സുപ്രീം കോടതിയിലെ ഒഴിവുള്ള ജഡ്ജി തസ്തികകളിലേക്ക് മൂന്ന് ഹൈക്കോടതി ചീഫ് ജസ്റ്റിസുമാരെ നിയമിക്കാൻ കൊളീജിയം ശുപാർശ ചെയ്തു. വരാനിരിക്കുന്ന വിരമിക്കലുകളും ഒഴിവുകളും കണക്കിലെടുത്താണ് പുതിയ നിയമനത്തിനായി കേന്ദ്ര സർക്കാരിനോട് ആവശ്യപ്പെട്ടിരിക്കുന്നത്. രാഷ്ട്രപതിയുടെ അനുമതി ലഭിക്കുന്നതോടെ ഇവർ സത്യപ്രതിജ്ഞ ചെയ്യും.
ദില്ലി: സുപ്രീം കോടതിയിലെ ഒഴിവുള്ള ജഡ്ജി തസ്തികകളിലേക്ക് മൂന്ന് ഹൈക്കോടതി ചീഫ് ജസ്റ്റിസുമാരെ നിയമിക്കാൻ സുപ്രീം കോടതി കൊളീജിയം കേന്ദ്ര സർക്കാരിനോട് ശുപാർശ ചെയ്തു. ചീഫ് ജസ്റ്റിസ് സൂര്യകാന്ത് അധ്യക്ഷനായ കൊളീജിയം യോഗത്തിലാണ് തീരുമാനമുണ്ടായത്. ഗുജറാത്ത് ഹൈക്കോടതി ചീഫ് ജസ്റ്റിസ് സുനിത അഗർവാൾ, ദില്ലി ഹൈക്കോടതി ചീഫ് ജസ്റ്റിസ് ദേവേന്ദ്ര കുമാർ ഉപാധ്യായ, തെലങ്കാന ഹൈക്കോടതി ചീഫ് ജസ്റ്റിസ് അപരേശ് കുമാർ സിംഗ് എന്നിവരെയാണ് രാജ്യത്തെ പരമോന്നത നീതിപീഠത്തിലെ ജഡ്ജിമാരായി കൊളീജിയം ശുപാർശ ചെയ്തത്.
സുപ്രീം കോടതിയിലെ നിലവിലെ ഒഴിവുകൾ പരിഗണിച്ചാണ് ഈ പേരുകൾ കേന്ദ്ര നിയമ മന്ത്രാലയത്തിന് കൈമാറിയത്. നിലവിൽ ചീഫ് ജസ്റ്റിസ് ഉൾപ്പെടെ 34 ജഡ്ജിമാരാണ് സുപ്രീം കോടതിയിലുള്ളത്. അനുവദനീയമായ ആകെ ജഡ്ജിമാരുടെ എണ്ണം 34 ആണ്. എന്നാൽ അടുത്ത വിരമിക്കലുകളും ഒഴിവുകളും കണക്കിലെടുത്താണ് കൊളീജിയത്തിന്റെ പുതിയ ശുപാർശ. കേന്ദ്ര സർക്കാരിന്റെ അംഗീകാരവും രാഷ്ട്രപതിയുടെ അനുമതിയും ലഭിക്കുന്നതോടെ ഇവർ സുപ്രീം കോടതി ജഡ്ജിമാരായി സത്യപ്രതിജ്ഞ ചെയ്യും.
