വൃക്ക മാറ്റിവെക്കൽ ശസ്ത്രക്രിയയും തുടർചികിത്സയുമാണ് അബ്ദുൽ ജബ്ബാറിനെ ജീവിതത്തിലേക്ക് തിരികെ എത്തിക്കാൻ ഏക മാർഗമെന്ന് ഡോക്ടർമാർ നിര്ദേശിച്ചിട്ടുണ്ട്
മണ്ണഞ്ചേരി: വൃക്കരോഗത്താൽ ബുദ്ധിമുട്ടുന്ന പൊന്നാട് നാലുപുരയ്ക്കൽ അബ്ദുൽ ജബ്ബാറിനെ (52) ജീവിതത്തിലേക്ക് മടക്കിക്കൊണ്ടുവരാൻ കൈകോർക്കാനൊരുങ്ങി ഒരുനാട്. ഇരു വൃക്കകളും തകരാറിലായ ജബ്ബാർ ആഴ്ചയിൽ രണ്ട് ഡയാലിസിസുകൾ നടത്തിയാണ് ജീവൻ നിലനിർത്തുന്നത്. സാധാരണ കച്ചവടക്കാരനായിരുന്ന ഇദ്ദേഹം ഭാര്യയും രണ്ട് മക്കളുമടങ്ങുന്ന കുടുംബത്തിന്റെ ഏക അത്താണിയായിരുന്നു. കൊവിഡ് കാലത്തെ കച്ചവടത്തകർച്ചയും മകളുടെ വിവാഹവും മൂലം സ്വന്തം വീട് വിൽക്കേണ്ടി വന്ന ഈ കുടുംബം നിലവിൽ വാടകവീട്ടിലാണ് കഴിയുന്നത്. സ്വന്തമായി ഒരിഞ്ച് ഭൂമി പോലുമില്ലാത്ത അവസ്ഥയിൽ ചികിത്സയ്ക്കായി വലിയ തുക കണ്ടെത്താൻ കഴിയാതെ കുടുംബം നിസ്സഹായാവസ്ഥയിലാണ്. വൃക്ക മാറ്റിവെക്കൽ ശസ്ത്രക്രിയയും തുടർചികിത്സയുമാണ് അബ്ദുൽ ജബ്ബാറിനെ ജീവിതത്തിലേക്ക് തിരികെ എത്തിക്കാൻ ഏക മാർഗമെന്ന് ഡോക്ടർമാർ നിര്ദേശിച്ചിട്ടുണ്ട്.
ഇതിനായി 30 ലക്ഷം രൂപ സമാഹരിക്കാൻ കെ സി വേണുഗോപാൽ എംപി, പി പി ചിത്തരഞ്ജൻ എംഎൽഎ, ജില്ലാ പഞ്ചായത്ത് അംഗം ഷീന സനൽകുമാർ എന്നിവർ രക്ഷാധികാരികളായും മണ്ണഞ്ചേരി പഞ്ചായത്ത് പ്രസിഡന്റ് ദീപ്തി അജയകുമാർ ചെയർമാനായും ചികിത്സാ സഹായ സമിതി രൂപീകരിച്ചു. ബ്ലോക്ക് പഞ്ചായത്ത് അംഗം നവാസ് നൈന (വൈസ് ചെയർമാൻ), അൽഷിഫ ചാരിറ്റബിൾ ട്രസ്റ്റ് ജനറൽ സെക്രട്ടറി ഷാജി പനമ്പള്ളി (ജനറൽ കൺവീനർ), സിറാജ് കമ്പിയകം (ട്രഷറർ), പഞ്ചായത്ത് അംഗങ്ങൾ (കൺവീനർമാർ) എന്നിവരുടെ നേതൃത്വത്തിലാണ് സമിതിയുടെ പ്രവർത്തനം. പഞ്ചായത്തിലെ 3, 4, 5, 6, 17, 19, 20, 21 വാർഡുകളിലാണ് 'കരുണയുടെ കൈനീട്ടം-ഒരു ജീവൻ രക്ഷിക്കാൻ നമുക്കൊരുമിക്കാം' എന്ന ശീർഷകത്തിൽ ഞായറാഴ്ച ഏകദിന പൊതു ധനസമാഹരണം നടക്കുന്നത്. ഓരോ വാർഡിലും പത്തോളം ക്ലസ്റ്ററുകൾ രൂപീകരിച്ച് ജീവകാരുണ്യ പ്രവർത്തകരുടെ നേതൃത്വത്തിൽ നോട്ടീസ് വിതരണം പൂർത്തിയാക്കി.
ശനിയാഴ്ച ഈ വാർഡുകളിൽ വാഹനപ്രചാരണവും നടത്തും. ഞായറാഴ്ച പ്രവർത്തകർ എത്തുമ്പോൾ നിർലോഭമായ സഹായങ്ങൾ നൽകി ഈ ജീവൻ രക്ഷിക്കാൻ പങ്കാളികളാകണമെന്ന് ചികിത്സാ സഹായ സമിതി അഭ്യർത്ഥിക്കുന്നത്. സഹായങ്ങൾ കൈമാറുന്നതിനായി കേരള ഗ്രാമീൺ ബാങ്കിന്റെ കലവൂർ ശാഖയിൽ അക്കൗണ്ട് തുടങ്ങിയിട്ടുണ്ട്.
Related Articles
അക്കൗണ്ട് നമ്പർ: 40698101102457,
ഐഎഫ്എസ്സി: KLGB0040698,
ഫോൺ: 99470 59812.
