മാസപ്പടി ഡയറിയിൽ പ്രതികരണവുമായി മന്ത്രി കെ മുരളീധരൻ. തെരഞ്ഞെടുപ്പിന് പണം വാങ്ങുന്നതും അഴിമതിപ്പണവും രണ്ടാണെന്ന് പ്രതികരിച്ച കെ മുരളീധരൻ, ഏത് അന്വേഷണവും വരട്ടെയെന്നും പറഞ്ഞു.
തൃശൂർ: മാസപ്പടിക്കേസിൽ സിഎംആർഎൽ എംഡി ശശിധരൻ കർത്തയുടെ ഡയറിയെക്കുറിച്ച് പ്രതികരണവുമായി മന്ത്രി കെ മുരളീധരൻ. തെരഞ്ഞെടുപ്പിന് പണം വാങ്ങുന്നതും അഴിമതിപ്പണവും രണ്ടാണെന്ന് കെ മുരളീധരൻ പറഞ്ഞു. തെരഞ്ഞെടുപ്പ് കാലത്ത് പണം വാങ്ങിയിട്ടുണ്ടാകും. ഏത് അന്വേഷണവും വരട്ടെ. ഈ ഡയറിയെക്കുറിച്ച് അന്വേഷിച്ചാലും കുഴപ്പമില്ലെന്നും അദ്ദേഹം പറഞ്ഞു. നിയമം നിയമത്തിന്റെ വഴിക്ക് പോകണം. ഇഡി പറഞ്ഞത് കണ്ണടച്ച് വിശ്വസിക്കുന്ന സർക്കാർ അല്ല കേരളത്തിലേത്. എന്നാൽ ഇഡി ഔദ്യോഗികമായ ഒരു കാര്യം ആവശ്യപ്പെട്ടാൽ നിർവഹിച്ചേ പറ്റൂ എന്നും കെ മുരളീധരൻ വ്യക്തമാക്കി.
ശശിധരൻ കർത്തയുടെ ഡയറിയുടെ പേജ് പുറത്തുവിട്ട് ബിജെപി നേതാവ് ഷോൺ ജോർജ് രംഗത്തെത്തിയത് ചർച്ചയായതിനിടെ ആണ് കെ മുരളീധരൻ്റെ പ്രതികരണം. എസ്എഫ്ഐഒ കോടതിയിൽ സമർപ്പിച്ച രേഖയുടെ ഭാഗം പങ്കുവെച്ചാണ് ഷോൺ ജോർജ് ഫേസ്ബുക്കിലൂടെ രംഗത്തെത്തിയത്. മാസപ്പടിക്കേസിൽ പിണറായി വിജയനെതിരെ എന്തുകൊണ്ട് വിജിലൻസ് അന്വേഷണം ഇല്ല എന്ന ചോദ്യമുന്നയിച്ചാണ് ഷോണിൻ്റെ പോസ്റ്റ്. ഇതിന് കാരണം മുഖ്യമന്ത്രി വിഡി സതീശൻ്റെ അടക്കം പേര് ഡയറിയിൽ ഉൾപ്പെട്ടതാണെന്നാണ് ഷോൺ ജോർജ് പറഞ്ഞുവെക്കുന്നത്.
ഉമ്മൻ ചാണ്ടി, രമേശ് ചെന്നിത്തല, വി എസ് അച്ചു..., കെ മുരളീധരൻ, സി കെ ചന്ദ്രപ്പൻ, എളമരം കരീം, ഗോവിന്ദൻ മാസ്റ്റർ, ഹൈബി ഈഡൻ, പന്ന്യൻ രവീന്ദ്രൻ, എസ് ശർമ്മ, പി രാജീവ്, ഷിബു ബേബി ജോൺ, കെ ബി ഗണേഷ് കുമാർ തുടങ്ങിയ പ്രമുഖ യുഡിഎഫ്, എൽഡിഎഫ് നേതാക്കളുടെ പേരുകളാണ് പേജിലുള്ളത്.
