മൂന്നാര്‍ ഹൈ അള്‍ട്ടിറ്റ്യൂഡ് സ്റ്റേഡിയത്തിന് സമീപമാണ് അപകടം
മൂന്നാര്: താഴ്ന്ന് കിടന്ന 11 കെ.വി വൈദ്യുതി ലൈനില് നിന്നും ഷോക്കേറ്റ് യുവാവ് മരിച്ചു. കാസര്ഗോഡ് കേഴൂര് സ്വദേശി കെ.എം ഹൗസില് സുബൈര് മകന് അബ്ദുള്ള(38) ആണ് മരിച്ചത്. ചൊവ്വാഴ്ച രാവിലെ പത്ത് മണിയോടെ മൂന്നാര് ഹൈ അള്ട്ടിറ്റ്യൂഡ് സ്റ്റേഡിയത്തിന് സമീപമായിരുന്നു അപകടം.
സ്റ്റേഡിയത്തില് നടക്കുന്ന മൂന്നാര് ഫെസ്റ്റിന്റെ ഭാഗമായി ബോര്ഡ് സ്ഥാപിക്കുന്നതിനിടയില് ഇരുമ്പ് പൈപ്പ് താഴ്ന്നുകിടന്ന വൈദ്യുതി ലൈനില് തട്ടുകയായിരുന്നു. ഷോക്കേറ്റ് തെറിച്ചുവീണ അബ്ദുള്ളയെ സഹ ജീവനക്കാര് മൂന്നാര് ഹൈറേഞ്ച് ആശുപത്രിയില് പ്രവേശിപ്പിച്ചുവെങ്കിലും ജീവന് രക്ഷിക്കാനായില്ല. മോര്ച്ചറിയില് സൂക്ഷിച്ചിരിക്കുന്ന മൃതദേഹം പോസ്റ്റ്മാര്ട്ടത്തിന് ശേഷം ബന്ധുക്കള്ക്ക് നല്കും.
6.3 മീറ്റര് ഉയര പരിധിയാണ് 11 കെ.വി ലൈന് കടന്നു പോകുന്നതിന് നിശ്ചയിച്ചിരിക്കുന്നത്. എന്നാല് അപകടം നടന്ന സ്ഥലത്ത് വൈദ്യുതി ലൈനിന്റെ ഉയരം 3.9 മീറ്റര് മാത്രമാണ്. ഏപ്രില് 10 മുതലാണ് പത്തനംതിട്ട ആസ്ഥാനമായി പ്രവര്ത്തിക്കുന്ന സ്വകാര്യ കമ്പനി മൂന്നാര് ഫെസ്റ്റ് എന്ന പേരില് സാഹസിക വിനോദങ്ങളും പ്രദര്ശന മേളയും ഗ്രൗണ്ടില് തുടങ്ങിയത്. എന്നാല് ഫെസ്റ്റിന് പഞ്ചായത്ത് അനുമതിയില്ലെന്നുള്ളതാണ് വസ്തുത.
