യാത്രാ തിരക്കിന് മുന്നോടിയായി അറിയിപ്പുമായി ദുബൈ എയർപോർട്ട്സ്. നവംബർ 27നും ഡിസംബർ 31നും ഇടയിൽ ഒരു കോടി യാത്രക്കാർ വിമാനത്താവളത്തിലൂടെ കടന്നുപോകുമെന്നാണ് പ്രതീക്ഷിക്കുന്നത്. യുഎഇ ദേശീയ ദിനത്തിനോട് അനുബന്ധിച്ചുള്ള വാരാന്ത്യത്തോടെ തിരക്ക് ആരംഭിക്കും.
ദുബൈ: വർഷാവസാനത്തിലെ യാത്രാ തിരക്കിന് മുന്നോടിയായി അറിയിപ്പുമായി ദുബൈ എയർപോർട്ട്സ്. തിരക്ക് മുന്കൂട്ടി കണ്ട് യാത്രക്കാര് യാത്രകള് നേരത്തെ ആസൂത്രണം ചെയ്യണമെന്ന് അധികൃതർ അഭ്യർത്ഥിച്ചു. നവംബർ 27നും ഡിസംബർ 31നും ഇടയിൽ ഒരു കോടി യാത്രക്കാർ വിമാനത്താവളത്തിലൂടെ കടന്നുപോകുമെന്നാണ് പ്രതീക്ഷിക്കുന്നത്. യുഎഇ ദേശീയ ദിനത്തിനോട് അനുബന്ധിച്ചുള്ള നീണ്ട വാരാന്ത്യത്തോടെ തിരക്ക് ആരംഭിക്കും. ഈ സമയത്ത് പ്രതിദിന യാത്രക്കാരുടെ എണ്ണം 2,94,000 കവിയുമെന്നും ഡിസംബറിൽ ഇത് 3,00,000 കടക്കുമെന്നും എയർപോർട്ട് അധികൃതർ അറിയിച്ചു. ഡിസംബർ 20 ശനിയാഴ്ച 3,03,000 ഏറ്റവും തിരക്കേറിയ ദിവസമാകുമെന്നാണ് പ്രവചനം.
8.7 ദശലക്ഷത്തിലധികം യാത്രക്കാർ എത്തുമെന്ന് പ്രതീക്ഷിക്കുന്നതിനാൽ, ഡിസംബർ ദുബൈ അന്താരാഷ്ട്ര വിമാനത്താവളത്തിന്റെ ചരിത്രത്തിലെ ഏറ്റവും തിരക്കേറിയ മാസമായി മാറും. ദേശീയ ദിന വാരാന്ത്യത്തിന് മുന്നോടിയായി താമസക്കാർ ചെറിയ അവധിയെടുക്കുമ്പോൾ പുറത്തേക്കുള്ള യാത്രകൾ വർദ്ധിക്കും. തുടർന്ന് ഡിസംബർ പകുതിയോടെ ദുബൈയിലെ ആഘോഷ ആകർഷണങ്ങൾ കാരണം ദുബൈയിലേക്കുള്ള യാത്രക്കാർ ശക്തമായി ഉയരുമെന്നും അധികൃതർ അറിയിച്ചു.
സ്മാർട്ട് ടിപ്പുകൾ
Related Articles
- യാത്രക്കാർക്ക് ക്യൂ ഒഴിവാക്കാനും സമ്മർദ്ദം കുറയ്ക്കാനും സഹായിക്കുന്ന ചില പ്രധാന നിർദ്ദേശങ്ങൾ ദുബൈ എയർപോർട്ട്സ് പുറത്തിറക്കി.
- പുറപ്പെടുന്നതിന് മൂന്ന് മണിക്കൂറിൽ നേരത്തെ വിമാനത്താവളത്തിൽ എത്തരുത്.
- കഴിയുമെങ്കിൽ ഓൺലൈൻ ചെക്ക്-ഇൻ ഉപയോഗിക്കുക.
