പാലത്തില് നിന്ന് താഴേക്ക് ചാടി ആത്മഹത്യയ്ക്ക് ശ്രമിച്ച പെണ്കുട്ടിയെ രക്ഷപ്പെടുത്തി
വിവരം ലഭിച്ച ഉടന് സ്ഥലത്തെത്തിയ ഉദ്യോഗസ്ഥരുടെ സമയോചിതമായ ഇടപെടല് മൂലമാണ് പെണ്കുട്ടിയെ രക്ഷപ്പെടുത്താന് സാധിച്ചത്.
കുവൈത്ത് സിറ്റി: കുവൈത്തില് പാലത്തില് നിന്ന് താഴേക്ക് ചാടി ആത്മഹത്യയ്ക്ക് ശ്രമിച്ച പെണ്കുട്ടിയെ രക്ഷപ്പെടുത്തി. ജാബിര് പാലത്തില് നിന്നാണ് പെണ്കുട്ടി ആത്മഹത്യ ചെയ്യാന് ശ്രമിച്ചത്. വിവരം ലഭിച്ച ഉടന് സ്ഥലത്തെത്തിയ ഉദ്യോഗസ്ഥരുടെ സമയോചിതമായ ഇടപെടല് മൂലമാണ് പെണ്കുട്ടിയെ രക്ഷപ്പെടുത്താന് സാധിച്ചത്. ഉടന് തന്നെ കുട്ടിയെ ആംബുലന്സില് ആശുപത്രിയില് പ്രവേശിപ്പിച്ചു. ആത്മഹത്യക്ക് പ്രേരിപ്പിച്ചത് എന്താണെന്ന് വ്യക്തമല്ല. സംഭവത്തില് ഡിറ്റക്ടീവ് അന്വേഷണം ആരംഭിച്ചു.
Read More - വാഹനമോഷണ ശ്രമം; കുവൈത്തില് പ്രവാസി അറസ്റ്റില്
യുഎഇയില് പാലത്തില് നിന്ന് ചാടി ആത്മഹത്യക്ക് ശ്രമിച്ച പ്രവാസി യുവാവിനെ തക്കസമയത്ത് രക്ഷിച്ച് പൊലീസ്
അജ്മാന്: യുഎഇയിലെ അജ്മാനില് പാലത്തില് നിന്ന് ചാടി ആത്മഹത്യക്ക് ശ്രമിച്ച പ്രവാസി യുവാവിനെ അജ്മാന് പൊലീസ് രക്ഷപ്പെടുത്തി. ശൈഖ് ഖലീഫ പാലത്തിന്റെ മുകളില് നിന്ന് ചാടി ആത്മഹത്യ ചെയ്യുമെന്നാണ് ഏഷ്യക്കാരനായ യുവാവ് ഭീഷണി മുഴക്കിയത്.
വിവരം അറിഞ്ഞ ഉടന് തന്നെ ക്രിമിനല് ഇന്വെസ്റ്റിഗേഷന്സ് സംഘവും പൊലീസ് പട്രോള് വിഭാഗവും സംഭവ സ്ഥലത്തെത്തി രക്ഷാപ്രവര്ത്തനം ആരംഭിച്ചു. സംഭവത്തില് ഇടപെട്ട അധികൃതര് യുവാവിനോട് സംസാരിക്കുകയും ഇയാളെ അനുനയിപ്പിച്ച് ആത്മഹത്യാ ശ്രമത്തില് നിന്നും പിന്തിരിപ്പിക്കാനും ശ്രമിക്കുകയായിരുന്നു. പാലത്തിന്റെ അറ്റത്ത് ഇരിക്കുകയായിരുന്ന ഇയാളെ ഉദ്യോഗസ്ഥര് സംസാരിച്ച് അനുനയിപ്പിക്കുകയായിരുന്നു. ഒരു പൊലീസ് ഉദ്യോഗസ്ഥന് സംസാരം തുടരുന്നതിനിടെ മറ്റൊരു ഉദ്യോഗസ്ഥന് പിന്നില് നിന്നെത്തി യുവാവിനെ പിടിക്കുകയും തുടര്ന്ന് മറ്റ് രണ്ട് ഉദ്യോഗസ്ഥര് ചേര്ന്ന് ഇയാളെ അപകടത്തില് നിന്ന് രക്ഷപ്പെടുത്തുകയുമായിരുന്നു.
Read More - പ്രവാസികള്ക്ക് ചെലവ് കൂടും; മരുന്നിന് പണം നല്കണം, പുതിയ ചികിത്സാ നിരക്ക് നിലവില്
തുടര്ന്ന് യുവാവിനെ ഹമീദിയ പൊലീസ് സ്റ്റേഷനിലെത്തിച്ച് ചോദ്യം ചെയ്തു. സാമ്പത്തിക ബാധ്യതകള് മൂലമാണ് യുവാവ് ആത്മഹത്യ ചെയ്യാന് തീരുമാനിച്ചതെന്നാണ് വ്യക്തമായത്. ഇയാളെ വൈദ്യ പരിശോധനയ്ക്ക് വിധേയനാക്കി. യുവാവിന്റെ മാനസിക നിലയ്ക്ക് തകരാറില്ലെന്നും ഇയാള്ക്ക് മറ്റ് അസുഖങ്ങളില്ലെന്നും കണ്ടെത്തി. തുടര്ന്ന് യുവാവിന്റെ കടങ്ങള് തീര്പ്പാക്കാനും സാമ്പത്തിക പ്രശ്നങ്ങള് പരിഹരിക്കാനും സഹായിക്കുന്നതിനായി ഇയാളുടെ കേസ് കമ്മ്യൂണിറ്റി പൊലീസിന് കൈമാറി.