ലുലു ഗ്രൂപ്പ് മധ്യകേരളത്തിലെ റീട്ടെയ്ൽ ശൃംഖല വിപുലീകരിക്കുന്നതിന്റെ ഭാഗമായി കോട്ടയം ചങ്ങനാശ്ശേരിയിൽ പുതിയ ഹൈപ്പർമാർക്കറ്റ് തുറക്കുന്നു. കെ.ജി.എ ഗ്രൂപ്പുമായി സഹകരിച്ച് കെ.ജി.എ മാളിലാണ് 50,000 ചതുരശ്രയടി വിസ്തീർണ്ണത്തിലുള്ള ഹൈപ്പർമാർക്കറ്റ് നിർമ്മിക്കുന്നത്.
തിരുവനന്തപുരം: റീട്ടെയ്ൽ സേവനം മധ്യകേരളത്തിൽ കൂടുതൽ വിപുലീകരിക്കുന്നതിന്റെ ഭാഗമായി, കോട്ടയത്ത് രണ്ടാമത്തെ ഹൈപ്പർമാർക്കറ്റ് കൂടി യാഥാർത്ഥ്യമാക്കാനൊരുങ്ങി ലുലു ഗ്രൂപ്പ്. ചങ്ങനാശ്ശേരിയിൽ ഉയരുന്ന കെ.ജി.എ മാളിലാണ് 50,000 സ്ക്വയർ ഫീറ്റിലുള്ള ലുലു ഹൈപ്പർമാർക്കറ്റ് നിർമ്മിക്കുക. ലുലു ഗ്രൂപ്പ് ചെയർമാൻ എം.എ യൂസഫലി, കെജിഎ ഗ്രൂപ്പ് ചെയർമാൻ കെ.ജി എബ്രഹാം എന്നിവരുടെ സാന്നിദ്ധ്യത്തിൽ ലുലു തിരുവനന്തപുരം - തമിഴ്നാട് ഡയറക്ടർ ജോയ് ഷഡാനന്ദൻ, കെ.ജിഎ ഗ്രൂപ്പ് ഡയറക്ടർ ആൻഡ് സിഇഒ കെ.സി ഈപ്പൻ എന്നിവർ ചേർന്ന് ഇത് സംബന്ധിച്ചുള്ള ധാരണാപത്രത്തിൽ (ലെറ്റർ ഓഫ് ഇന്റന്റ്) ഒപ്പുവച്ചു.
മധ്യകേരളത്തിൽ സേവനം കൂടുതൽ വിപുലമാക്കാനുള്ള ലുലു ഗ്രൂപ്പ് ചെയർമാൻ എം.എ യൂസഫലിയുടെ വീക്ഷണത്തിന്റെ പ്രതിഫലനമാണ് പുതിയ ചുവടുവയ്പ്പെന്നും പ്രദേശിക വികസനത്തിനൊപ്പം കൂടുതൽ തൊഴിലവസരങ്ങൾ കൂടിയാണ് യാഥാർത്ഥ്യമാകുന്നതെന്നും ലുലു തിരുവനന്തപുരം തമിഴ്നാട് ഡയറക്ടർ ജോയ് ഷഡാനന്ദൻ വ്യക്തമാക്കി. കോട്ടയം നാട്ടകത്തെ ലുലു ഹൈപ്പർമാർക്കറ്റിന് ഉപഭോക്താക്കളിൽ നിന്ന് ലഭിച്ച മികച്ച പിന്തുണയാണ് പുതിയ പദ്ധതിക്ക് വേഗത പകർന്നതെന്നും അദേഹം കൂട്ടിച്ചേർത്തു. ലുലു ഗ്രൂപ്പുമായി സഹകരിക്കാനായതിൽ ഏറെ സന്തോഷമുണ്ടെന്നും മധ്യകേരളത്തിന്റെ വികസനത്തിന് വലിയ കരുത്തേകുന്നതാണ് പദ്ധതിയെന്നും കെ.ജിഎ ഗ്രൂപ്പ് ഡയറക്ടർ ആൻഡ് സിഇഒ കെ.സി ഈപ്പൻ പറഞ്ഞു.
കെ.ജി എബ്രഹാം ചെയർമാനമായ കുവൈത്ത് ആസ്ഥാനമായുള്ള കെ.ജി.എ ഗ്രൂപ്പിന്റെ കെ.ജി.എ മാളിൽ, ലുലു ഹൈപ്പർമാർക്കറ്റിന് പുറമേ അന്താരാഷ്ട്ര റീട്ടെയ്ൽ ബ്രാൻഡ് ഷോറൂമുകൾ, റെസ്റ്റോറന്റുകൾ, കഫേകൾ, ലക്ഷ്വറി ഹോട്ടൽ, ബാങ്ക്വറ്റ് ഹാൾ, വിനോദകേന്ദ്രങ്ങൾ തുടങ്ങിയവും ഉണ്ടാകും. മികച്ച പാർക്കിംഗ് സൗകര്യത്തോടെയാണ് മാൾ ഉയരുന്നത്. കുവൈത്ത് ആസ്ഥാനമായുള്ള കെജിഎ ഗ്രൂപ്പിന് കേരളത്തിൽ മികച്ച പ്രൊജക്ടുകളാണ് ഉള്ളത്. കൊച്ചി ക്രൗൺ പ്ലാസ, തിരുവല്ലയിലെ കെ.ജി.എ. എലൈറ്റ് കോണ്ടിനെന്റൽ ഹോട്ടൽസ് അടക്കം നിരവധി പദ്ധതികളാണ് കേരളത്തിൽ കെജിഎ ഗ്രൂപ്പിനുള്ളത്. കെജിഎ മാൾ അടക്കം പത്ത് പുതിയ പദ്ധതികൾ കൂടി സംസ്ഥാനത്ത് കെജിഎ ഗ്രൂപ്പ് നടപ്പാക്കുന്നുണ്ട്.
Related Articles
ലുലു ഗ്രൂപ്പ് എക്സിക്യൂട്ടീവ് ഡയറക്ടർ എം.എ അഷറഫ് അലി, ലുലു ഇന്ത്യ ഡയറക്ടർ ആൻഡ് സിഇഒ എം.എ നിഷാദ്, ലുലു ഇന്ത്യ ഡയറക്ടർ ആൻഡ് സിഒഒ ഫഹാസ് അഷറഫ്, എൻബിടിസി ആൻഡ് കെജിഎ ഗ്രൂപ്പ് ഡെപ്യൂട്ടി മാനേജിംഗ് ഡയറക്ടർ ബെൻസൻ വർഗീസ് എബ്രഹാം, കെജിഎ ഗ്രൂപ്പ് ഫിനാൻസ് ആൻഡ് ബിസിനസ് സപ്പോർട്ട് ഡയറക്ടർ വിനോദ് കുമാർ പുളിക്കൽ, ക്രൗൺ പ്ലാസ കൊച്ചി ജനറൽ മാനേജർ ദിനേഷ് റായ് എന്നിവരും ചടങ്ങിൽ പങ്കെടുത്തു.
