വിശുദ്ധ ഹജ്ജ് തീർത്ഥാടനത്തോടനുബന്ധിച്ച് ഇറാന്റെ പരമോന്നത നേതാവ് ആയത്തുള്ള മൊജ്താബ ഖമേനി ഒരു പുതിയ മിഡിൽ ഈസ്റ്റ് ക്രമത്തെക്കുറിച്ച് സൂചന നൽകി. അറബ് രാജ്യങ്ങൾ ഇനി അമേരിക്കൻ സൈനിക താവളങ്ങൾക്ക് സംരക്ഷണം നൽകില്ലെന്നും യുഎസിൻ്റെ സ്വാധീനം കുറയുകയാണെന്നും അദ്ദേഹം പ്രസ്താവിച്ചു. ഇറാൻ-യുഎസ് യുദ്ധത്തിൻ്റെ പശ്ചാത്തലത്തിലാണ് ഈ വർഷത്തെ ഹജ്ജ് നടക്കുന്നത്.
ടെഹ്റാൻ: മിഡിൽ ഈസ്റ്റിലെ അറബ് രാജ്യങ്ങൾ ഇനിമേൽ അമേരിക്കൻ സൈനിക താവളങ്ങൾക്ക് സംരക്ഷണ കവചമായി പ്രവർത്തിക്കില്ലെന്ന് ഇറാന്റെ പരമോന്നത നേതാവ് ആയത്തുള്ള മൊജ്താബ ഖമേനി. വിശുദ്ധ ഹജ്ജ് തീർത്ഥാടന സീസണിനോടനുബന്ധിച്ച് പുറത്തുവിട്ട ഔദ്യോഗിക രേഖാമൂലമുള്ള സന്ദേശത്തിലാണ് ഗൾഫ് മേഖലയിലും ആഗോളതലത്തിലും രൂപപ്പെടുന്ന 'പുതിയ ക്രമത്തെ' കുറിച്ച് ഖമേനി വ്യക്തമാക്കിയത്. യുഎസും ഇറാനും തമ്മിലുള്ള സമാധാന കരാർ ചർച്ചകൾ നിർണായക ഘട്ടത്തിൽ എത്തിനിൽക്കവെയാണ് ഇറാന്റെ കടുത്ത നിലപാട്.
തങ്ങളുടെ പ്രവൃത്തികൾ തുടരുന്നതിനും മേഖലയിൽ സൈനിക താവളങ്ങൾ സ്ഥാപിക്കുന്നതിനും അമേരിക്കയ്ക്ക് ഇനി സുരക്ഷിതമായ ഒരിടവും മിഡിൽ ഈസ്റ്റിൽ ഉണ്ടാകില്ലെന്ന് ഖമേനി മുന്നറിയിപ്പ് നൽകി. ഓരോ ദിവസം കഴിയുന്തോറും അമേരിക്ക അതിന്റെ പഴയ പ്രതാപത്തിൽ നിന്നും സ്വാധീനത്തിൽ നിന്നും വളരെ ദൂരേക്ക് പിന്തള്ളപ്പെടുകയാണെന്നും അദ്ദേഹം കൂട്ടിച്ചേർത്തു. കൂടാതെ, ഇസ്രായേലും അതിന്റെ ഭരണാധികാരികളും അവരുടെ വിനാശകരമായ നിലനിൽപ്പിന്റെ അവസാന ഘട്ടത്തിലേക്ക് അടുക്കുകയാണെന്നും ഇറാന്റെ പരമോന്നത നേതാവ് തന്റെ സന്ദേശത്തിൽ അവകാശപ്പെട്ടു.
കഴിഞ്ഞ ഫെബ്രുവരിയിൽ പിതാവ് അലി ഖമേനി വധിക്കപ്പെട്ടതിനെ തുടർന്ന് ഇറാന്റെ പുതിയ പരമോന്നത നേതാവായി മൊജ്താബ ഖമേനി ചുമതലയേറ്റിട്ട് 10 ആഴ്ച പിന്നിട്ടെങ്കിലും, അദ്ദേഹം ഇതുവരെ പൊതുവേദികളിൽ പ്രത്യക്ഷപ്പെടുകയോ ജനങ്ങളെ അഭിസംബോധന ചെയ്ത് സംസാരിക്കുകയോ ചെയ്തിട്ടില്ല. ഫെബ്രുവരി 28-ലെ വ്യോമാക്രമണത്തിൽ അദ്ദേഹത്തിന് ഗുരുതരമായി പരിക്കേറ്റുവെന്ന പാശ്ചാത്യ മാധ്യമങ്ങളുടെ റിപ്പോർട്ടുകൾ ഇറാന്റെ ആരോഗ്യ മന്ത്രാലയം നിഷേധിച്ചതിന് തൊട്ടുപിന്നാലെയാണ്, ഹജ്ജ് ദിനത്തിൽ അദ്ദേഹത്തിന്റെ പേരിൽ പുതിയ രേഖാമൂലമുള്ള സന്ദേശം പുറത്തുവരുന്നത്.
Related Articles
യുദ്ധത്തിന്റെ നിഴലിൽ ഈ വർഷത്തെ ഹജ്ജ്
ഇസ്ലാമിന്റെ അഞ്ച് നിർബന്ധിത തൂണുകളിൽ ഒന്നായ വാർഷിക ഹജ്ജ് തീർത്ഥാടനത്തിന് സൗദി അറേബ്യയിൽ തുടക്കമായിരിക്കുകയാണ്. ശാരീരികമായും സാമ്പത്തികമായും ശേഷിയുള്ള ഏതൊരു മുസ്ലിമും ജീവിതത്തിലൊരിക്കലെങ്കിലും വിശുദ്ധ നഗരമായ മക്കയിലേക്ക് നടത്തേണ്ട ഈ തീർത്ഥാടനം, ഇത്തവണ തികച്ചും അസാധാരണമായ സാഹചര്യത്തിലാണ് നടക്കുന്നത്. ഫെബ്രുവരി ഒടുവിൽ ആരംഭിച്ച യുഎസും ഇസ്രായേലും ഉൾപ്പെട്ട ഇറാൻ യുദ്ധം ആഗോളതലത്തിൽ ചരിത്രപരമായ ഊർജ്ജ പ്രതിസന്ധിക്ക് കാരണമാവുകയും ഒന്നിലധികം ഗൾഫ് രാജ്യങ്ങളെ പ്രതികൂലമായി ബാധിക്കുകയും ചെയ്തിട്ടുണ്ട്. ഈ യുദ്ധഭീതിയുടെ നിഴലിലാണ് ലോകമെമ്പാടുമുള്ള ദശലക്ഷക്കണക്കിന് തീർത്ഥാടകർ ഇത്തവണ ഹജ്ജ് കർമ്മങ്ങൾക്കായി മക്കയിൽ ഒത്തുകൂടിയിരിക്കുന്നത്.
