ആദ്യം പ്രതീക്ഷ, പിന്നെ കൈവിട്ടെന്ന് കരുതി, വീണ്ടും തിരികെ, പിന്നെ വിയര്‍ത്തു; ഒടുവിൽ ബിജെപി സ്ഥാനാര്‍ത്ഥിയെ വീഴ്ത്തിയത് മികച്ച ഭൂരിപക്ഷത്തിൽ

മഹാസഖ്യത്തിൻ്റെ മുഖ്യമന്ത്രി സ്ഥാനാർത്ഥിയായ തേജസ്വി യാദവ് രാഘോപൂർ നിയമസഭാ സീറ്റിൽ ബിജെപിയുടെ സതീഷ് കുമാറിനെ പരാജയപ്പെടുത്തി. മികച്ച ഭൂരിപക്ഷം ലഭിച്ചെങ്കിലും, വോട്ടെണ്ണൽ ദിനം ആർജെഡി നേതാവിനെ സംബന്ധിച്ച് കടുത്ത പരീക്ഷണം 

tejashwi yadav

Image Credit: stockPhoto

പട്ന: രാഷ്ട്രീയ ജനതാദൾ നേതാവും മഹാസഖ്യത്തിൻ്റെ മുഖ്യമന്ത്രി സ്ഥാനാർത്ഥിയുമായ തേജസ്വി യാദവ് രാഘോപൂർ നിയമസഭാ സീറ്റിൽ വിജയിച്ചു. ബി ജെ പിയുടെ സതീഷ് കുമാറിനെതിരെ 14,532 വോട്ടുകളുടെ ഭൂരിപക്ഷത്തിലാണ് തേജസ്വി വിജയം ഉറപ്പിച്ചത്. മികച്ച ഭൂരിപക്ഷം ലഭിച്ചെങ്കിലും, വോട്ടെണ്ണൽ ദിനം ആർജെഡി നേതാവിനെ സംബന്ധിച്ച് കടുത്ത പരീക്ഷണം തന്നെയായിരുന്നു.

രാഘോപൂർ മണ്ഡലത്തിൽ ബിജെപി സ്ഥാനാർത്ഥി സതീഷ് കുമാർ തേജസ്വിക്ക് ശക്തമായ വെല്ലുവിളിയാണ് ഉയർത്തിയത്. വോട്ടെണ്ണൽ തുടങ്ങിയപ്പോൾ മുതൽ ഇഞ്ചോടിഞ്ച് പോരാട്ടമാണ് നടന്നത്. വോട്ടെണ്ണൽ തുടങ്ങി 20 മിനിറ്റിനുള്ളിൽ തേജസ്വി യാദവ് 893 വോട്ടുകൾക്ക് മുന്നിലായിരുന്നു. എന്നാൽ, രാവിലെ 11 മണിയോടെ ബി.ജെ.പി.യുടെ സതീഷ് കുമാർ 1,273 വോട്ടുകൾക്ക് മുന്നിലെത്തി.

തുടർന്ന്, തേജസ്വിക്ക് 219 വോട്ടുകളുടെ നേരിയ ലീഡ് വീണ്ടും ലഭിച്ചെങ്കിലും അടുത്ത റൗണ്ടുകളിൽ വീണ്ടും പിന്നോട്ട് പോയി. ഉച്ചയോടെ തിരഞ്ഞെടുപ്പ് കമ്മീഷൻ്റെ കണക്കുകൾ പ്രകാരം തേജസ്വി, സതീഷ് കുമാറിനേക്കാൾ 2,288 വോട്ടുകൾക്ക് പിന്നിലായിരുന്നു. ഒരു ഘട്ടത്തിൽ 4,000, 7,000, പിന്നീട് 9,000-ത്തിലധികം വോട്ടുകൾക്ക് വരെ തേജസ്വി പിന്നിലായി. എന്നാൽ, തേജസ്വി നാടകീയമായ തിരിച്ചുവരവാണ് നടത്തിയത്.

വൈകുന്നേരം 4:30 ആയപ്പോഴേക്കും തേജസ്വി മുന്നേറ്റം തിരിച്ചുപിടിക്കുകയും സതീഷ് കുമാറിനേക്കാൾ 11,000-ൽ അധികം വോട്ടുകൾക്ക് മുന്നിലെത്തുകയും ചെയ്തു. ഈ ആക്കം നിലനിർത്തി 31 റൗണ്ട് വോട്ടെണ്ണലുകൾ പൂർത്തിയായപ്പോൾ, 14,532 വോട്ടുകളുടെ ഭൂരിപക്ഷത്തിൽ തേജസ്വി യാദവ് വിജയിച്ചു. തേജസ്വി ആകെ 1,18,597 വോട്ടുകൾ നേടി.

ലാലു കുടുംബത്തിൻ്റെ കോട്ടയായ രാഘോപൂർ

സിറ്റിംഗ് എംഎൽഎയും ബിഹാർ നിയമസഭയിലെ പ്രതിപക്ഷ നേതാവുമാണ് തേജസ്വി യാദവ്. 2015, 2020 വർഷങ്ങളിൽ സതീഷ് കുമാറിനെ പരാജയപ്പെടുത്തി രാഘോപൂർ സീറ്റ് നേടിയ തേജസ്വിക്ക് ഇത് സ്വന്തം ശക്തികേന്ദ്രമാണ്. ലാലു പ്രസാദ് യാദവ് (1995, 2000), അദ്ദേഹത്തിൻ്റെ ഭാര്യ റാബ്രി ദേവി (2000 ഉപതിരഞ്ഞെടുപ്പ് ഉൾപ്പെടെ മൂന്ന് തവണ) എന്നിവർ വിജയിച്ച ഈ മണ്ഡലം ലാലു കുടുംബത്തിൻ്റെ കോട്ടയാണ്. എന്നാൽ, 2010-ൽ റാബ്രി ദേവിയെ പരാജയപ്പെടുത്തി സതീഷ് കുമാർ ഈ കോട്ടയുടെ സ്വാധീനത്തെ ചോദ്യം ചെയ്തിട്ടുണ്ട്.