റായ്ബറേലിയിൽ സോണിയ ഗാന്ധി നാളെ പത്രിക സമർപ്പിക്കും
2004-മുതൽ മണ്ഡലത്തെ പ്രതിനിധീകരിക്കുന്ന സോണിയ ഗാന്ധി ഇത്തവണ ബിജെപിയുടെ ദിനേശ് പ്രതാപ് സിംഗിനെയാണ് നേരിടുന്നത്. കോൺഗ്രസിൽനിന്ന് അടുത്തിടെ രാജിവെച്ച് ബിജെപിയിൽ ചേർന്നയാളാണ് ദിനേശ് പ്രതാപ് സിംഗ്.
ലഖ്നൗ: കോൺഗ്രസ് നേതാവും യുപിഎ അധ്യക്ഷയുമായ സോണിയ ഗാന്ധി ഉത്തർപ്രദേശിലെ റായ്ബറേലി ലോക്സഭാ മണ്ഡലത്തിൽ വ്യാഴാഴ്ച പത്രിക സമർപ്പിക്കും. 2004-മുതൽ മണ്ഡലത്തെ പ്രതിനിധീകരിക്കുന്ന സോണിയ ഗാന്ധി ഇത്തവണ ബിജെപിയുടെ ദിനേശ് പ്രതാപ് സിംഗിനെയാണ് നേരിടുന്നത്. കോൺഗ്രസിൽനിന്ന് അടുത്തിടെ രാജിവെച്ച് ബിജെപിയിൽ ചേർന്നയാളാണ് ദിനേശ് പ്രതാപ് സിംഗ്.
2004, 2006 ഉപതെരഞ്ഞെടുപ്പിലും 2009, 2014 ലോക്സഭാ തെരഞ്ഞെടുപ്പിലും സോണിയ ഗാന്ധി ഇതേ മണ്ഡലത്തിലാണ് മത്സരിച്ച് വിജയിച്ചത്. 2014-ലെ തെരഞ്ഞെടുപ്പിൽ 15.94 ലക്ഷം വോട്ടർമാരുള്ള റായ്ബറേലി മണ്ഡലത്തിൽനിന്ന് 5,26,434 വോട്ട് നേടിയാണ് സോണിയ ഗാന്ധി വിജയിച്ചത്. അതേസമയം മണ്ഡലത്തിൽ എസ്പി, ബിഎസ്പി തുടങ്ങിയ രാഷ്ട്രീയ പാർട്ടികൾ സ്ഥാനാർത്ഥികളെ പ്രഖ്യാപിച്ചിട്ടില്ല. മണ്ഡലത്തിൽ മെയ് ആറിനാണ് തെരഞ്ഞെടുപ്പ് നടക്കുക.
