ആലപ്പുഴ: അടുക്കളയിലെ ബർത്തിൽനിന്ന്​ കൊരണ്ടിപ്പലക തലയിൽവീണ്​ ഗുരുതര പരിക്കേറ്റ്​ ചികിത്സയിലായിരുന്ന വൃദ്ധമരിച്ചു. വാടയ്​ക്കൽ വട്ടത്തിൽ ക്ലീറ്റസി​ന്‍റെ ഭാര്യ ഫിലോമിനയാണ്​ (65) മരിച്ചത്​. ഈമാസം അഞ്ചിന്​ രാത്രി 8.30നായിരുന്നു ഫിലോമിനയ്ക്ക് പരിക്കേറ്റത്.  അടുക്കളയിലെ ജോലിക്കിടെ സാധനം എടുക്കുന്നതിനിടെ കൊരണ്ടിപ്പലക തലയിൽ വീണ്​ ഗുരുതരപരിക്കേറ്റതായാണ്​ പൊലീസിനോട്​ ബന്ധുക്കൾ പറഞ്ഞത്​. 

അബോധാവസ്ഥയിലായ ഇവരെ അയൽവാസികൾ ചേർന്ന്​ ആദ്യം സഹകരണആശുപത്രിയിലും പിന്നീട്​ വണ്ടാനം മെഡിക്കൽകോളജ്​ ആശുപത്രിയിലും പ്രവേശിപ്പിച്ചു. ചികിത്സക്കിടെയാണ് ​ ഇന്ന് ഫിലോമിന മരിച്ചത്. കോവിഡ്​ പരിശോധന പൂർത്തിയാക്കിയ മൃതദേഹം ബന്ധുക്കൾക്ക്​ വിട്ടുനൽകും. 

പോസ്​റ്റുമോർട്ടം റി​പ്പോർട്ട്​ ലഭിച്ചതിനുശേഷം വിശദമായ അന്വേഷണം നടത്തുമെന്ന്​ സൗത്ത്​ പൊലീസ്​ പറഞ്ഞു. ബന്ധുക്കൾ പറഞ്ഞതുപോലെ കൊരണ്ടിപ്പലക തലയിൽവീണതെന്നാണ്​ പ്രാഥമികനിഗമനം. മൂന്ന്​ പെൺമക്കളും ഒരാണുമാണുള്ളത്​. പെൺമക്കളെ കെട്ടിച്ചയച്ചതോടെ മകന്‍റെ കൂടെയായിരുന്നു താമസം. എന്നാൽ മരണത്തിൽ അസ്വഭാവികതയുണ്ടെന്നാണ് നാട്ടുകാർ പരാതിപ്പെടുന്നത്.