ഏപ്രിൽ 26 ന് പ്രധാനമന്ത്രി നരേന്ദ്ര മോദി വാരണാസിയിൽ നാമനിർദ്ദേശ പത്രിക സമർപ്പിക്കും
ഏപ്രിൽ 25 ന് സംഘടിപ്പിക്കുന്ന റോഡ് ഷോയ്ക്ക് ശേഷമായിരിക്കും മോദി സ്വന്തം മണ്ഡലത്തിൽ നാമനിർദ്ദേശ പത്രിക സമർപ്പിക്കുക. അമിത് ഷാ, നിതിൻ ഗഡ്കരി, രാജ്നാഥ് സിംഗ് എന്നിവർ തെരഞ്ഞെടുപ്പ് റാലിയിൽ സംബന്ധിക്കും.
ദില്ലി: പതിനേഴാം ലോക്സഭാ തെരഞ്ഞെടുപ്പിൽ പ്രധാനമന്ത്രി പദത്തിലേക്ക് രണ്ടാമൂഴത്തിനൊരുങ്ങുന്ന നരേന്ദ്ര മോദി വാരണാസിയിൽ നിന്നും നാമനിർദ്ദേശ പത്രിക സമർപ്പിക്കും. ഏപ്രിൽ 25 ന് സംഘടിപ്പിക്കുന്ന തെരഞ്ഞെടുപ്പ് റാലിയ്ക്ക് ശേഷമായിരിക്കും മോദി സ്വന്തം മണ്ഡലത്തിൽ നാമനിർദ്ദേശ പത്രിക സമർപ്പിക്കുക. അമിത് ഷാ, നിതിൻ ഗഡ്കരി, രാജ്നാഥ് സിംഗ് എന്നിവർ തെരഞ്ഞെടുപ്പ് റാലിയിൽ സംബന്ധിക്കും. വിവിധ സംസ്ഥാനങ്ങളിലെ ബിജെപിയുടം തെരഞ്ഞെടുപ്പ് റാലികളിലും പ്രചാരണത്തിലും സജീവ പ്രവർത്തനമാണ് പ്രധാനമന്ത്രി കാഴ്ച വയ്ക്കുന്നത്.
കോൺഗ്രസിനെയും മറ്റ് പ്രതിപക്ഷകക്ഷികളെയും നിശിതമായി വിമർശിച്ചും കടന്നാക്രമിച്ചുമാണ് മോദിയുടെ ഓരോ തെരഞ്ഞെടുപ്പ് പ്രചാരണ പ്രസംഗങ്ങളും. പാവങ്ങൾക്ക് വേണ്ടി ക്ഷേമപ്രവർത്തനം നടത്താൻ കോൺഗ്രസിനും തൃണമൂലിനും സാധിച്ചിട്ടില്ലെന്നാണ് ത്രിപുരയിൽ സംഘടിപ്പിച്ച റാലിയിൽ അദ്ദേഹം പ്രസംഗിച്ചത്. കഴിഞ്ഞ ആഴ്ച പുറത്തിറക്കിയ തെരഞ്ഞെടുപ്പ് പ്രകടന പത്രികയിൽ രാജ്യസുരക്ഷയും കാർഷിക പ്രതിസന്ധിയുടെ പരിഹാരവുമാണ് പ്രധാന ലക്ഷ്യങ്ങളെന്ന് മോദി വ്യക്തമാക്കിയിരുന്നു. മെയ് 19 നാണ് വാരണാസിയിൽ തെരഞ്ഞെടുപ്പ് നടക്കുന്നത്.