ഇന്ത്യയിൽ റിലയൻസ് ജിയോയോട് മത്സരിക്കാൻ സ്റ്റാർലിങ്ക് ഇന്റർനെറ്റ് നിരക്കുകൾ കുറയ്ക്കുമെന്ന് ഇലോൺ മസ്ക്. ഉപഗ്രഹ ഇന്റർനെറ്റ് വിപണിയിൽ ആധിപത്യം സ്ഥാപിക്കാൻ ജിയോയും പുതിയ പദ്ധതികൾ തയ്യാറാക്കുന്നുണ്ട്. ഇരു കമ്പനികളും കേന്ദ്ര സർക്കാരിന്റെ അന്തിമ സുരക്ഷാ അനുമതിക്കായി കാത്തിരിക്കുകയാണ്.
ഇന്ത്യയിൽ റിലയൻസ് ജിയോയുടെ കുറഞ്ഞ നിരക്കിലുള്ള ഇന്റർനെറ്റ് സേവനങ്ങളോട് മത്സരിക്കണമെങ്കിൽ സ്റ്റാർലിങ്കിന്റെ നിരക്ക് സാധാരണക്കാർക്ക് താങ്ങാനാകുന്ന രീതിയിലാക്കേണ്ടിവരുമെന്ന് ഇലോൺ മസ്ക്. ഇന്ത്യയിലെ വിപണിയിൽ ശക്തമായ സാന്നിധ്യം ഉറപ്പാക്കാൻ നിരക്കുകൾ പ്രാദേശിക സാഹചര്യങ്ങൾക്ക് അനുസൃതമായി നിശ്ചയിക്കേണ്ടതുണ്ടെന്ന സൂചനയാണ് സ്പേസ് എക്സ് മേധാവിയുടെ പുതിയ പ്രതികരണം നൽകുന്നത്.
സ്റ്റാർലിങ്കിന് ജിയോയുടെ കുറഞ്ഞ നിരക്കുകളോട് മത്സരിക്കാനാകില്ലെന്ന വാദങ്ങളോട് സമൂഹമാധ്യമമായ എക്സിലൂടെയാണ് മസ്ക് പ്രതികരിച്ചത്. സ്റ്റാർലിങ്ക് ചെലവേറിയതാണെങ്കിൽ ഇന്ത്യയിൽ ആരും അത് വാങ്ങില്ലെന്നും അതിനാൽ നിരക്കുകൾ താങ്ങാനാകുന്ന രീതിയിലാക്കേണ്ടത് സ്പേസ് എക്സിന്റെ ഉത്തരവാദിത്തമാണെന്നും അദ്ദേഹം വ്യക്തമാക്കി. മത്സരം ശക്തമാകുന്നത് ഇന്ത്യൻ ഉപഭോക്താക്കൾക്ക് കൂടുതൽ തിരഞ്ഞെടുപ്പുകൾ നൽകുമെന്നും മസ്ക് ചൂണ്ടിക്കാട്ടി. എന്നാൽ ഇന്ത്യയിലെ സ്റ്റാർലിങ്ക് സേവനത്തിന്റെ നിരക്കുകളോ ഔദ്യോഗിക ലോഞ്ച് തീയതിയോ മസ്ക് ഇതുവരെ പ്രഖ്യാപിച്ചിട്ടില്ല.
