ബിഹാറിലെ സമസ്തിപൂർ-ബറൗണി റെയിൽ പാതയിൽ പുതിയ ഓട്ടോമാറ്റിക് സിഗ്നലിംഗ് സംവിധാനത്തിലെ പിഴവ് മൂലം 10 മിനിറ്റ് യാത്ര രണ്ടര മണിക്കൂറിലധികം വൈകി. സിഗ്നലുകൾക്കിടയിൽ ഒന്നിലധികം ട്രെയിനുകൾ കുടുങ്ങിയതോടെ, കതിഹാർ പാസഞ്ചർ ട്രെയിനിലെ യാത്രക്കാർ  പ്രതിഷേധിച്ചു.

പട്ന: ബിഹാറിൽ ട്രെയിൻ വൈകിയതിനെ തുടർന്ന് യാത്രക്കാരുടെ പ്രതിഷേധം. സമസ്തിപൂർ-ബറൗണി റെയിൽ സെക്ഷനിൽ പുതുതായി നടപ്പിലാക്കിയ ഓട്ടോമാറ്റിക് സിഗ്നലിംഗ് സംവിധാനത്തിൽ ഗുരുതരമായ പിഴവുകൾ സംഭവിച്ചതിനെ തുടർന്നാണ് വെറും 10 മിനിറ്റ് യാത്ര രണ്ടര മണിക്കൂറിലേറെ വൈകിയത്. വ്യാഴാഴ്ച, കതിഹാറിലേക്ക് പോകുന്ന പാസഞ്ചർ ട്രെയിൻ വെറും ഒമ്പത് കിലോമീറ്റർ ദൂരം സഞ്ചരിക്കാൻ ഏകദേശം രണ്ടര മണിക്കൂർ എടുത്തുവെന്ന് യാത്രക്കാർ പറഞ്ഞു. സമസ്തിപൂർ-കതിഹാർ പാസഞ്ചർ ട്രെയിൻ (63308) ഉച്ചയ്ക്ക് 12:55 ന് സമസ്തിപൂരിൽ നിന്ന് പുറപ്പെട്ട് 1:05 ന് ഉജിയാർപൂരിൽ എത്തേണ്ടതായിരുന്നു. പകരം, ചെറിയ പാതയ്ക്കുള്ളിലെ ആറ് ഓട്ടോമാറ്റിക് സിഗ്നലുകളിൽ ആവർത്തിച്ച് നിർത്തേണ്ടി വന്നതിനെത്തുടർന്ന് ട്രെയിൻ ഇഴഞ്ഞു നീങ്ങി 3:38 ന് മാത്രമാണ് സ്റ്റേഷനിൽ എത്തിയത്.പിന്നാലെ, യാത്രക്കാർ ട്രെയിനിൽ നിന്ന് ഇറങ്ങി പ്രതിഷേധിച്ചു.

കാര്യക്ഷമതയും സുരക്ഷയും മെച്ചപ്പെടുത്തുന്നതിനായി അവതരിപ്പിച്ച ഓട്ടോമാറ്റിക് സിഗ്നലിംഗ് സംവിധാനം, യാത്രക്കാർക്ക് ഉപദ്രവമായെന്നാണ് ആരോപണം. രിയായ ഏകോപനമില്ലാതെ ട്രെയിനുകൾ ഒന്നിനുപുറകെ ഒന്നായി നിർത്തുന്നതിനാൽ, യാത്രക്കാർക്ക് വ്യക്തമായ വിവരങ്ങൾ നൽകാതെ ഒന്നിലധികം ട്രെയിനുകൾ സിഗ്നലുകൾക്കിടയിൽ കുടുങ്ങിക്കിടക്കേണ്ട അവസ്ഥയാണ്. കോപാകുലരായ യാത്രക്കാർ പുറത്തെ സിഗ്നലിൽ പ്രതിഷേധിക്കുകയും ലോക്കോ പൈലറ്റിനെ ആക്രമിക്കാൻ ശ്രമിക്കുകയും ചെയ്തു. കൺട്രോൾ റൂമുകളിൽ ലോക്കോ പൈലറ്റ് വിവരം അറിയിച്ചെങ്കിലും മുന്നിലുള്ള പാത തിരക്കേറിയതാണെന്നും ഉജിയാർപൂർ സ്റ്റേഷൻ വ്യക്തമല്ലെന്നും അറിയിച്ചു. ന്യൂഡൽഹി-ബറൗണി സ്പെഷ്യൽ ട്രെയിനിലും (02564) സമാനമായ ഒരു സാഹചര്യം ഉണ്ടായി. വ്യാഴാഴ്ച മാത്രം, മൂന്ന് ചരക്ക് ട്രെയിനുകൾ, കതിഹാർ പാസഞ്ചർ, ന്യൂഡൽഹി-ബറൗണി ക്ലോൺ എക്സ്പ്രസ്, ഗരീബ് രഥ് എക്സ്പ്രസ് എന്നിവയുൾപ്പെടെ ആറ് ട്രെയിനുകൾ ഒരേ പാതയിൽ കുടുങ്ങി.

സോൻപൂർ റെയിൽവേ ഡിവിഷന്റെ പരിധിയിൽ വരുന്ന പ്രശ്നമാണിതെന്നും തിരുത്തൽ നടപടികൾക്കായി വിഷയം ഏറ്റെടുത്തിട്ടുണ്ടെന്നും സമസ്തിപൂർ ഡിവിഷണൽ റെയിൽവേ മാനേജർ (ഡിആർഎം) ജ്യോതി പ്രകാശ് മിശ്ര പറഞ്ഞു. അപ്‌ലൈനിലെ പ്രശ്നങ്ങൾ പരിഹരിച്ചതായി ഡിആർഎം അവകാശപ്പെട്ടെങ്കിലും, യാത്രക്കാർ പറയുന്നത് അടിസ്ഥാന യാഥാർത്ഥ്യങ്ങളിൽ മാറ്റമൊന്നുമില്ലെന്നും കാലതാമസം ദൈനംദിന യാത്രയെ തടസ്സപ്പെടുത്തുന്നത് തുടരുകയാണെന്നും.