ജോലിയുമായി ബന്ധപ്പെട്ട കാര്യങ്ങൾക്കായി ഇരുചക്രവാഹനത്തിൽ യാത്ര ചെയ്യുമ്പോഴാണ് കുന്ദമംഗലം പന്തീർപ്പാടം സ്വദേശിയായ ബിജുവിന് കേബിൾ കയ്യിൽ കുരുങ്ങി പരിക്കേൽക്കുന്നത്.
കോഴിക്കോട്: കോഴിക്കോട് മലാപ്പറമ്പിൽ പോസ്റ്റിൽ നിന്ന് റോഡിലേക്ക് വീണ കേബിളിൽ കുരുങ്ങി യുവാവിന് പരിക്കേറ്റു. കുന്ദമംഗലം സ്വദേശിയായ ബിജുവിനാണ് പരിക്കേറ്റത്. ബിജുവിന്റെ കൈപ്പത്തിയിൽ ആഴത്തിലുള്ള മുറിവേറ്റു. ബൈക്കിന് വേഗം കുറവായത് കൊണ്ടാണ് കേബിൾ കഴുത്തിൽ കുരുങ്ങാതിരുന്നതെന്ന് ബിജു ഏഷ്യാനെറ്റ് ന്യൂസിനോട് പറഞ്ഞു. ജോലിയുമായി ബന്ധപ്പെട്ട കാര്യങ്ങൾക്കായി ഇരുചക്രവാഹനത്തിൽ യാത്ര ചെയ്യുമ്പോഴാണ് കുന്ദമംഗലം പന്തീർപ്പാടം സ്വദേശിയായ ബിജുവിന് കേബിൾ കയ്യിൽ കുരുങ്ങി പരിക്കേൽക്കുന്നത്. ശ്രദ്ധിക്കപ്പെടാത്ത രീതിയിലാണ് കേബിൾ കിടന്നിരുന്നത് എന്ന് ബിജു പറയുന്നു.
പിന്നിൽ നിന്ന് മറ്റൊരു വാഹനം ഹോണടിച്ചപ്പോൾ വണ്ടി സൈഡാക്കിയതാണ്. കേബിൾ കയ്യിൽ കുരുങ്ങി രക്തസ്രാവമുണ്ടായി. അപ്പോൾ തന്നെ ആശുപത്രിയിൽ പോയി. ആ സമയത്ത് അവിടെ ആരും ഇല്ലായിരുന്നെങ്കിൽ താൻ വളരെയധികം ബുദ്ധിമുട്ടിയേനെയെന്നും ബിജുവിന്റെ വാക്കുകൾ. പെട്ടെന്ന് കാഴ്ചയിൽ പെടുന്ന രീതിയിലായിരുന്നില്ല കേബിൾ കിടന്നിരുന്നത്. അവിടങ്ങളിൽ ഒരുപാട് സ്ഥലത്ത് ഇത്തരത്തിൽ കേബിളുകൾ കിടക്കുന്നുണ്ട്. ആവശ്യമായ നടപടി അധികൃതരുടെ ഭാഗത്ത് നിന്നുണ്ടായില്ലെങ്കിൽ ചിലപ്പോൾ ആളുകളുടെ ജീവന് തന്നെ ആപത്തായേക്കുമെന്ന ആശങ്കയും ബിജു ഏഷ്യാനെറ്റ് ന്യൂസിനോട് പങ്കുവെച്ചു.
