സ്വന്തമായി വീട് വാങ്ങുമ്പോൾ കയ്യിലുള്ള സമ്പാദ്യം ഡൗൺ പേയ്മെന്റിനായി ഉപയോഗിക്കണോ അതോ നിക്ഷേപം തുടരണോ എന്ന ആശയക്കുഴപ്പം നമ്മളിൽ പലർക്കുമുണ്ട്. വീട് വാങ്ങാനുള്ള സമയപരിധി, റിസ്ക് , മറഞ്ഞിരിക്കുന്ന ചെലവുകൾ എന്നിവ പരിഗണിച്ച് എങ്ങനെ ശരിയായ സാമ്പത്തിക തീരുമാനം എടുക്കാമെന്ന് നോക്കാം.
ഭൂരിഭാഗം ഇന്ത്യക്കാര്ക്കും സ്വന്തമായി ഒരു വീട് വാങ്ങുക എന്നത് ജീവിതത്തിലെ ഏറ്റവും വലിയ സാമ്പത്തിക ലക്ഷ്യങ്ങളിലൊന്നാണ്. എന്നാല് ഇവിടെ പലര്ക്കുമുണ്ടാകുന്ന ഒരു പ്രധാന ആശയക്കുഴപ്പമുണ്ട്. കയ്യിലുള്ള സമ്പാദ്യം നിക്ഷേപിക്കുകയാണോ വേണ്ടത്, അതോ മറ്റ് നിക്ഷേപങ്ങളെല്ലാം നിര്ത്തിവച്ച് ആ തുക വീടിന്റെ ഡൗണ് പേയ്മെന്റിനായി മാറ്റിവെക്കുന്നതാണോ നല്ലത്? ഇതിനൊരു ഒറ്റവരി ഉത്തരമില്ല എന്നതാണ് സത്യം. നിങ്ങള് എപ്പോള് വീട് വാങ്ങാന് ഉദ്ദേശിക്കുന്നു, നിലവില് നിങ്ങളുടെ കയ്യില് എത്ര പണമുണ്ട് എന്നതിനെ ആശ്രയിച്ചിരിക്കും ഇതിന്റെ ശരിയായ ഉത്തരം. ശരിയായ തീരുമാനമെടുക്കാന് താഴെ പറയുന്ന കാര്യങ്ങള് ശ്രദ്ധിക്കാം.
എത്ര വര്ഷത്തിനുള്ളില് വീട് ?
ആദ്യത്തെ ചോദ്യം സമയ പരിധിയെക്കുറിച്ചാണ്. അടുത്ത രണ്ടോ മൂന്നോ വര്ഷത്തിനുള്ളില് വീട് വാങ്ങാനാണ് നിങ്ങള് പ്ലാന് ചെയ്യുന്നതെങ്കില്, ഡൗണ് പേയ്മെന്റിനുള്ള തുക ഇക്വിറ്റി മ്യൂച്വല് ഫണ്ടുകളിലോ ഓഹരി വിപണിയിലോ നിക്ഷേപിക്കുന്നത് അപകടകരമാണ്. നിങ്ങള്ക്ക് പണം ഏറ്റവും അത്യാവശ്യമുള്ള സമയത്ത് ഒരു പക്ഷെ വിപണി ഇടിഞ്ഞേക്കാം. സാമ്പത്തിക ലക്ഷ്യങ്ങള്, പണത്തിന്റെ ആവശ്യകത, റിസ്ക് എടുക്കാനുള്ള കഴിവ്, നിക്ഷേപ കാലാവധി എന്നിവയ്ക്ക് അനുസൃതമായി വേണം നിക്ഷേപങ്ങള് തിരഞ്ഞെടുക്കാന് എന്ന് സെബി നിര്ദ്ദേശിക്കുന്നുണ്ട്.
ഇത്തരം സാഹചര്യങ്ങളില് സുരക്ഷിതവും എളുപ്പത്തില് പിന്വലിക്കാന് സാധിക്കുന്നതുമായ മാര്ഗങ്ങളില് പണം നിക്ഷേപിക്കുന്നതാണ് ബുദ്ധി. ഡൗണ് പേയ്മെന്റ് തുകയില് നിന്ന് വലിയ ലാഭം ഉണ്ടാക്കുക എന്നതല്ല, മറിച്ച് നിങ്ങള്ക്ക് അനുയോജ്യമായ പ്രോപ്പര്ട്ടി കണ്ടെത്തുമ്പോള് കൃത്യസമയത്ത് പണം ലഭ്യമാക്കുക എന്നതാണ് ഇവിടുത്തെ ലക്ഷ്യം. അല്ലാത്തപക്ഷം, വിപണിയിലുണ്ടാകുന്ന പെട്ടെന്നുള്ള ഇടിവ് കാരണം വീട് വാങ്ങുന്നത് നീട്ടിവെക്കേണ്ടി വരികയോ അല്ലെങ്കില് പദ്ധതിയിട്ടതിലും കൂടുതല് തുക കടമെടുക്കേണ്ടി വരികയോ ചെയ്തേക്കാം.
