'മാസ്റ്ററി'നു ശേഷം ലോകേഷ് കനകരാജ് സംവിധാനം ചെയ്യുന്ന ചിത്രം
തെന്നിന്ത്യന് സിനിമയില് ഏറ്റവുമധികം പ്രേക്ഷകശ്രദ്ധ നേടിയ വരാനിരിക്കുന്ന ചിത്രങ്ങളിലൊന്നാണ് 'വിക്രം'. കമല് ഹാസന്, വിജയ് സേതുപതി, ഫഹദ് ഫാസില്, നരെയ്ന്, കാളിദാസ് ജയറാം എന്നിങ്ങനെയുള്ള താരനിരയാണ് അതിനു പ്രധാന കാരണം. ഒപ്പം സംവിധായകന്റെ കസേരയിലുള്ള ലോകേഷ് കനകരാജും. ഇപ്പോഴിതാ സിനിമയുടെ സെറ്റില് നിന്നുള്ള ഒരു പുതിയ ചിത്രം സോഷ്യല് മീഡിയയില് വൈറല് ആവുകയാണ്. ലോകേഷ് തന്നെയാണ് ചിത്രം പങ്കുവച്ചിരിക്കുന്നത്.
അഭിനയിച്ചു കഴിഞ്ഞ രംഗം ലോകേഷിനൊപ്പം മോണിറ്ററില് കാണുന്ന ഫഹദും വിജയ് സേതുപതിയുമുണ്ട് ചിത്രത്തില്. സിനിമയുടെ രണ്ടാം ഷെഡ്യൂള് പുരോഗമിക്കുകയാണ്. 'മാസ്റ്ററി'നു ശേഷം ലോകേഷ് സംവിധാനം ചെയ്യുന്ന ചിത്രമാണിത്.
കമല് ഹാസന്റെ കഴിഞ്ഞ പിറന്നാള് ദിനത്തിലായിരുന്നു ടൈറ്റില് പ്രഖ്യാപനം. ഗിരീഷ് ഗംഗാധരനാണ് ഛായാഗ്രാഹകന്. ലോകേഷ് ചിത്രങ്ങളായ കൈതിയുടെയും മാസ്റ്ററിന്റെയും ഛായാഗ്രാഹകനായ സത്യന് സൂര്യനെയാണ് വിക്രത്തിലും ആദ്യം നിശ്ചയിച്ചിരുന്നതെങ്കിലും അദ്ദേഹത്തിന് മറ്റു പ്രോജക്റ്റുകളുടെ തിരക്കുകള് വന്നതിനാല് പിന്മാറുകയായിരുന്നു. രാജ്കമല് ഫിലിംസ് ഇന്റര്നാഷണലിന്റെ ബാനറില് കമല്ഹാസന് തന്നെയാണ് വിക്രത്തിന്റെ നിര്മ്മാണം. സംഗീതം അനിരുദ്ധ്. എഡിറ്റിംഗ് ഫിലോമിന് രാജ്. സംഘട്ടന സംവിധാനം അന്പറിവ്. നൃത്തസംവിധാനം ദിനേശ്. പിആര്ഒ ഡയമണ്ട് ബാബു. ശബ്ദ സങ്കലനം കണ്ണന് ഗണ്പത്. 2022ല് തിയറ്ററുകളിലെത്തിക്കാനാണ് പദ്ധതി.
