ചരിത്രത്തിലേക്ക് കുതിപ്പ് തുടങ്ങി ശുഭാംശു ശുക്ല, ആക്സിയം 4 ദൗത്യം വിക്ഷേപിച്ചു, ശുഭയാത്ര നേര്ന്ന് 140 കോടി ഇന്ത്യക്കാര്
കെന്നഡി സ്പേസ് സെന്റര്: നീണ്ട കാത്തിരിപ്പിനൊടുവില് ശുഭത്തുടക്കം, അന്താരാഷ്ട്ര ബഹിരാകാശ നിലയത്തിലേക്ക് ഇന്ത്യക്കാരനായ ശുഭാംശു ശുക്ല അടക്കം നാല് സഞ്ചാരികളെ എത്തിക്കാനുള്ള ആക്സിയം 4 ദൗത്യം സ്പേസ് എക്സ് വിക്ഷേപിച്ചു. ഫ്ലോറിഡയിലെ കെന്നഡി സ്പേസ് സെന്ററിലെ ലോഞ്ച് കോംപ്ലക്സ് 39എ-യില് നിന്ന് ആക്സിയം 4 യാത്രികരെ വഹിച്ച് സ്പേസ് എക്സിന്റെ ഡ്രാഗണ് പേടകം കരുത്തുറ്റ ഫാല്ക്കണ് 9 റോക്കറ്റില് കുതിച്ചുയര്ന്നു. ഇന്ത്യന് വ്യോമസേന ഗ്രൂപ്പ് ക്യാപ്റ്റന് ശുഭാംശു ശുക്ലയ്ക്ക് പുറമെ മുതിർന്ന അമേരിക്കൻ ആസ്ട്രനോട്ട് പെഗ്ഗി വിറ്റ്സൺ, പോളണ്ട് സ്വദേശി സ്ലാവോസ് ഉസ്നാൻസ്കി, ഹംഗറിയിൽ നിന്നുള്ള ടിബോർ കാപു എന്നിവരാണ് ആക്സിയം 4 ദൗത്യ സംഘത്തിലുള്ളത്.
ആക്സിയം 4 വിക്ഷേപണം തത്സമയം കാണാം
ചരിത്ര നേട്ടത്തിനരികെ ശുഭാംശു ശുക്ല
നീണ്ട 41 വർഷങ്ങൾക്ക് ശേഷം ഒരു ഇന്ത്യക്കാരന് ബഹിരാകാശത്തേക്ക് പോകുന്നു എന്നതാണ് ശുഭാംശു ശുക്ലയുടെ ഐഎസ്എസ് യാത്രയുടെ ഏറ്റവും വലിയ പ്രത്യേകത. 1984ൽ റഷ്യയുടെ സോയൂസ് ബഹിരാകാശ പേടകത്തിൽ രാകേഷ് ശർമ്മ നടത്തിയ ഐതിഹാസിക ബഹിരാകാശ സന്ദര്ശനത്തിന് നാല് പതിറ്റാണ്ടുകൾക്ക് ശേഷമാണ് ശുഭാംശു ശുക്ലയുടെ യാത്ര. എന്നാല് രാകേഷ് ശര്മ്മയുടെ യാത്ര അന്താരാഷ്ട്ര ബഹിരാകാശ നിലയത്തിലേക്കായിരുന്നില്ല. അതിനാല്, ഡ്രാഗണ് പേടകം ഡോക്ക് ചെയ്യുന്നതോടെ ഐഎസ്എസിലെത്തുന്ന ആദ്യ ഇന്ത്യക്കാരന് എന്ന നേട്ടം ശുഭാംശു ശുക്ലയുടെ പേരിലാകും.
ആക്സിയം 4 ദൗത്യ സംഘം സഞ്ചരിക്കുന്ന ഡ്രാഗൺ പേടകം ജൂൺ 26ന് വൈകുന്നേരം നാലരയോടെ അന്താരാഷ്ട്ര ബഹിരാകാശ നിലയത്തില് ഡോക്ക് ചെയ്യും. പതിനാല് ദിവസത്തെ ദൗത്യമാണ് ആക്സിയം ലക്ഷ്യമിടുന്നത്. ഐഎസ്എസില് വിവിധ പരീക്ഷണങ്ങളിലും ഗവേഷണങ്ങളിലും ഈ നാല്വര് സംഘം ഭാഗമാകും. നേരത്തെ, ഏഴ് തവണ മാറ്റിവയ്ക്കേണ്ടിവന്ന ലോഞ്ചാണ് ഇന്ന് നടന്നിരിക്കുന്നത്. മെയ് 29നായിരുന്നു ആക്സിയം 4 ദൗത്യം നടക്കേണ്ടിയിരുന്നത്. കാലാവസ്ഥാ പ്രശ്നങ്ങളും ഫാല്ക്കണ് 9 റോക്കറ്റിലെ ലിക്വിഡ് ഓക്സിജന് ലീക്കും ഐഎസ്എസിലെ റഷ്യന് മൊഡ്യൂളിലെ സാങ്കേതിക പ്രശ്നങ്ങളും ആക്സിയം 4 വിക്ഷേപണം നീളാന് കാരണമായി.
