സിപിഎം നേതാവ് കെ ജെ ഷൈനിനെതിരായ അശ്ലീല പ്രചാരണത്തിൽ പ്രതികരിച്ച് വൈപ്പിൻ എംഎൽഎ കെ.എൻ ഉണ്ണികൃഷ്ണൻ, വനിതാ കമ്മീഷൻ അധ്യക്ഷ പി സതീദേവി എന്നിവർ. സർക്കാരിന്റെ പ്രതിച്ഛായ തകർക്കാനുള്ള ശ്രമമാണെന്ന് എംഎൽഎ ആരോപിച്ചു.
കൊച്ചി: സിപിഎം നേതാവ് കെ ജെ ഷൈനിനെതിരെയുള്ള അശ്ലീല പ്രചാരണത്തിലും സൈബർ ആക്രമണത്തിലും പ്രതികരിച്ച് വൈപ്പിന് എംഎല്എ കെ.എന് ഉണ്ണികൃഷ്ണൻ. സൈബർ ആക്രമണത്തിൽ മുഖ്യമന്ത്രിക്കും ഡിജിപിക്കും മുനമ്പം ഡിവൈഎസ്പിക്കും പരാതി നൽകിയിരുന്നു. അപവാദ പ്രചാരണത്തിന്റെ ഉറവിടം അന്വേഷണത്തിലൂടെ വ്യക്തമാകണം. കോൺഗ്രസിന്റെ പ്രാദേശിക നേതാവിന്റെ ഫേസ്ബുക്കിലൂടെയാണ് ആദ്യം പ്രചരണം കണ്ടതെന്നും പേര് പരാമർശിക്കാത്തത് കൊണ്ടാണ് നിയമ നടപടിക്ക് പോകാതിരുന്നതെന്നും അദ്ദേഹം പ്രതികരിച്ചു. സോഷ്യൽ മീഡിയയിൽ പിന്നീട് വ്യാപകമായ ആക്രമണം നേരിട്ടു. കെഎം ഷാജഹാൻ ഒരു സംഭവ കഥ വിവരിക്കും പോലെ യൂട്യൂബ് ചാനലിൽ ഇത് അവതരിപ്പിച്ചു. തൻറെ പേര് വച്ച് പിന്നീട് വിവിധ സോഷ്യൽ മീഡിയ പ്ലാറ്റ്ഫോമുകളിൽ പ്രചരിപ്പിച്ചു. തന്റെ നിരപരാധിത്വം അറിയിച്ച് ഫേസ്ബുക്കിൽ താൻ കുറിപ്പിട്ടുവെന്നും പിന്നീടും സൈബർ ആക്രമണം തുടരുന്നു സാഹചര്യമാണ് ഉണ്ടായതെന്നും വൈപ്പിന് എംഎല്എ കെ.എന് ഉണ്ണികൃഷ്ണൻ.
സോഷ്യൽ മീഡിയയിലെ സൈബർ ആക്രമണത്തെ പ്രതിപക്ഷ നേതാവ് ഉൾപ്പെടെ തള്ളിപ്പറയുകയോ നിരുത്സാഹപ്പെടുത്തുയോ തയ്യാറായിട്ടില്ല. ഇത് സംശയം ജനിപ്പിക്കുന്ന കാര്യമാണ്. സർക്കാറിന്റെ പ്രതിച്ഛായ തകർക്കാനുള്ള ശ്രമമാണിത്. ജനപ്രതിനിധികൾക്ക് നേരെയുള്ള ഇത്തരത്തിലുള്ള ആക്ഷേപങ്ങൾ പ്രചരിപ്പിക്കുന്ന കെഎം ഷാജഹാനോട് സഹതാപം മാത്രം. കോൺഗ്രസ് ഇവരെ തള്ളിപ്പറയാത്തിടത്തോളം കാലം സതീശൻ പൊട്ടിക്കുമെന്ന് പറഞ്ഞ് ബോംബിന്റെ പിന്തുടർച്ചയാണെന്ന് കരുതേണ്ടിവരുമെന്നും എംഎൽഎയുടെ പ്രതികരണം.
