അത്യാവശ്യ ഘട്ടത്തില് ക്ലെയിം ലഭിക്കുമോ, കമ്പനിയുടെ സാമ്പത്തിക ഭദ്രത എങ്ങനെയുണ്ട് തുടങ്ങിയ കാര്യങ്ങള് നിര്ബന്ധമായും പരിശോധിക്കേണ്ടതുണ്ട് ഒരു ഇന്ഷുറന്സ് പോളിസി തിരഞ്ഞെടുക്കും മുന്പ് പരിശോധിക്കേണ്ട 6 പ്രധാന കാര്യങ്ങള് ഇതാ:
ലൈഫ് ഇന്ഷുറന്സ് പോളിസി എടുക്കാന് തീരുമാനിച്ചാല് നമ്മളില് ഭൂരിഭാഗം പേരും ആദ്യം നോക്കുന്നത് പ്രീമിയം തുക എവിടെയാണ് കുറവ് എന്നാണ്. എന്നാല് കുറഞ്ഞ പ്രീമിയം മാത്രം നോക്കി കമ്പനി തിരഞ്ഞെടുത്താല് പിന്നീട് ദുഃഖിക്കേണ്ടി വന്നേക്കാം. അത്യാവശ്യ ഘട്ടത്തില് ക്ലെയിം ലഭിക്കുമോ, കമ്പനിയുടെ സാമ്പത്തിക ഭദ്രത എങ്ങനെയുണ്ട് തുടങ്ങിയ കാര്യങ്ങള് നിര്ബന്ധമായും പരിശോധിക്കേണ്ടതുണ്ട്.
ഒരു ഇന്ഷുറന്സ് പോളിസി തിരഞ്ഞെടുക്കും മുന്പ് പരിശോധിക്കേണ്ട 6 പ്രധാന കാര്യങ്ങള് ഇതാ:
1. പെഴ്സിസ്റ്റന്സി റേഷ്യോ
പേര് കേട്ട് പേടിക്കേണ്ട. വളരെ ലളിതമായ കാര്യമാണിത്. ഒരു കമ്പനിയില് പോളിസി എടുത്തവരില് എത്ര പേര് അത് മുടങ്ങാതെ പുതുക്കുന്നുണ്ട് എന്നതിന്റെ കണക്കാണിത്. ഇത് കൂടുതലാണെങ്കില് അതിനര്ത്ഥം ആ കമ്പനിയുടെ സേവനത്തില് ഉപഭോക്താക്കള് സംതൃപ്തരാണെന്നാണ്. ഉദാഹരണത്തിന്, 2024-ലെ കണക്കുകള് പ്രകാരം കൊട്ടക് മഹീന്ദ്ര ലൈഫ് ഇന്ഷുറന്സിന് 97 ശതമാനത്തിന് മുകളിലാണ് ഈ നിരക്ക്. ഇതിനര്ത്ഥം ഭൂരിഭാഗം പേരും പോളിസി തുടരുന്നു എന്നാണ്. എന്നാല് ചില കമ്പനികളില് പകുതിയോളം പേര് മാത്രമാണ് പോളിസി പുതുക്കുന്നത്.
Related Articles
2. സാമ്പത്തിക ഭദ്രത
ഒരു വലിയ ദുരന്തമോ പകര്ച്ചവ്യാധിയോ വരുമ്പോള് ഒരേസമയം ധാരാളം പേര്ക്ക് ക്ലെയിം നല്കേണ്ടി വന്നാല് കമ്പനിയുടെ കയ്യില് അതിനുള്ള പണമുണ്ടോ എന്ന് അളക്കുന്നതാണിത്. ഐ.ആര്.ഡി.എ.ഐ നിയമപ്രകാരം ഇത് കുറഞ്ഞത് 1.5 (150%) എങ്കിലും ഉണ്ടായിരിക്കണം. ബജാജ് അലയന്സ് പോലുള്ള ചില കമ്പനികള്ക്ക് ഇത് 4.32 വരെയാണ്. ഉയര്ന്ന സോള്വന്സി റേഷ്യോ ഉള്ള കമ്പനികള് തിരഞ്ഞെടുക്കുന്നതാണ് എപ്പോഴും സുരക്ഷിതം.
