ബിഹാറിൽ കനയ്യക്കായി സൈക്കിളില് തെരഞ്ഞെടുപ്പ് പ്രചാരണം നടത്തി ജിഗ്നേഷ് മേവാനി
ഇത് സംബന്ധിച്ച വീഡിയോ ജിഗ്നേഷ് തന്നെയാണ് സാമൂഹ്യമാധ്യമങ്ങളിൽ പങ്കുവച്ചത്. ഡേവിഡും ഗോലിയാത്തും തമ്മിലുള്ള അങ്കത്തിനായി യുദ്ധഭൂമി തയ്യാറായിക്കഴിഞ്ഞെന്ന അടിക്കുറിപ്പോടെയാണ് ജിഗ്നേഷ് വീഡിയോ പോസ്റ്റ് ചെയ്തത്.
പട്ന: ബിഹാറിലെ ബെഗുസരായില് സിപിഐ ടിക്കറ്റിൽ മത്സരിക്കുന്ന കനയ്യ കുമാറിന് വേണ്ടി സൈക്കിളില് പ്രചാരണം നടത്തി ഗുജറാത്ത് എംഎല്എ ജിഗ്നേഷ് മേവാനി. ഇത് സംബന്ധിച്ച വീഡിയോ ജിഗ്നേഷ് തന്നെയാണ് സാമൂഹ്യമാധ്യമങ്ങളിൽ പങ്കുവച്ചത്. ഡേവിഡും ഗോലിയാത്തും തമ്മിലുള്ള അങ്കത്തിനായി യുദ്ധഭൂമി തയ്യാറായിക്കഴിഞ്ഞെന്ന അടിക്കുറിപ്പോടെയാണ് ജിഗ്നേഷ് വീഡിയോ പോസ്റ്റ് ചെയ്തത്.
ലോക്സഭാ തെരഞ്ഞെടുപ്പിൽ സിപിഐ സ്ഥാനാര്ത്ഥിയായി കനയ്യകുമാറിനെ പ്രഖ്യാപിച്ചത് മുതൽ പ്രചാരണത്തിനായി ബെഗുസാരയിൽ ജിഗ്നേഷ് മേവാനിയുണ്ട്. പ്രധാനമന്ത്രി നരേന്ദ്ര മോദിക്ക് ‘ബായ്’ പറയുകയും കനയ്യ കുമാറിന് സ്വാഗതം പറഞ്ഞുമാണ് ജിഗ്നേഷ് തെരഞ്ഞെടുപ്പ് പ്രചാരണം ആരംഭിച്ചത്.
തങ്ങള് ധാന്യങ്ങളും ഉരുളക്കിഴങ്ങും അരിഭക്ഷണവും കഴിച്ച് കനയ്യയുടെ വിജയം ഉറപ്പുവരുത്തുമെന്ന് നേരത്തെ ജിഗ്നേഷ് ട്വീറ്റ് ചെയ്തിരുന്നു. കനയ്യയെ തനിക്ക് പാര്ലമെന്റില് കാണണമെന്നും അതിനാൽ കനയ്യ കുമാറിന്റെ ക്രൗഡ് ഫണ്ടിലേക്ക് സംഭാവന ചെയ്യാണമെന്നും ജിഗ്നേഷ് ആഹ്വാനം ചെയ്തിരുന്നു.