ഇന്ത്യയിലെ ഇന്റർനെറ്റ് നിരക്കുകളെക്കുറിച്ച് ചർച്ച
ഇന്ത്യയിൽ ഇന്റർനെറ്റ് നിരക്കുകൾ കുറവാണെന്ന വാദം പ്രധാനമായും മൊബൈൽ ഡാറ്റയെ അടിസ്ഥാനമാക്കിയുള്ളതാണെന്ന അഭിപ്രായം ഉയർന്നതിനു പിന്നാലെയാണ് മസ്കിന്റെ പ്രതികരണം. മാക്33 ഫിനാൻഷ്യൽ ഗ്രൂപ്പ് സ്ഥാപകൻ ആരൺ ബർണറ്റിന്റെ എക്സിലെ കുറിപ്പിനോടായിരുന്നു മസ്‍ക്ന്റെ പ്രതികരണം. ഇന്ത്യയിലെ മൊബൈൽ ഉപയോക്താക്കൾ പ്രതിമാസം ഏകദേശം 30 മുതൽ 40 ജിബി വരെ ഡാറ്റ ഉപയോഗിക്കുമ്പോൾ, വീടുകളിലെ ഫൈബർ ബ്രോഡ്ബാൻഡ് കണക്ഷനുകളിൽ ഇത് ഏകദേശം 300 ജിബി വരെയാകാമെന്നാണ് ബർണറ്റ് ചൂണ്ടിക്കാട്ടിയത്. കുറഞ്ഞ നിരക്കിലുള്ള ബ്രോഡ്ബാൻഡ് ബദലുകൾ കൂടുതൽ കുടുംബങ്ങളെ സ്ഥിരം ഇന്റർനെറ്റ് കണക്ഷനുകളിലേക്ക് ആകർഷിക്കുമെന്നും അദ്ദേഹം അഭിപ്രായപ്പെട്ടു.
Related Articles
ഭൂമിയോട് അടുത്ത ഭ്രമണപഥത്തിലുള്ള ഉപഗ്രഹങ്ങൾ ഉപയോഗിച്ചാണ് സ്റ്റാർലിങ്ക് ഇന്റർനെറ്റ് സേവനം നൽകുന്നത്. ഫൈബർ കേബിളുകൾ സ്ഥാപിക്കാനോ മൊബൈൽ ടവറുകൾ നിർമിക്കാനോ ബുദ്ധിമുട്ടുള്ള വിദൂര പ്രദേശങ്ങളിൽ ഉപഗ്രഹ ഇന്റർനെറ്റ് പ്രയോജനപ്പെടും. എന്നാൽ ഇന്ത്യയിൽ കൂടുതൽ ഉപയോക്താക്കളെ ആകർഷിക്കാൻ നിലവിലുള്ള സേവനങ്ങളേക്കാൾ എത്രത്തോളം മത്സരാധിഷ്ഠിതമായിരിക്കും നിരക്കുകൾ എന്നത് നിർണായകമാകും.
ഉപഗ്രഹ ഇന്റർനെറ്റ് രംഗത്തേക്ക് ജിയോയും
മസ്കിന്റെ പ്രതികരണം പുറത്തുവരുന്നതിനിടെ ഉപഗ്രഹ ഇന്റർനെറ്റ് മേഖലയിലേക്കുള്ള പ്രവേശനത്തിനും റിലയൻസ് ജിയോ ഒരുങ്ങുകയാണ്. ഇന്ത്യ മൊബൈൽ കോൺഗ്രസ് 2026ൽ ഏകദേശം 1,600 ഭ്രമണപഥ ഉപഗ്രഹങ്ങളും രാജ്യത്തുടനീളം 23 ഗ്രൗണ്ട് സ്റ്റേഷനുകളും ഉൾപ്പെടുന്ന നിർദിഷ്ട ശൃംഖലയുടെ രൂപരേഖ കമ്പനി അവതരിപ്പിച്ചിരുന്നു. 600,000ത്തിലധികം ഗ്രാമങ്ങളിലേക്ക് കണക്റ്റിവിറ്റി വ്യാപിപ്പിക്കുകയാണ് ജിയോയുടെ ലക്ഷ്യം.
