ഇന്ത്യയുടെ തദ്ദേശീയ പോർവിമാനമായ അഡ്വാന്സ്ഡ് മീഡിയം കോംബാറ്റ് എയര്ക്രാഫ്റ്റിന് (എഎംസിഎ) എഞ്ചിന് നിര്മ്മിക്കുന്നതിനായി റിലയന്സ് ഇന്ഡസ്ട്രീസും റോള്സ് റോയ്സും സഹകരിക്കുന്നു. ഈ പങ്കാളിത്തത്തിന്റെ ഭാഗമായി ഇന്ത്യയിൽ ഒരു എയറോസ്പേസ് ഗ്യാസ് ടര്ബൈന് കോംപ്ലക്സ് സ്ഥാപിക്കും.
ഇന്ത്യയുടെ സ്വന്തം പോര്വിമാനമായ അഡ്വാന്സ്ഡ് മീഡിയം കോംബാറ്റ് എയര്ക്രാഫ്റ്റിന് എഞ്ചിന് നിര്മ്മിക്കുന്നതിനായി റിലയന്സ് ഇന്ഡസ്ട്രീസും പ്രമുഖ എഞ്ചിന് നിര്മ്മാതാക്കളായ റോള്സ് റോയ്സും കൈകോര്ക്കുന്നു. വിമാന എഞ്ചിന് നിര്മ്മാണത്തിലുള്ള റോള്സ് റോയ്സിന്റെ വൈദഗ്ധ്യവും റിലയന്സിന്റെ സാങ്കേതിക, നിര്മ്മാണ മികവും സംയോജിപ്പിച്ചാണ് ഇന്ത്യക്കായി തദ്ദേശീയമായി യുദ്ധവിമാന എഞ്ചിനുകള് വികസിപ്പിക്കുക. പ്രതിരോധ മേഖലയില് തദ്ദേശീയ സാങ്കേതികവിദ്യകള് വികസിപ്പിക്കാനുള്ള ഇന്ത്യയുടെ ശ്രമങ്ങള്ക്ക് വലിയൊരു കുതിപ്പാണ് ഈ കൂട്ടുകെട്ട്.
എയറോസ്പേസ് ഗ്യാസ് ടര്ബൈന് കോംപ്ലക്സ് വരുന്നു
പങ്കാളിത്തത്തിന്റെ ഭാഗമായി ഇന്ത്യയില് ഒരു അത്യാധുനിക എയറോസ്പേസ് ഗ്യാസ് ടര്ബൈന് കോംപ്ലക്സ് സ്ഥാപിക്കാനും ഇരു കമ്പനികളും പദ്ധതിയിടുന്നുണ്ട്. എഞ്ചിന് ഡിസൈന്, വികസനം, നിര്മ്മാണം, ടെസ്റ്റിംഗ്, പ്രൊഡക്ഷന്, എന്നിവ ഉള്പ്പെടെ പൂര്ണമായും ഇന്ത്യയില് തന്നെ ലഭ്യമാക്കുകയാണ് ഇതിലൂടെ ലക്ഷ്യമിടുന്നത്. ഈ കേന്ദ്രം യാഥാര്ഥ്യമാകുന്നതോടെ എഎംസിഎ പദ്ധതിക്ക് പുറമെ സിവില് വ്യോമയാന മേഖലയ്ക്കും ഇത് വലിയ നേട്ടമാകും.
റോള്സ് റോയ്സിന്റെ എഞ്ചിന് വൈദഗ്ധ്യം
നൂറ്റാണ്ടുകളുടെ പാരമ്പര്യമുള്ള റോള്സ് റോയ്സ് തങ്ങളുടെ എഞ്ചിനിയറിംഗ് വൈദഗ്ധ്യം ഈ പങ്കാളിത്തത്തിലൂടെ പൂര്ണ്ണമായും ഇന്ത്യയ്ക്ക് പ്രയോജനപ്പെടുത്തുമെന്ന് കമ്പനിയുടെ സിഇഒ തുഫാന് എര്ജിന്ബില്ഗി വ്യക്തമാക്കി. ഇന്ത്യന് വ്യവസായ രംഗത്തെ നേതൃനിരയിലുള്ള റിലയന്സുമായി ചേര്ന്ന് പ്രവര്ത്തിക്കുന്നതില് വലിയ സന്തോഷമുണ്ട്. ഇന്ത്യയില് ശക്തമായതും സ്വയം പര്യാപ്തവുമായ ഒരു എയറോസ്പേസ് ഇക്കോസിസ്റ്റം വികസിപ്പിച്ചെടുക്കാന് ഇത് സഹായിക്കുമെന്നും അദ്ദേഹം പറഞ്ഞു.
Related Articles
'ആത്മനിര്ഭര് ഭാരത്' സ്വപ്നങ്ങള്ക്ക് ചിറകുമുളയ്ക്കുന്നു
പ്രതിരോധ സാങ്കേതികവിദ്യകളില് വിദേശ രാജ്യങ്ങളെ ആശ്രയിക്കുന്നത് കുറയ്ക്കുക എന്ന ഇന്ത്യയുടെ ലക്ഷ്യത്തിന് ഈ പങ്കാളിത്തം വലിയ മുതല്ക്കൂട്ടാകും. കേന്ദ്ര സര്ക്കാരിന്റെ 'ആത്മനിര്ഭര് ഭാരത്' ആശയങ്ങള്ക്ക് ഈ പദ്ധതി വലിയ പിന്തുണയാണ് നല്കുന്നത്. ഭാവിയില് അത്യാധുനിക വിമാന എഞ്ചിന് സാങ്കേതികവിദ്യയില് ഇന്ത്യയെ ലോകത്തിന് മുന്നില് ഒരു പ്രധാന ശക്തിയാക്കി മാറ്റുക എന്നതാണ് റിലയന്സും റോള്സ് റോയ്സും സംയുക്തമായി ലക്ഷ്യമിടുന്നത്.
