മഞ്ഞുകാലത്ത് അന്തരീക്ഷത്തിലെ ഈർപ്പം കുറയുന്നത് കാരണം ചർമ്മം പെട്ടെന്ന് വരണ്ടുണങ്ങുകയും, വിണ്ടുകീറുകയും, തിളക്കം നഷ്ടപ്പെടുകയും ചെയ്യാറുണ്ട്. ഇത്തരം സാഹചര്യങ്ങളിൽ ചർമ്മത്തിന് ആഴത്തിലുള്ള പോഷണവും ജലാംശവും നൽകാൻ..
മഞ്ഞുകാലം വന്നാൽ ചർമ്മത്തിന്റെ കാര്യം കഷ്ടത്തിലാകും. തണുപ്പ് കൂടുമ്പോൾ ചർമ്മം വരളുകയും, വരണ്ടുണങ്ങി പാളികളായി ഇളകിപ്പോവുകയും ചെയ്യാം. ചുളിവുകളും കറുത്ത പാടുകളും കൂടാനുള്ള സാധ്യതയുമുണ്ട്. ഈ സമയത്ത് നിങ്ങളുടെ ചർമ്മത്തിന് കൂടുതൽ ശ്രദ്ധ നൽകേണ്ടത് അത്യാവശ്യമാണ്. ബ്യൂട്ടിപാർലറിലെ പണച്ചെലവില്ലാതെ, നമ്മുടെ വീട്ടിലെ അടുക്കളയിൽ തന്നെയുള്ള പ്രകൃതിദത്ത ചേരുവകൾ ഉപയോഗിച്ച് മുഖത്തിന് തിളക്കം നൽകാൻ സഹായിക്കുന്ന ചില വിന്റർ ഫേസ് പാക്കുകൾ പരിചയപ്പെടാം.
തേനും തൈരും പാക്ക്
വരണ്ട ചർമ്മക്കാർക്ക് മഞ്ഞുകാലത്ത് ഏറ്റവും അനുയോജ്യമായ പാക്കാണിത്. ഒരു ടേബിൾസ്പൂൺ തേനും ഒരു ടേബിൾസ്പൂൺ തൈരും ചേർത്താണ് ഈ പാക്ക് തയ്യാറാക്കുന്നത്. തേൻ ചർമ്മത്തിലെ ഈർപ്പം നിലനിർത്താൻ സഹായിക്കുന്ന ഒരു മികച്ച ഹ്യുമെക്ടന്റാണ്. തൈരിലെ ലാക്റ്റിക് ആസിഡ് ചർമ്മത്തിന് തിളക്കവും മൃദുത്വവും നൽകുന്നു. ഈ മിശ്രിതം 15 മിനിറ്റ് മുഖത്തിട്ട ശേഷം ചെറുചൂടുവെള്ളത്തിൽ കഴുകിക്കളയുന്നത് ചർമ്മത്തിന് ഉടനടി ജലാംശം നൽകുന്നു.
പഴവും പാൽപ്പാടയും പാക്ക്
അതീവ പോഷണം ആവശ്യമുള്ള, പരുപരുത്ത ചർമ്മത്തിന് ഈ പാക്ക് വളരെ ഗുണകരമാണ്. അര കഷണം പഴുത്ത പഴം ഉടച്ചെടുത്ത് ഒരു ടേബിൾസ്പൂൺ പാൽപ്പാടയുമായി ചേർത്ത് യോജിപ്പിക്കുക. വൈറ്റമിനുകൾ നിറഞ്ഞ പഴം ചർമ്മത്തിന് മൃദുത്വം നൽകുമ്പോൾ, പാൽപ്പാട ചർമ്മത്തിന്റെ ആഴങ്ങളിലേക്ക് ഇറങ്ങിച്ചെന്ന് മോയ്സ്ചറൈസ് ചെയ്യുന്നു. 20 മിനിറ്റ് ഇത് മുഖത്ത് പുരട്ടുന്നത് ചർമ്മത്തിലെ വരൾച്ച മാറ്റി നല്ല മിനുസം നൽകും.
Related Articles
കാപ്പിപ്പൊടിയും ഒലീവ് ഓയിലും പാക്ക്
ചർമ്മത്തിന് ഉടനടി തിളക്കവും വൃത്തിയും നൽകാൻ ഈ പാക്ക് തിരഞ്ഞെടുക്കാം. ഒരു ടേബിൾസ്പൂൺ കാപ്പിപ്പൊടിയും ഒരു ടീസ്പൂൺ ഒലീവ് ഓയിലും ചേർത്താണ് ഈ മിശ്രിതം ഉണ്ടാക്കുന്നത്. കാപ്പിപ്പൊടിയിലെ ആൻ്റി ഓക്സിഡന്റുകൾ ചർമ്മത്തെ ഉത്തേജിപ്പിക്കുകയും മൃതകോശങ്ങളെ നീക്കം ചെയ്യുകയും ചെയ്യും. ഒലീവ് ഓയിൽ ചർമ്മത്തിന് ആവശ്യമായ എണ്ണമയം നൽകി വരൾച്ച തടയുന്നു. ഈ പാക്ക് 15 മിനിറ്റിന് ശേഷം ചെറുചൂടുവെള്ളത്തിൽ കഴുകി കളയുന്നത് മുഖത്തിന് ഫ്രഷ്നസ് നൽകും.
ടിപ്സ്;
- ഫേസ് പാക്ക് ഇട്ടതിന് ശേഷം ചെറുചൂടുവെള്ളത്തിൽ മുഖം കഴുകുന്നതാണ് മഞ്ഞുകാലത്ത് ഏറ്റവും ഉചിതം. തണുത്ത വെള്ളം ഉപയോഗിക്കുന്നത് ഒഴിവാക്കുക.
- ഓരോ തവണ ഫേസ് പാക്ക് ഉപയോഗിച്ച ശേഷവും നിങ്ങളുടെ ഇഷ്ടപ്പെട്ട മോയ്സ്ചറൈസർ മുഖത്ത് പുരട്ടാൻ മറക്കരുത്.
- ആഴ്ചയിൽ രണ്ടോ മൂന്നോ തവണ ഈ പാക്കുകൾ ഉപയോഗിക്കുന്നത് മികച്ച ഫലം നൽകും.
ഈ മഞ്ഞുകാലത്ത് നിങ്ങളുടെ ചർമ്മത്തിന് ഈ പ്രകൃതിദത്ത ഫേസ് പാക്കുകൾ ഒരു താങ്ങും തണലുമാകും എന്നതിൽ സംശയമില്ല.