വിദൂര ദ്വീപുകൾ, അതിർത്തി പ്രദേശങ്ങൾ തുടങ്ങിയ പരമ്പരാഗത നെറ്റ്‌വർക്ക് സംവിധാനങ്ങൾ എത്തിക്കാൻ ബുദ്ധിമുട്ടുള്ള ഇടങ്ങളിലും സേവനം ലഭ്യമാക്കാനാണ് പദ്ധതി. നിലവിലുള്ള മൊബൈൽ, ഫൈബർ ശൃംഖലകളുമായി ഉപഗ്രഹ കണക്റ്റിവിറ്റി സംയോജിപ്പിക്കാനും കമ്പനി ലക്ഷ്യമിടുന്നു. എന്നാൽ ജിയോയുടെ ഉപഗ്രഹ ശൃംഖലയും ഗ്രൗണ്ട് സ്റ്റേഷനുകളും ഇപ്പോഴും നിർദിഷ്ട പദ്ധതിയുടെ ഭാഗമാണ്. അതേസമയം, സ്റ്റാർലിങ്കും ജിയോയും ഉൾപ്പെടെയുള്ള ഉപഗ്രഹ ഇന്റർനെറ്റ് സംരംഭങ്ങൾ കേന്ദ്ര സർക്കാരിന്റെ അന്തിമ സുരക്ഷാ അനുമതിക്കായി കാത്തിരിക്കുകയാണ്.
അംബാനിയുമായുള്ള വാക്പോര് തുടരുന്നു
ഇന്ത്യയിൽ സ്റ്റാർലിങ്കിന്റെ പ്രവേശനത്തെ എതിർക്കുന്ന വാദങ്ങളെ വിമർശിച്ചുകൊണ്ട് മസ്ക് നേരത്തെയും നിരവധി കുറിപ്പുകൾ പങ്കുവച്ചിരുന്നു. അടുത്തിടെ മുകേഷ് അംബാനിയെ പരിഹാസരൂപേണ 'പ്രധാനമന്ത്രി അംബാനി' എന്ന് വിശേഷിപ്പിച്ച മസ്ക്, സ്റ്റാർലിങ്കിന് ഇന്ത്യയിൽ മത്സരിക്കാൻ അനുമതി നൽകണമെന്ന ആവശ്യവും ഉന്നയിച്ചിരുന്നു.
വിശ്വസനീയമായ ഇന്റർനെറ്റ് ലഭ്യമല്ലാത്ത പ്രദേശങ്ങളിലെ കുട്ടികൾക്ക് വിദ്യാഭ്യാസ വിഭവങ്ങൾ ലഭ്യമാക്കാനും ചെറുകിട സംരംഭകർക്ക് കൂടുതൽ ഉപഭോക്താക്കളിലേക്ക് എത്താനും സ്റ്റാർലിങ്ക് സഹായിക്കുമെന്നാണ് മസ്കിന്റെ വാദം. അതേസമയം, സ്റ്റാർലിങ്കിന്റെ അനുമതി നടപടികളിൽ ജിയോയ്ക്ക് അനുകൂലമായ സമീപനം സ്വീകരിക്കുന്നുവെന്ന ആരോപണം കേന്ദ്ര സർക്കാർ നിഷേധിച്ചിട്ടുണ്ട്. മസ്കിന്റെ ഏറ്റവും പുതിയ പ്രതികരണത്തോട് റിലയൻസ് ഇതുവരെ പ്രതികരിച്ചിട്ടില്ല.
ഇന്ത്യയിലെ ഉപഗ്രഹ ഇന്റർനെറ്റ് വിപണിയിൽ സ്റ്റാർലിങ്കും ജിയോയും നേർക്കുനേർ എത്തുമ്പോൾ നിരക്കുകൾ, സേവനലഭ്യത, സുരക്ഷാ അനുമതികൾ എന്നിവയാകും നിർണായകമാകുക. പ്രത്യേകിച്ച് സാധാരണക്കാർക്ക് താങ്ങാനാകുന്ന നിരക്കിൽ സേവനം നൽകാൻ കഴിയുമോ എന്നതായിരിക്കും സ്റ്റാർലിങ്കിന്റെ ഇന്ത്യയിലെ മുന്നേറ്റത്തെ സ്വാധീനിക്കുന്ന പ്രധാന ഘടകം.
