അനീതി ചെയ്യുന്ന കോൺഗ്രസ് എങ്ങനെ നീതി നടപ്പാക്കും; യോഗി ആദിത്യനാഥ്
കോൺഗ്രസ് അതിന്റെ ഡിഎൻഎയെക്കുറിച്ച് തന്നെ നുണയാണ് പറയുന്നതെന്നും അനീതി ചെയ്യുന്ന കോൺഗ്രസ് എങ്ങനെ ന്യായ് നടപ്പാക്കുമെന്നും യോഗി ആദിത്യനാഥ് ചോദിച്ചു.
ലഖ്നൗ: ലോക്സഭാ തെരഞ്ഞെടുപ്പിൽ കോൺഗ്രസിന്റെ പ്രചാരണവാചകമായ 'അബ് ഹോഗാ ന്യായ്' (നിങ്ങൾക്ക് ഇനി നീതി ലഭിക്കും) എന്ന മുദ്രാവാക്യത്തെ രൂക്ഷമായി വിമർശിച്ച് ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. കോൺഗ്രസ് അതിന്റെ ഡിഎൻഎയെക്കുറിച്ച് തന്നെ നുണയാണ് പറയുന്നതെന്നും അനീതി ചെയ്യുന്ന കോൺഗ്രസ് എങ്ങനെ ന്യായ് നടപ്പാക്കുമെന്നും യോഗി ആദിത്യനാഥ് ചോദിച്ചു. ഉത്തർപ്രദേശിൽ നടന്ന തെരഞ്ഞെടുപ്പ് യോഗത്തിൽ പങ്കെടുത്ത് സംസാരിക്കുകയായിരുന്നു അദ്ദേഹം.
കോൺഗ്രസ് പറയുന്നത് അവർ നീതി നടപ്പിലാക്കുമെന്നാണ്. എന്നാൽ ജനങ്ങളോട് എല്ലായ്പ്പോഴും അനീതി ചെയ്യുന്ന കോൺഗ്രസിന് എങ്ങനെയാണ് നീതി നടപ്പിലാക്കാനാകുക. ബിജെപി സർക്കാരിന്റെ അഞ്ച് വർഷത്തെ ഭരണം 55 വർഷത്തെ കോൺഗ്രസ് ഭരണവുമായി മാത്രമേ താരതമ്യം ചെയ്യാനാകുകയുള്ളു. അതുപോലെ രണ്ട് വർഷത്തെ ഉത്തർപ്രദേശ് സർക്കാരിന്റെ ഭരണം 17 വർഷത്തെ എസ്പി-ബിഎസ്പി ഭരണവുമായെ താരതമ്യം ചെയ്യാനാകുകയുള്ളുവെന്നും യോഗി ആദിത്യനാഥ് പറ‍ഞ്ഞു.
കോൺഗ്രസ് ഭരണക്കാലത്ത് പാകിസ്ഥാൻ ഭീകരർ ഇന്ത്യൻ ജവാൻമാരുടെ തലയെടുക്കുമായിരുന്നു. എന്നാൽ ഇപ്പോൾ അങ്ങനെയല്ല, പട്ടാളക്കാർ രക്തസാക്ഷികളാകുമ്പോൾ, നമ്മൾ പാകിസ്ഥാനിലേക്ക് കടന്ന് പ്രതികാരം ചെയ്യുമെന്നും അദ്ദേഹം കൂട്ടിച്ചേർത്തു.
