കോൺഗ്രസ് നേതാവ് സിദ്ധരാമയ്യ തന്റെ പാർട്ടി എംഎൽഎമാരെ ക്രോസ് വോട്ട് ചെയ്യാൻ പ്രേരിപ്പിച്ചെവന്ന് കുമാരസ്വാമി കുറ്റപ്പെടുത്തി.
ബെംഗളൂരു: കർണാടകയിൽ രാജ്യസഭ എംപി തെരഞ്ഞെടുപ്പിൽ കോൺഗ്രസ് സ്ഥാനാർഥിക്ക് വോട്ട് ചെയ്ത് ജെഡിഎസ് എംഎൽഎ. കെ ശ്രീനിവാസ ഗൗഡയാണ് കോൺഗ്രസ് സ്ഥാനാർഥിക്ക് വോട്ട് ചെയ്തത്. തെരഞ്ഞെടുപ്പിൽ ഞാൻ കോൺഗ്രസിനാണ് വോട്ട് ചെയ്തത്. കാരണം ഞാൻ കോൺഗ്രസിനെ സ്നേഹിക്കുന്നു- ഗൗഡ വോട്ടെടുപ്പിന് ശേഷം പറഞ്ഞു. അതേസമയം, എംഎൽഎ ക്രോസ് വോട്ട് ചെയ്തതിൽ കോൺഗ്രസിനെതിരെ ജെഡിഎസ് നേതാവ് എച്ച്ഡി കുമാരസ്വാമി രംഗത്തെത്തി.
കോൺഗ്രസ് നേതാവ് സിദ്ധരാമയ്യ തന്റെ പാർട്ടി എംഎൽഎമാരെ ക്രോസ് വോട്ട് ചെയ്യാൻ പ്രേരിപ്പിച്ചെവന്ന് കുമാരസ്വാമി കുറ്റപ്പെടുത്തി. കോൺഗ്രസ് നിയമസഭാ കക്ഷി നേതാവ് സിദ്ധരാമയ്യ ജെഡിഎസ് എംഎൽഎമാർക്ക് തുറന്ന കത്ത് എഴുതിയതിന് പിന്നാലെയാണ് കുമാരസ്വാമി രംഗത്തെത്തിയത്. ജെഡിഎസ് എംഎൽഎമാർക്ക് കത്തെഴുതിയിട്ടില്ലെന്ന് സിദ്ധരാമയ്യ പറഞ്ഞു. എന്നാൽ, തന്റെ സോഷ്യൽ മീഡിയ അക്കൗണ്ടിൽ നിന്ന് അദ്ദേഹം കത്ത് ട്വീറ്റ് ചെയ്യുകയും ചെയ്തു. ഇത് സിദ്ധരാമയ്യയുടെ ഇരട്ടത്താപ്പാണ് കാണിക്കുന്നതെന്നും കുമാരസ്വാമി പറഞ്ഞു.