Related Articles
ദീര്ഘകാല പ്ലാന് ആണെങ്കില്?
നിങ്ങള് വീട് വാങ്ങാന് 5, 7 അല്ലെങ്കില് 10 വര്ഷം വരെ സമയമെടുക്കുമെങ്കില് കാര്യങ്ങള് മാറും. നിക്ഷേപത്തിന് കൂടുതല് സമയമുള്ളതുകൊണ്ട് തന്നെ, നിങ്ങളുടെ റിസ്ക് എടുക്കാനുള്ള കഴിവിനനുസരിച്ച് നല്ല വളര്ച്ച നല്കുന്ന പദ്ധതികളില് നിക്ഷേപിക്കാവുന്നതാണ്. നേരത്തെ തന്നെ നിക്ഷേപം തുടങ്ങുന്നതും കൃത്യമായി നിക്ഷേപം തുടരുന്നതും വിപണിയിലെ ചാഞ്ചാട്ടങ്ങളെ മറികടക്കാന് സഹായിക്കുമെന്ന് സെബിയും വ്യക്തമാക്കുന്നു.
സമ്പാദ്യം മുഴുവന് ഡൗണ് പേയ്മെന്റിനായി മാറ്റണോ?
നിങ്ങളുടെ മുഴുവന് നിക്ഷേപങ്ങളും ഭാവിയില് വീടിന്റെ ഡൗണ് പേയ്മെന്റിനുള്ളതാണെന്ന് ഒരിക്കലും തെറ്റിദ്ധരിക്കരുത്. വീട് വാങ്ങാനായി കയ്യിലുള്ളതെല്ലാം വിറ്റഴിച്ചാല്, റിട്ടയര്മെന്റ് കാലത്തേക്കോ അത്യാവശ്യ ഘട്ടങ്ങളിലേക്കോ മറ്റ് ആവശ്യങ്ങള്ക്കോ നിങ്ങളുടെ കയ്യില് പണമില്ലാത്ത അവസ്ഥയുണ്ടാകും. വീട് എന്നത് മികച്ചൊരു ആസ്തി തന്നെയാണ്. എന്നാല് അത് പെട്ടെന്ന് പണമാക്കി മാറ്റാന് കഴിയുന്ന സമ്പാദ്യങ്ങള്ക്കും ദീര്ഘകാല നിക്ഷേപങ്ങള്ക്കും പകരമാവില്ല.
മറഞ്ഞിരിക്കുന്ന മറ്റ് ചെലവുകള്
ഡൗണ് പേയ്മെന്റ് എന്നത് വീട് വാങ്ങുമ്പോള് വരുന്ന ചെലവിന്റെ ഒരു ഭാഗം മാത്രമാണ്. റജിസ്ട്രേഷന്, സ്റ്റാമ്പ് ഡ്യൂട്ടി, ഇന്റീരിയര് വര്ക്കുകള്, സാധനങ്ങള് മാറ്റുന്നതിനുള്ള ചെലവ്, അറ്റകുറ്റപ്പണികള് തുടങ്ങിയവയ്ക്കും പണം കണ്ടെത്തേണ്ടതുണ്ട്. അതുകൊണ്ട് തന്നെ വീടിനായുള്ള ഫണ്ടില് നിന്ന് മാറി, ഒരു എമര്ജന്സി ഫണ്ട് എപ്പോഴും കരുതിവെക്കേണ്ടത് അത്യാവശ്യമാണ്. അല്ലെങ്കില് വീട് വാങ്ങിയതിന് തൊട്ടുപിന്നാലെ വരുന്ന വലിയ ചെലവുകള് നിങ്ങളെ ക്രെഡിറ്റ് കാര്ഡുകളിലേക്കോ ഉയര്ന്ന പലിശയുള്ള മറ്റ് വായ്പകളിലേക്കോ തള്ളിവിട്ടേക്കാം.
ഇഎംഐയും ബാധ്യതകളും
ഭാവിയില് നിങ്ങള് അടയ്ക്കേണ്ട ഇഎംഐ തുകയും ഈ തീരുമാനത്തെ സ്വാധീനിക്കണം. ഡൗണ് പേയ്മെന്റായി വലിയൊരു തുക നല്കുന്നത് വായ്പാ തുക കുറയ്ക്കാന് സഹായിക്കും. എന്നാല് ഇതിനായി സമ്പാദ്യം മുഴുവന് വറ്റിക്കുന്നത് ബുദ്ധിയല്ല. നിക്ഷേപങ്ങളെല്ലാം നിര്ത്തി വെക്കാതെ തന്നെ ഇഎംഐ, വീട്ടുചെലവുകള്, മറ്റ് അപ്രതീക്ഷിത ചെലവുകള് എന്നിവ കൈകാര്യം ചെയ്യാനുള്ള സാമ്പത്തിക സ്വാതന്ത്ര്യം നിങ്ങള്ക്ക് ഉണ്ടായിരിക്കണം.
