സമ്പുഷ്ടീകരിച്ച യുറേനിയം വിദേശത്തേക്ക് കയറ്റി അയക്കില്ലെന്നും അമേരിക്കയുമായി ചർച്ചകൾക്ക് തയ്യാറല്ലെന്നും ഇറാൻ വ്യക്തമാക്കി. ഉപരോധങ്ങൾ പിൻവലിക്കുക ഉൾപ്പെടെയുള്ള തങ്ങളുടെ ആവശ്യങ്ങൾ അംഗീകരിച്ചാൽ മാത്രമേ ചർച്ചകൾക്ക് തയ്യാറാകൂ എന്നാണ് ഇറാന്റെ നിലപാട്. ഇതോടെ പാകിസ്ഥാൻ നടത്തിയ മധ്യസ്ഥ ശ്രമങ്ങൾ കടുത്ത പ്രതിസന്ധിയിലായി.
ടെഹ്‌റാൻ: തങ്ങളുടെ കൈവശമുള്ള സമ്പുഷ്ടീകരിച്ച യുറേനിയം വിദേശത്തേക്ക് കയറ്റി അയക്കുമെന്ന വാർത്തകൾ ഇറാൻ ദേശീയ സുരക്ഷാ കൗൺസിൽ സെക്രട്ടറി മൊഹ്‌സെൻ റെസേയ് തള്ളി. അമേരിക്കയുമായി ചർച്ചകൾക്ക് തയ്യാറല്ലെന്നും, വാഷിംഗ്ടൺ തങ്ങളുടെ ആവശ്യങ്ങൾ പൂർണ്ണമായി അംഗീകരിച്ചാൽ മാത്രമേ ഭാവിയിൽ ചർച്ചകളെക്കുറിച്ച് ആലോചിക്കുകയുള്ളൂവെന്നും അദ്ദേഹം വ്യക്തമാക്കി. പാകിസ്ഥാൻ മധ്യസ്ഥ ശ്രമങ്ങളുടെ ഭാഗമായി ടെഹ്‌റാൻ സന്ദർശിച്ച പാക് സൈനിക മേധാവി ഫീൽഡ് മാർഷ്യൽ ആസിം മുനീറുമായുള്ള കൂടിക്കാഴ്ചയിലാണ് ഇറാൻ ഔദ്യോഗിക നിലപാട് കടുപ്പിച്ചത്.
രാജ്യത്തിന്‍റെ ദേശീയ സമ്പത്തായ സമ്പുഷ്ടീകരിച്ച യുറേനിയം ഒരു ഗ്രാം പോലും പുറത്തേക്ക് കൊണ്ടുപോകാൻ അനുവദിക്കില്ലെന്ന് മൊഹ്‌സെൻ റെസേയ് വ്യക്തമാക്കി. അമേരിക്കയുമായുള്ള വിശ്വാസ്യത വീണ്ടെടുക്കുന്നതിന് ഇറാൻ മുന്നോട്ടുവെച്ച ഏഴ് ഉപാധികൾ പൂർണ്ണമായി നടപ്പിലാക്കണമെന്ന് ഇറാനിയൻ പാർലമെന്‍റ് സ്പീക്കർ മുഹമ്മദ് ബാഖർ ഖാലിബാഫും ആവർത്തിച്ചു വ്യക്തമാക്കി.
ഇറാനിയൻ തുറമുഖങ്ങളിലെ ഉപരോധം അവസാനിപ്പിക്കുക, എണ്ണ കയറ്റുമതിക്കമേലുള്ള വിലക്കുകൾ നീക്കുക, പ്രാദേശിക തലത്തിലുള്ള ശത്രുതാപരമായ നീഡങ്ങൾ അവസാനിപ്പിക്കുക തുടങ്ങിയവയാണ് പ്രധാന ആവശ്യങ്ങൾ. അമേരിക്കയുമായുള്ള എട്ടുമാസം നീണ്ട യുദ്ധം അവസാനിപ്പിക്കുന്നതിനായി യുഎസ് വൈസ് പ്രസിഡന്‍റ് ജെ ഡി വാൻസ് ഉൾപ്പെടെയുള്ളവർ യുറേനിയം സമ്പുഷ്ടീകരണ ശേഷി ഗണ്യമായി കുറയ്ക്കണമെന്ന് ആവശ്യപ്പെട്ടിരുന്നു. എന്നാൽ പാകിസ്ഥാന്‍റെ നേതൃത്വത്തിലുള്ള പുതിയ മധ്യസ്ഥ ശ്രമങ്ങളെല്ലാം നിലവിലെ ഇറാനിയൻ നിലപാടിനെത്തുടർന്ന് കടുത്ത പ്രതിസന്ധിയിലാണ്.
