അബഹ അന്താരാഷ്ട്ര വിമാനത്താവളത്തിൽ നിന്നുള്ള എയർ അറേബ്യയുടെ ചില പ്രധാന സർവീസുകൾ ഒക്ടോബർ 24 വരെ താൽക്കാലികമായി റദ്ദാക്കി. ഷാർജ വഴിയുള്ള യാത്ര മുടങ്ങിയത് കേരളത്തിലേക്ക് വരാനിരുന്ന നിരവധി പ്രവാസികളെ പ്രതിസന്ധിയിലാക്കി. യാത്രക്കാർ ട്രാവൽ ഏജൻസികളുമായി ബന്ധപ്പെട്ട് ബദൽ സംവിധാനങ്ങൾ ഉറപ്പാക്കണമെന്ന് അധികൃതർ നിർദേശിച്ചു.
റിയാദ്: നിലവിലെ സാഹചര്യങ്ങളുടെ പശ്ചാത്തലത്തിൽ സൗദി അറേബ്യയിലെ അബഹ അന്താരാഷ്ട്ര വിമാനത്താവളത്തിൽ നിന്നുള്ള എയർ അറേബ്യയുടെ ചില പ്രധാന വിമാന സർവീസുകൾ ഒക്ടോബർ 24 വരെ താൽക്കാലികമായി റദ്ദാക്കി. അബഹയിൽ നിന്ന് യു.എ.ഇയിലെ ഷാർജയിലേക്കും ഈജിപ്തിലെ കെയ്‌റോയിലേക്കുമുള്ള വിമാന സർവീസുകളാണ് നിർത്തിവെച്ചത്. എയർ അറേബ്യയുടെ G9, E5 കോഡുകളിൽ സർവീസ് നടത്തുന്ന വിമാനങ്ങളെയാണ് ഈ തീരുമാനം ബാധിക്കുക.
സർവീസ് തടസ്സപ്പെട്ടതോടെ അബഹയിൽ നിന്ന് ഷാർജ വഴി കോഴിക്കോട്, കൊച്ചി, തിരുവനന്തപുരം വിമാനത്താവളങ്ങളിലേക്ക് യാത്ര തിരിക്കാനിരുന്ന മലയാളികൾ ഉൾപ്പെടെയുള്ള നിരവധിയായ പ്രവാസികൾ കടുത്ത യാത്രാ പ്രതിസന്ധിയിലായിട്ടുണ്ട്. റദ്ദാക്കിയ സർവീസുകളിൽ നേരത്തെ ടിക്കറ്റ് ബുക്ക് ചെയ്തിരുന്ന യാത്രക്കാരെ വിവരമറിയിച്ചിട്ടുണ്ടെന്ന് എയർ അറേബ്യ അധികൃതർ വ്യക്തമാക്കി. വിമാന സർവീസുകൾ മുടങ്ങിയ സാഹചര്യത്തിൽ യാത്രക്കാർക്ക് ആവശ്യമായ യാത്രാ പുനഃക്രമീകരണങ്ങളും ബദൽ സംവിധാനങ്ങളും ഒരുക്കാൻ ബന്ധപ്പെട്ട ട്രാവൽ ഏജൻസികൾക്ക് എയർലൈൻ നിർദേശം നൽകിയിട്ടുണ്ട്.
ഒക്ടോബർ 24ന് ശേഷമുള്ള വിമാന സർവീസുകൾ പുനരാരംഭിക്കുന്നത് സംബന്ധിച്ച തുടർ വിവരങ്ങൾ അന്നത്തെ സാഹചര്യങ്ങൾ വിലയിരുത്തിയ ശേഷം സിവിൽ ഏവിയേഷൻ അതോറിറ്റി ഔദ്യോഗികമായി അറിയിക്കും. യാത്രക്കാരുടെയും വിമാന ജീവനക്കാരുടെയും സുരക്ഷ മുൻനിർത്തിയും രാജ്യത്തെ സിവിൽ ഏവിയേഷൻ സംവിധാനത്തിന്റെ ഭദ്രത ഉറപ്പുവരുത്തുന്നതിനുമാണ് ഈ മുൻകരുതൽ നടപടിയെന്ന് അതോറിറ്റി വ്യക്തമാക്കി.
Related Articles
വരും ദിവസങ്ങളിൽ അബഹ വിമാനത്താവളം വഴി യാത്ര ചെയ്യാൻ പദ്ധതിയിട്ടിട്ടുള്ള പ്രവാസികൾ, എയർലൈൻ കമ്പനിയുമായോ ബന്ധപ്പെട്ട ട്രാവൽ ഏജൻസികളുമായോ നേരിട്ട് ബന്ധപ്പെട്ട് ടിക്കറ്റും വിമാന സമയവും ഉറപ്പുവരുത്തിയ ശേഷം മാത്രം വിമാനത്താവളത്തിലേക്ക് പുറപ്പെടണമെന്ന് അധികൃതർ അഭ്യർത്ഥിച്ചു.
