ഭീകരതയ്ക്ക് ഉചിതമായ മറുപടി നൽകാൻ മോദി വീണ്ടും പ്രധാനമന്ത്രിയാകണം: അമിത് ഷാ
'രാഘവേന്ദ്രയെ പാർലമെന്റിലേക്ക് അയയ്ക്കുക എന്ന് മാത്രമല്ല ഈ തെരഞ്ഞെടുപ്പിന്റെ ലക്ഷ്യം, മറിച്ച് നരേന്ദ്ര മോദിയെ വീണ്ടും പ്രധാനമന്ത്രിപദത്തിലെത്തിക്കുക എന്നതും കൂടിയാണ്.' അമിത് ഷാ പറയുന്നു.
ബംഗളൂരു: നരേന്ദ്രമോദി വീണ്ടും അധികാരത്തിൽ തിരികെയെത്തണമെന്നും പാകിസ്ഥാനും ഭീകരതയ്ക്കും ഉചിതമായ മറുപടി നൽകണമെന്നും ബിജെപി ദേശീയ അധ്യക്ഷൻ അമിത്ഷാ. രാജ്യസുരക്ഷയ്ക്ക് അത് അത്യാവശ്യമാണെന്നും അമിത് ഷാ കൂട്ടിച്ചേർത്തു. കർണാടകയിലെ ഷിമോഗയിൽ തെരഞ്ഞെടുപ്പ് റാലിയിൽ സംസാരിക്കുകയായിരുന്നു അമിത് ഷാ. കർണാടക ബിജെപി പ്രസിഡന്റും മുൻ മുഖ്യമന്ത്രിയുമായ ബിഎസ് യെദ്യൂരപ്പയുടെ മകൻ രാഘവേന്ദ്രയുടെ തെരഞ്ഞെടുപ്പ് പ്രചരണത്തോട് അനുബന്ധിച്ചായിരുന്നു അമിത് ഷായുടെ പ്രസംഗം.
''രാഘവേന്ദ്രയെ പാർലമെന്റിലേക്ക് അയയ്ക്കുക എന്ന് മാത്രമല്ല ഈ തെരഞ്ഞെടുപ്പിന്റെ ലക്ഷ്യം, മറിച്ച് നരേന്ദ്ര മോദിയെ വീണ്ടും പ്രധാനമന്ത്രിപദത്തിലെത്തിക്കുക എന്നതും കൂടിയാണ്. എന്തുകൊണ്ടാണ് മോദി വീണ്ടും അധികാരത്തിലെത്തണമെന്ന് നാം ആഗ്രഹിക്കുന്നത്? അതിന്റെ കാരണം രാജ്യത്തിന്റെ സുരക്ഷയാണ് പ്രധാനം. ഭീകരതയ്ക്കും പാകിസ്ഥാനും ഉചിതമായ മറുപടി നൽകാൻ മോദിക്ക് സാധിക്കും. അതിനാൽ താമരയ്ക്ക് വോട്ട് ചെയ്ത് ഷിമോഗയിലെ ജനങ്ങൾ രാഘവേന്ദ്രയെ പാർലമെന്റിലേക്ക് അയയ്ക്കണം.'' അമിത് ഷാ പറഞ്ഞു.