കണ്ണൂര് മട്ടന്നൂരിൽ സിനിമ കാണുന്നതിനിടെ തിയേറ്ററിലെ വാട്ടര് ടാങ്ക് തകര്ന്ന് അപകടം. സിനിമ കാണാനെത്തിയ നാല് പേര്ക്ക് പരിക്കേറ്റു
കണ്ണൂര്: കണ്ണൂരിൽ സിനിമ കാണുന്നതിനിടെ തിയേറ്ററിലെ വാട്ടര് ടാങ്ക് തകര്ന്ന് അപകടം. അപകടത്തിൽ സിനിമ കാണാനെത്തിയ നാല് പേര്ക്ക് പരിക്കേറ്റു. കണ്ണൂര് മട്ടന്നൂരിലെ സഹിന സിനിമാസിലെ വാട്ടര് ടാങ്കാണ് തകര്ന്നത്. വാട്ടര് ടാങ്ക് സ്ഥാപിച്ചിരുന്ന കെട്ടിടത്തിന്റെ ഒരു ഭാഗവും തകര്ന്നു. വാട്ടര് ടാങ്ക് പൊട്ടിയതോടെ മുകളിൽ നിന്ന് വെള്ളം തിയേറ്ററിലേക്ക് ഒഴുകിയെത്തി. വാട്ടര് ടാങ്കിനൊപ്പം കെട്ടിടത്തിലെ സിമന്റ് കട്ടകളും സീലിങും സീറ്റിലേക്ക് വീണാണ് സിനിമ കാണാനെത്തിയവര്ക്ക് പരിക്കേറ്റത്.
സംഭവത്തെ തുടര്ന്ന് സിനിമ പ്രദര്ശനം തടസപ്പെട്ടു. പരിക്കേറ്റവരെ ആശുപത്രിയിലെത്തിച്ചു. നായാട്ടുപാറ സ്വദേശി വിജിൽ (30), സുനിത്ത് നാരായണൻ (36), കൂത്തുപറമ്പ് സ്വദേശികളായ ശരത്ത് (29) സുബിഷ (25) എന്നിവര്ക്കാണ് പരിക്കേറ്റത്. ലക്കി ഭാസ്കര് സിനിമയുടെ ഇന്റര്വെൽ കഴിഞ്ഞ് വീണ്ടും സിനിമ ആരംഭിച്ചപ്പോഴാണ് സംഭവമെന്ന് തിയേറ്ററിലുണ്ടായിരുന്നവര് പറഞ്ഞു. ടാങ്കും സീലിങും സിമന്റ് കട്ടകളും വെള്ളവും സീറ്റുകളിലേക്ക് വീഴുകയായിരുന്നു. സീലിങിന് അടിയിൽ കുടുങ്ങിയ ഒരാള്ക്ക് ഉള്പ്പെടെയാണ് പരിക്കേറ്റതെന്നും സിനിമ കാണാനെത്തിയവര് പറഞ്ഞു.