- സ്മാർട്ട് ഗേറ്റുകൾ ഉപയോഗിച്ച് വേഗത്തിൽ പാസ്പോർട്ട് നിയന്ത്രണങ്ങൾ പൂർത്തിയാക്കുക (12 വയസും അതിൽ കൂടുതലുമുള്ള യാത്രക്കാർക്ക്).
- എമിറേറ്റ്സിലെ ഫസ്റ്റ്, ബിസിനസ് ക്ലാസ് യാത്രക്കാർക്ക് ടെർമിനൽ 3-ലെ "റെഡ് കാർപെറ്റ്" സ്മാർട്ട് ടണൽ ഉപയോഗിച്ച് രേഖകളില്ലാതെ പാസ്പോർട്ട് പരിശോധന നടത്താം.
- തിരക്കേറിയ സമയങ്ങളിൽ ഓപ്പറേറ്റിംഗ് സമയം വർദ്ധിപ്പിക്കുന്ന ദുബൈ മെട്രോ ഉപയോഗിച്ച് ടെർമിനൽ 1, 3 എന്നിവിടങ്ങളിൽ എത്തിച്ചേരുക.
- ഗേറ്റ്, ഫ്ലൈറ്റ് വിവരങ്ങൾക്കായി ഡിഎക്സ്ബി എക്സ്പ്രസ് മാപ്പുകളും മൊബൈൽ അലേർട്ടുകളും ഉപയോഗിച്ച് അപ്ഡേറ്റ് ചെയ്യുക.
യാത്രക്കാർക്ക് വേഗത്തിലുള്ള ചെക്ക്-ഇൻ, സിറ്റി ചെക്ക്-ഇൻ സൗകര്യങ്ങൾ (DIFC-യിലെ ICD ബ്രൂക്ക്ഫീൽഡ് പ്ലേസിലുള്ളത് ഉൾപ്പെടെ) ഉപയോഗിക്കാൻ എമിറേറ്റ്സുമായുള്ള സഹകരണം വിപുലീകരിച്ചതായും അധികൃതർ അറിയിച്ചു. തിരക്ക് കണക്കിലെടുത്ത് യാത്രക്കാർ പൊതുഗതാഗത സംവിധാനങ്ങളായ മെട്രോ, ബസ്, ടാക്സി എന്നിവ ഉപയോഗിക്കാനും നിർദേശമുണ്ട്. സ്വന്തം വാഹനങ്ങളിൽ വരുന്നവർ നേരത്തെ പുറപ്പെടണമെന്നും അധികൃതർ ഓർമിപ്പിച്ചു. ഇത്തിഹാദ് എയർവേയ്സ്, എമിറേറ്റ്സ് എയർലൈൻ, ഫ്ലൈ ദുബായ്, എയർ അറേബ്യ തുടങ്ങി ദേശീയ എയർലൈനുകൾ തിരക്കേറിയ സെക്ടറുകളിലേക്ക് അധിക സർവീസുകൾ നടത്താനും കൂടുതൽ ജീവനക്കാരെ വിന്യസിക്കാനും ആലോചിക്കുന്നുണ്ട്. നഗരത്തിന്റെ വിവിധ ഭാഗങ്ങളിൽ പ്രവർത്തിക്കുന്ന റിമോട്ട് ചെക്ക്-ഇൻ സെന്ററുകളുടെ സേവനം യാത്രക്കാർക്ക് പ്രയോജനപ്പെടുത്താം. ഇവിടെ യാത്ര പുറപ്പെടുന്നതിന് 24 മുതൽ 4 മണിക്കൂർ മുൻപ് വരെ ബാഗേജ് കൈമാറി ബോർഡിങ് പാസ് വാങ്ങിയാൽ വിമാനത്താവളത്തിലെ തിരക്കിൽ നിന്ന് ഒഴിവാകാം.
