സോണിയ ഗാന്ധിയ്ക്ക് ഇന്ത്യയോട് യഥാർത്ഥ സ്നേഹം ഇല്ല; മുന്‍ കോൺഗ്രസ് എംപി കൃഷ്ണകുമാർ
സോണിയ ഗാന്ധിയ്ക്ക് ഇന്ത്യയോട് യഥാർത്ഥ സ്നേഹം ഇല്ലെന്നും അവർക്ക് ഇന്ത്യൻ പാരമ്പ്യത്തെക്കുറിച്ച് ഒരറിവുമില്ലെന്നും കൃഷ്ണകുമാർ പറഞ്ഞു.
ദില്ലി: യുപിഎ അധ്യക്ഷ സോണിയ ഗാന്ധിയെ രൂക്ഷമായി വിമർശിച്ച് മുൻ കേന്ദ്രമന്ത്രിയും കോൺഗ്രസ് നേതാവുമായ ഡോ. എസ് കൃഷ്ണകുമാർ. സോണിയ ഗാന്ധിയ്ക്ക് ഇന്ത്യയോട് യഥാർത്ഥ സ്നേഹം ഇല്ലെന്നും അവർക്ക് ഇന്ത്യൻ പാരമ്പ്യത്തെക്കുറിച്ച് ഒരറിവുമില്ലെന്നും കൃഷ്ണകുമാർ പറഞ്ഞു. കോൺഗ്രസ് വിട്ട് ബിജെപിയിലേക്ക് ചേരുന്നതിനിടെയായിരുന്നു കൃഷ്ണകുമാറിന്റെ പരാമർശം. ബിജെപി നേതാക്കളായ ഷാനവാസ് ഹുസൈൻ, അനിൽ ബലൂനി എന്നിവരുടെ സാന്നിധ്യത്തിലായിരുന്നു പാർട്ടിയിൽ ചേർന്നത്.
താൻ മൂന്ന് തവണ കോൺഗ്രസ് ടിക്കറ്റിൽ മത്സരിച്ച് എംപി ആയിട്ടുണ്ട്. യുപിഎയുടെ ഭരണക്കാലത്ത് സോണിയ ഗാന്ധിയുടെ നേതൃത്വത്തെയും ഇപ്പോൾ രാഹുൽ ഗാന്ധിയുടെ നേതൃത്വത്തെയും പൂർണ്ണമായും എതിർക്കുന്നു. രാജീവ് ഗാന്ധിയുമായി വളരെ അടുത്ത ബന്ധമുണ്ട്. എന്നാൽ അദ്ദേഹത്തിന്റെ മരണശേഷം ഇന്ത്യ ഭരിക്കേണ്ടയാള്‍ പ്രധാനമന്ത്രി നരേന്ദ്ര മോദിയാണെന്ന് തോന്നിയിരുന്നതായും കൃഷ്ണകുമാർ പറഞ്ഞു.
ഒരു വികസന പ്രവർത്തകൻ എന്ന നിലയിൽ, പ്രധാനമന്ത്രി നരേന്ദ്ര മോദിയുടെ വിജ്ഞാനത്തെയും, ശ്രദ്ധയെയും രാഷ്ട്രീയ ഇച്ഛാശക്തിയെയും ഞാൻ അഭിനന്ദിക്കുന്നു. നരേന്ദ്ര മോദിയുടെ പടയാളിയായി തന്റെ ജീവിതം കഴിച്ചുകൂട്ടാൻ ആഗ്രഹിക്കുന്നതായും അദ്ദേഹം കൂട്ടിച്ചേർത്തു.
