യാ ഹല റാഫിൾ നറുക്കെടുപ്പ് തട്ടിപ്പ് പുറത്ത് കൊണ്ട് വന്ന ഡെപ്യൂട്ടി ചീഫ് ഓഫ് സ്റ്റാഫിന് ആദരം

ഡെപ്യൂട്ടി ചീഫ് ഓഫ് സ്റ്റാഫ് നവാഫ് അൽ നസ്സാറിനെയാണ് ആദരിച്ചത്

kuwait

കുവൈത്ത് സിറ്റി: മാർച്ച് 25ന് നടന്ന യാ ഹല റാഫിൾ നറുക്കെടുപ്പ് ഫലങ്ങളിൽ കൃത്രിമം കാണിച്ച തട്ടിപ്പ് ശൃംഖലയെ വലയിലാക്കിയ സുരക്ഷാ മേഖലയിലെ ഡെപ്യൂട്ടി ചീഫ് ഓഫ് സ്റ്റാഫ് നവാഫ് അൽ നസ്സാറിന് ആദരം. തട്ടിപ്പ് നെറ്റ്‍വർക്കിന് പുറത്ത് കൊണ്ട് വരുന്നതിൽ നിർണായക പങ്ക് വഹിച്ചതിന് അദ്ദേഹത്തെ ആക്ടിങ് പ്രധാനമന്ത്രിയും ആഭ്യന്തര മന്ത്രിയുമായ ശൈഖ് ഫഹദ് യൂസഫ് സൗദ് അൽ സബാഹ് ആണ് ആദരിച്ചത്. പ്രൈവറ്റ് സെക്യൂരിറ്റി സെക്ടർ അസിസ്റ്റന്റ് അണ്ടർ സെക്രട്ടറി മേജർ ജനറൽ അബ്‍ദുള്ള സഫാഹ് അൽ മുല്ല ചടങ്ങിൽ പങ്കെടുത്തു.

നറുക്കെടുപ്പ് പ്രക്രിയയുടെ തത്സമയ സംപ്രേഷണത്തിനിടെ വീഡിയോ തെളിവുകൾ രേഖപ്പെടുത്തി ക്രമക്കേടുകൾ വെളിപ്പെടുത്തിക്കൊണ്ട് തട്ടിപ്പ് പുറത്തുകൊണ്ടുവരുന്നതിൽ ഡെപ്യൂട്ടി ചീഫ് അൽ നസ്സാർ നിർണായക പങ്ക് വഹിച്ചു. അൽ നസ്സറിന്റെ ജാഗ്രതയെ അഭിനന്ദിച്ച അദ്ദേഹം, ഈ ബഹുമതി സത്യസന്ധത ഉയർത്തിപ്പിടിക്കുന്നതിനും സാമൂഹിക അവകാശങ്ങൾ സംരക്ഷിക്കുന്നതിനും അദ്ദേഹത്തിനുള്ള സമർപ്പണത്തെ പ്രതിഫലിപ്പിക്കുന്നുവെന്ന് ഊന്നിപ്പറഞ്ഞു. നീതിയും സുതാര്യതയും ഉറപ്പാക്കുന്നതിൽ സുരക്ഷാ ഉദ്യോഗസ്ഥർ വഹിക്കുന്ന സുപ്രധാന പങ്കിനെക്കുറിച്ചും അദ്ദേഹം സംസാരിച്ചു. തട്ടിപ്പ് വെളിപ്പെടുത്തുന്ന വീഡിയോ പുറത്തുവിട്ട ഇദ്ദേഹം സോഷ്യൽ മീഡിയയിൽ ഇപ്പോൾ താരമാണ്.