3. ക്ലെയിം സെറ്റില്മെന്റ് റേഷ്യോ
ലഭിക്കുന്ന അപേക്ഷകളില് എത്ര എണ്ണത്തിന് കമ്പനി പണം നല്കുന്നുണ്ട് എന്നതാണിത്. 98-99% ക്ലെയിം സെറ്റില്മെന്റ് റേഷ്യോ ഉണ്ടെന്ന് കമ്പനികള് അവകാശപ്പെടാറുണ്ട്. എന്നാല് ഇവിടെ ഒരു കെണിയുണ്ട്. എണ്ണം മാത്രം നോക്കിയാല് പോര: ചെറിയ തുകയുടെ (ഉദാഹരണത്തിന് 10,000 രൂപ) നൂറുകണക്കിന് ക്ലെയിമുകള് പാസാക്കുകയും, വലിയ തുകയുടെ (10 ലക്ഷം രൂപ) ക്ലെയിമുകള് തള്ളിക്കളയുകയും ചെയ്യുന്ന കമ്പനികളുണ്ടാകാം. അതുകൊണ്ട് ക്ലെയിമുകളുടെ എണ്ണത്തിനൊപ്പം, പാസാക്കിയ 'തുക' എത്രയാണെന്നും പരിശോധിക്കണം.
4. നടത്തിപ്പ് ചെലവ്
പ്രീമിയമായി ലഭിക്കുന്ന തുകയില് എത്ര ശതമാനം കമ്പനി അവരുടെ നടത്തിപ്പ് ചെലവുകള്ക്കും (ശമ്പളം, കമ്മീഷന്, പരസ്യം) മറ്റുമായി ഉപയോഗിക്കുന്നു എന്നതാണിത്. ഈ ചിലവ് കുറവുള്ള കമ്പനികളാണ് നല്ലത്. കാരണം, അവര്ക്ക് ബാക്കി തുക ഉപഭോക്താക്കളുടെ ആനുകൂല്യങ്ങള്ക്കായി മാറ്റിവെക്കാന് സാധിക്കും.
5. പരാതികള്ക്ക് പരിഹാരമുണ്ടോ?
ഒരു ഇന്ഷുറന്സ് കമ്പനിക്കെതിരെ എത്ര പരാതികള് ഉയരുന്നുണ്ട്, അത് അവര് എത്ര വേഗത്തില് പരിഹരിക്കുന്നുണ്ട് എന്ന് നോക്കണം. സ്ഥിരമായി പരാതികള് ഉയരുന്ന കമ്പനികളില് പോളിസി എടുക്കുന്നത് തലവേദനയാകും. ക്ലെയിം വൈകുക, മോശം പെരുമാറ്റം എന്നിവയായിരിക്കും ഫലം. ഐ.ആര്.ഡി.എ.ഐ വെബ്സൈറ്റില് കമ്പനികളുടെ പരാതി പരിഹാര കണക്കുകള് ലഭ്യമാണ്.
6. ഉപഭോക്താക്കളുടെ അഭിപ്രായം
പേപ്പര് കണക്കുകള്ക്കപ്പുറം യഥാര്ത്ഥ അനുഭവം എന്താണെന്ന് അറിയാന് നിലവിലെ ഉപഭോക്താക്കളുടെ അഭിപ്രായം തേടുക. അടിയന്തര ഘട്ടങ്ങളില് കമ്പനി എങ്ങനെ പെരുമാറുന്നു, നടപടിക്രമങ്ങള് ലളിതമാണോ തുടങ്ങിയ കാര്യങ്ങള് റിവ്യൂകളില് നിന്ന് മനസ്സിലാക്കാം.
ചുരുക്കത്തില്: ആകര്ഷകമായ പരസ്യങ്ങളോ ഏജന്റുമാരുടെ വാഗ്ദാനങ്ങളോ മാത്രം വിശ്വസിക്കാതെ, മേല്പ്പറഞ്ഞ കാര്യങ്ങള് കൂടി പരിശോധിച്ചു വേണം ലൈഫ് ഇന്ഷുറന്സ് പോളിസി തിരഞ്ഞെടുക്കാന്.
