തിരുവനന്തപുരം കഴക്കൂട്ടത്ത് ഏഴ് ഗ്രാം എംഡിഎംഎയുമായി സ്ഥിരം ലഹരി കച്ചവടക്കാരനായ ഷാരോൺ ജേക്കബ് എന്ന യുവാവിനെ സിറ്റി ഡാൻസാഫ് ടീം പിടികൂടി. മുൻപ് ലഹരി കേസിൽ ജാമ്യത്തിലിറങ്ങിയ ഇയാൾ, ഓപ്പറേഷൻ തൂഫാന്റെ ഭാഗമായുള്ള നിരീക്ഷണത്തിനിടെയാണ് വീണ്ടും അറസ്റ്റിലായത്.
തിരുവനന്തപുരം: തിരുവനന്തപുരം കഴക്കൂട്ടത്ത് ഏഴ് ഗ്രാം എംഡിഎംഎയുമായി സ്ഥിരം ലഹരി കച്ചവടക്കാരൻ പിടിയിൽ. തുമ്പ ആറാട്ടുവഴി സ്വദേശി ഷാരോൺ ജേക്കബ് (29) ആണ് സിറ്റി ഡാൻസാഫ് ടീമിന്റെ പിടിയിലായത്. ഇയാളുടെ വീട്ടിൽ നിന്ന് ഏഴ് ഗ്രാം എംഡിഎയും ലഹരി ഉപയോഗിക്കുന്നതിനുള്ള ഇൻസുലിൻ സിറിഞ്ചുകളും കഞ്ചാവ് വലിക്കുന്നതിനുള്ള പ്രത്യേക ഉപകരണവും 4000 രൂപയും കണ്ടെടുത്തു. കഴിഞ്ഞ ഡിസംബറിൽ എംഡിഎയും ഗോൾഡൻ ഷാമ്പെയിനും അടക്കം ഇയാൾ പിടിയിലായിരുന്നു
കേസിൽ ജാമ്യത്തിൽ ഇറങ്ങിയ ശേഷം വീണ്ടും ലഹരി കച്ചവടം ആരംഭിക്കുകയായിരുന്നു. ഓപ്പറേഷൻ തൂഫാന്റെ ഭാഗമായി സ്ഥിരം കച്ചവടക്കാരെ നിരീക്ഷിച്ചു വരുന്നതിനിടെ ഷാരോൺ വീട്ടിലെത്തിയതായി വിവരം ലഭിച്ച ഡാൻസാഫ് സംഘം വീട് വളഞ്ഞാണ് ഇയാളെ പിടികൂടിയത്. നിരവധി ലഹരി - അടിപിടി കേസുകളിൽ പ്രതിയാണ് ഷാരോൺ. സ്ഥിരം ലഹരി കച്ചവടക്കാരൻ ആയ ഇയാൾ കൂടുതൽ ലഹരി വസ്തുക്കൾ ശേഖരിച്ചിട്ടുള്ളതായി വിവരം ലഭിച്ച പൊലീസ് വിശദമായി പരിശോധന നടത്തിവരികയാണ്. പ്രതിയെ കഴക്കൂട്ടം പൊലീസിന് കൈമാറി.
