ്യപ്പെടുന്ന പാശ്ചാത്യ രാജ്യങ്ങൾ, തങ്ങളുടെ വിപണികളെ സംരക്ഷിക്കുകയും വിദേശത്ത് മാത്രം സ്വതന്ത്ര മത്സരത്തെ പ്രോത്സാഹിപ്പിക്കുകയും ചെയ്യുന്ന ഇരട്ടത്താപ്പിനെയും അദ്ദേഹം ചോദ്യം ചെയ്തു. തങ്ങളുടെ ആഭ്യന്തര നിർമ്മാതാക്കളെ സംരക്ഷിക്കാൻ ഇന്ത്യ നടപടികൾ സ്വീകരിക്കുന്നത് പോലെ തന്നെയാണ് അമേരിക്ക ചൈനീസ് ഇലക്ട്രിക് വാഹനങ്ങൾക്ക് 100% തീരുവ ചുമത്തിയതെന്നും അദ്ദേഹം ചൂണ്ടിക്കാട്ടി.
കുത്തക നിലനിർത്തുന്നതിനായി ചില വൻകിട മുതലാളിമാർ തന്‍റെ സാറ്റലൈറ്റ് ഇന്റർനെറ്റ് കമ്പനിയെ തടയുകയാണെന്ന് മസ്ക് ആരോപിച്ചിരുന്നു. റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനിയാണോ ഇന്ത്യയുടെ യഥാർത്ഥ ബോസ് എന്നും മസ്ക് ചോദിച്ചു. ഇതിന് പ്രതിപക്ഷ നേതാവ് രാഹുൽ ഗാന്ധി നൽകിയ മറുപടി 'മറ്റൊരാൾ കൂടിയുണ്ട്' എന്നാണ്. മസ്കിന് ഇന്ത്യയിലേക്ക് സ്വാഗതം എന്നും രാഹുൽ ഗാന്ധി കുറിച്ചു. നന്ദി രാഹുൽ എന്നായിരുന്നു മസ്കിന്റെ പ്രതികരണം. രാഹുൽ ഗാന്ധി ആ മറ്റൊരാൾ ആരാണെന്ന് പേരെടുത്ത് പറഞ്ഞിട്ടില്ല. വ്യവസായി ഗൗതം അദാനിയെ ഉദ്ദേശിച്ചാണ് അദ്ദേഹത്തിന്‍റെ പരാമർശമെന്നാണ് സൂചന. അദാനിക്ക് മോദി സർക്കാരിൽ വൻ സ്വാധീനമുണ്ടെന്നും അനർഹമായ ആനുകൂല്യങ്ങൾ കൈപ്പറ്റുന്നുണ്ടെന്നും രാഹുൽ ഗാന്ധി പല തവണ ആരോപിച്ചിട്ടുണ്ട്. രാഹുലിന്‍റെ പ്രതികരണത്തിന് നന്ദി അറിയിച്ച മസ്ക്, 'ഇത് ശരിക്കും ആശങ്കാജനകമാണ്' എന്നും കൂട്ടിച്ചേർത്തു.
സ്റ്റാർലിങ്ക് എല്ലാ നിയമങ്ങളും മാനദണ്ഡങ്ങളും പാലിക്കുന്നുണ്ടെന്നും കഴിഞ്ഞ അഞ്ച് വർഷമായി ലൈസൻസിന് ശ്രമിക്കുകയാണെന്നും എന്നിട്ടും എന്തുകൊണ്ടാണ് ലൈസൻസ് ലഭിക്കാത്തതെന്നും ആണ് മസ്കിന്റെ ചോദ്യം. ലോകത്തെ 165 ലധികം രാജ്യങ്ങളിൽ നിലവിൽ സ്റ്റാർലിങ്ക് വിജയകരമായി പ്രവർത്തിക്കുന്നുണ്ടെന്നും മസ്ക് അവകാശപ്പെട്ടു. ഇന്ത്യയിലെ ഇന്റർനെറ്റ് വിപണിയിൽ കുത്തക പുലർത്തുന്ന പ്രാദേശിക ടെലികോം ഭീമന്മാരുടെ ഇടപെടലുകളാണ് സ്റ്റാർലിങ്കിന്റെ വരവ് വൈകിപ്പിക്കുന്നതെന്നാണ് മസ്കിന്റെ ആരോപണം.
