മഴ തന്നെ മഴ! സംസ്ഥാനത്ത് മഴ ശക്തം, 5 ദിവസം തുടരും; 7 ജില്ലകളിൽ പെരുമഴ, പലയിടത്തും ഓറഞ്ച് അലർട്ടിന് സമാന അവസ്ഥ
അടുത്ത മണിക്കൂറുകളിലും മഴ സാധ്യത ശക്തമാണ്
തിരുവനന്തപുരം: സംസ്ഥാനത്ത് പല ജില്ലകളിലും മഴ ശക്തം. ഇന്ന് 7 ജില്ലകളിൽ ശക്തമായ മഴയാണ് അനുഭപ്പെട്ടത്. പാലക്കാട്, എറണാകുളം, തൃശൂർ, മലപ്പുറം, കോഴിക്കോട്, കൊല്ലം, ആലപ്പുഴ ജില്ലകളിലാണ് ശക്തമായ മഴ തുടരുന്നത്. പലയിടത്തും കനത്ത നാശനഷ്ടമാണ് റിപ്പോർട്ട് ചെയ്യുന്നത്. വിവിധ ജില്ലകളിൽ ഓറഞ്ച് അലർട്ടിന് സമാനമായ അവസ്ഥയാണ് അനുഭവപ്പെട്ടത്. കഴിഞ്ഞ ആറ് മണിക്കൂറിനിടെ പാലക്കാട് മലമ്പുഴയിലും തൃശ്ശൂർ ലോവർ ഷോളയാറിലും ഓറഞ്ച് അലർട്ടിന് സമാനമായ മഴയായിരുന്നു. അടുത്ത മണിക്കൂറുകളിലും മഴ സാധ്യത ശക്തമാണ്.
വൈകിട്ടോടെ കൊച്ചിയിൽ കനത്ത മഴയാരുന്നു അനുഭവപ്പെട്ടത്. കലൂർ എംജി റോഡ് ഭാഗങ്ങളിലടക്കം വെള്ളക്കെട്ട് ഉണ്ടായി. ജില്ലയിൽ 5 ദിവസം യെല്ലോ അലർട്ട് പ്രഖ്യാപിച്ചിട്ടുണ്ട്. പത്തനംതിട്ടയുടെ മലയോര മേഖലയിലും ശക്തമായ മഴയാണ് പെയ്യുന്നത്. പുനലൂർ മൂവാറ്റുപുഴ മലയോര ഹൈവേയിൽ റാന്നി ചെത്തോങ്കര ചെറിയതോതിൽ മണ്ണിടിച്ചിൽ ഉണ്ടായി. ചുങ്കപ്പാറ ഭാഗത്ത് ചെറുതോടുകളും നിറഞ്ഞു, വെള്ളക്കെട്ടും രൂക്ഷമായി. പുനലൂർ മൂവാറ്റുപുഴ മലയോര ഹൈവേയിൽ ചെത്തോങ്കരയിൽ റോഡിൽ രൂക്ഷമായ വെള്ളക്കെട്ടാണ് അനുഭവപ്പെട്ടത്. കനത്ത മഴയിൽ വലിയതോട് കരകവിഞ്ഞതാണ് വെള്ളക്കെട്ടിന് കാരണമായത്.
ഇന്നത്തെ മഴ ഇതുവരെ മില്ലി മീറ്റ‍ർ കണക്കിൽ
ലോവർ ഷോളയാർ 122
മലമ്പുഴ ഡാം 117
തിരുവല്ല 101
മണ്ണാർക്കാട് 100
വെൺകുറിഞ്ഞി 84
കാഞ്ഞിരപ്പുഴ 71
ഉറുമി 73
പലേമാട് 65
പൊന്മുടി 62
കുമരകം 44
ഇടമലയർ 44
കുന്നന്താനം 41
തൈക്കാട്ടുശ്ശേരി 40
കായംകുളം 39
പുനലൂർ 36
അടുത്ത മണിക്കൂറുകളിലും മഴ സാധ്യത
അടുത്ത 3 മണിക്കൂറിൽ കേരളത്തിലെ എല്ലാ ജില്ലകളിലും ഒറ്റപ്പെട്ടയിടങ്ങളിൽ ഇടിമിന്നലോടു കൂടിയ നേരിയതോ മിതമായതോ ആയ മഴയ്ക്കും മണിക്കൂറിൽ 40 കിലോമീറ്റർ വരെ വേഗതയിൽ വീശിയടിച്ചേക്കാവുന്ന ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.
കേന്ദ്ര കാലാവസ്ഥാവകുപ്പിന്റെ അടുത്ത 5 ദിവസത്തേക്കുള്ള പുതുക്കിയ മഴ സാധ്യത പ്രവചനം
വിവിധ ജില്ലകളിൽ കേന്ദ്ര കാലാവസ്ഥ വകുപ്പ് മഞ്ഞ (Yellow) അലർട്ട് പ്രഖ്യാപിച്ചിരിക്കുന്നു.
14-10-2023 : തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശ്ശൂർ, പാലക്കാട്
15-10-2023 : പത്തനംതിട്ട, കോട്ടയം, എറണാകുളം, ഇടുക്കി, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട്
16-10-2023 : പത്തനംതിട്ട, കോട്ടയം, എറണാകുളം, ഇടുക്കി, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസറഗോഡ്
17-10-2023 : കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട്
18-10-2023 : കൊല്ലം, പത്തനംതിട്ട, ആലപ്പുഴ, ഇടുക്കി, വയനാട്
എന്നീ ജില്ലകളിലാണ് മഞ്ഞ അലർട്ട് പ്രഖ്യാപിച്ചിട്ടുള്ളത്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറിൽ 64.5 മില്ലിമീറ്റർ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അർത്ഥമാക്കുന്നത്.
പ്രത്യേക ജാഗ്രത നിർദ്ദേശം
കേരളത്തിൽ ഇന്നും, വരും ദിവസങ്ങളിലും മഞ്ഞ അലർട്ട് പ്രഖ്യാപിച്ചിരിക്കുന്നതിനാൽ മലയോര മേഖലകളിൽ ശക്തമായ മഴയ്ക്ക് സാധ്യതയുണ്ട്. താഴ്ന്ന പ്രദേശങ്ങളിലും നഗരങ്ങളിലും വെള്ളക്കെട്ട് എന്നിവയുണ്ടാകാൻ സാധ്യതയുണ്ട്. പൊതുജനങ്ങളും സർക്കാർ സംവിധാനങ്ങളും അതീവ ജാഗ്രത പാലിക്കണം.
ഏഷ്യാനെറ്റ് ന്യൂസ് വാർത്തകൾ തത്സമയം കാണാം
