തീവ്രവാദികളും നക്സലുകളും ബിജെപി സർക്കാരിനെ ഭയപ്പെടുന്നു; യോഗി ആദിത്യനാഥ്
കഴിഞ്ഞ കുറച്ച് മാസങ്ങൾക്കുള്ളിൽ കോൺഗ്രസ് സർക്കാർ ഛത്തിസ്ഗഢിലെ എല്ലാ സംവിധാനങ്ങളും താറുമാറാക്കിയെന്നും യോഗി ആദിത്യനാഥ് കുറ്റപ്പെടുത്തി.
റായ്പൂർ: തീവ്രവാദികളും നക്സലുകളും ബിജെപി സർക്കാരിനെ ഭയപ്പെടുന്നുവെന്ന് ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. ഭയം കാരണമാണ് അവർ ബിജെപിയുടെ കീഴിലുള്ള പ്രദേശങ്ങളിൽ അടുക്കാത്തതെന്നും ആദിത്യനാഥ് പറഞ്ഞു. റായ്പൂരിൽ തെരഞ്ഞെടുപ്പ് റാലിയിൽ സംസാരിക്കുകയായിരുന്നു അദ്ദേഹം.
ഭീകരവാദികളും നക്സലുകളും ബിജെപിയുടെ ഭരണത്തിൻ കീഴിലുള്ള സ്ഥലങ്ങളിൽ പ്രവേശിക്കില്ല. കാരണം ജയിലിലടക്കപ്പെടുമെന്നോ അല്ലെങ്കിൽ കൊല്ലപ്പെടുമെന്നോ അവർക്ക് ഉറപ്പാണെന്നും യോഗി പറഞ്ഞു. മുൻ പ്രധാനമന്ത്രി മൻമോഹൻ സിങ് മുസ്ലീംങ്ങളെയും മറ്റ് മതങ്ങളെയും തമ്മിൽ വേർതിരിച്ചെന്നും യോഗി ആരോപിച്ചു.
കഴിഞ്ഞ കുറച്ച് മാസങ്ങൾക്കുള്ളിൽ കോൺഗ്രസ് സർക്കാർ ഛത്തിസ്ഗഢിലെ എല്ലാ സംവിധാനങ്ങളും താറുമാറാക്കിയെന്നും യോഗി ആദിത്യനാഥ് കുറ്റപ്പെടുത്തി. 55-60 വർഷത്തെ ഭരണത്തിലൂടെ കോൺഗ്രസ് സർക്കാർ രാജ്യത്തെ കട്ടുമുടിച്ചു, ദാരിദ്ര്യത്തിൽ ആഴ്ത്തി, വർഗീയത വളർത്തി, തീവ്രവാദികളും നക്സലുകളും രാജ്യത്ത് വേരുറപ്പിച്ചത് ഇക്കാലത്താണെന്നും ആദിത്യനാഥ് കുറ്റപ്പെടുത്തി.