വിഷയത്തിൽ കെ ജെ ഷൈനും പ്രതികരിച്ചു. പൊലീസ് സംവിധാനം ഉണർന്നു പ്രവർത്തിച്ചു. അതിൽ അഭിമാനം ഉണ്ട്. തനിക്ക് കിട്ടിയ എല്ലാ തെളിവുകളും അന്വേഷണ സംഘത്തിന് കൈമാറി. നെഹ്റുവിന്റെ ഒരച്ഛൻ മകൾക്ക് അയച്ച കത്തിൽ സംസ്കാരം എന്തെന്ന് പറയുന്നുണ്ട്. അത് എല്ലാവരും വായിക്കണം. കോൺഗ്രസ് സംസ്കാരം നിലനിൽക്കണം. എങ്കിലേ ഉയർന്ന ആശയ ചിന്താഗതികൾ ഉള്ളവർക്ക് പ്രവർത്തിക്കാൻ ആകൂവെന്നും കെ ജെ ഷൈൻ. സ്ത്രീ പുരുഷ ലൈംഗികത നടുറോഡിൽ വലിച്ചിഴയ്ക്കപ്പെടേണ്ടതല്ലെന്നും അവർ കൂട്ടിച്ചേർത്തു.
Related Articles
സൈബർ ആക്രമണത്തിൽ കെ ജെ ഷൈന്റെ പരാതി ലഭിച്ചുവെന്ന് വനിതാ കമ്മീഷൻ അധ്യക്ഷ പി സതീദേവിയും പ്രതികരിച്ചു. പൊലീസ് സ്വീകരിച്ച നടപടിയെ കുറിച്ച് റിപ്പോർട്ട് ആവശ്യപ്പെടും. ലീലാവതി ടീച്ചർ ഉൾപ്പെടെ ഉള്ളവർക്കെതിരെ അടക്കം സൈബർ ആക്രമണം ഉണ്ടായി. ഇത് കമ്മീഷൻ ഗൗരവമായി കാണുന്നു. പൊതു പ്രവർത്തകർക്കെതിരെ സൈബർ ആക്രമണം നടത്തിയാൽ പൊതുപ്രവർത്തനം അവസാനിപ്പിക്കും എന്നാണ് ചിലർ കരുതുന്നത്. പൊതു സമൂഹവും ഗൗരവമായി കാണണം. സാമൂഹിക മാധ്യമങ്ങൾ ദുരുപയോഗം ചെയ്യുന്നത് ഗൗരവമായി കാണുന്നു. കമ്മീഷന്റെ മീഡിയ മോണിറ്ററിങ് പ്രവർത്തനം ശക്തിപ്പെടുത്തും. ദൃശ്യ പത്രമാധ്യമങ്ങളിലൂടെ സ്ത്രീ വിരുദ്ധ പരാമർശങ്ങൾ നടത്തുന്നത് നിയന്ത്രിക്കേണ്ടതുണ്ട്. മാധ്യമ പ്രവർത്തകരായ സ്ത്രീകൾക്ക് നേരെയും സൈബർ ആക്രമണം നടക്കുന്നുണ്ടെന്നും പി സതീദേവി.
അതേ സമയം, രാഹുൽ വിഷയത്തിലും പി സതീദേവി പ്രതികരിച്ചു. തെറ്റായ ആരോപണം ആണ് ഉന്നയിക്കപ്പെട്ടതെങ്കിൽ രാഹുൽ മാങ്കൂട്ടത്തിൽ അത് നിഷേധിക്കാൻ രംഗത്ത് വരട്ടെ. ഇതുവരെ അദ്ദേഹം ആരോപണങ്ങൾ നിഷേധിച്ചിട്ടില്ല. തനിക്കെതിരെ ആക്രമണം ഉണ്ടായപ്പോൾ വ്യാജ പരാതിയാണെന്ന് പറഞ്ഞു രംഗത്ത് വരാൻ ഷൈൻ ടീച്ചർ തയ്യാറായി. പുരുഷ വിദ്വേഷ കമ്മീഷൻ എന്ന് പറഞ്ഞു വനിതാ കമ്മീഷനെ ഒരു കൂട്ടർ ആക്ഷേപിക്കുന്നു. സ്ത്രീപക്ഷ നിയമങ്ങൾ പുരുഷന്മാർക്ക് എതിരല്ല. ഗാർഹിക പീഡന പരിധിയിൽ സ്ത്രീകൾ ഉൾപ്പെടുന്നുണ്ടല്ലോയെന്നും വനിതാ കമ്മീഷൻ പുരുഷ വിദ്വേഷ കമ്മീഷനല്ലെന്നും വനിതാ കമ്മീഷൻ അധ്യക്ഷ പി സതീദേവി കൂട്ടിച്ചേർത്തു.
