Ruby Jewel|മിനിസ്ക്രീൻ താരം റൂബി ജുവൽ വിവാഹിതയായി
സിനിമാ അണിയറ പ്രവർത്തകനായ അജാസാണ് റൂബിയുടെ വരൻ.
മിനിസ്ക്രീൻ താരം റൂബി ജുവൽ( Ruby Jewel) വിവാഹിതയായി. നിക്കാഹ് ദിനത്തിലെ ചിത്രങ്ങൾ റൂബി തന്നെയാണ് സോഷ്യൽ മീഡിയയിൽ പങ്കുവച്ചിരിക്കുന്നത്. സിനിമാ അണിയറ പ്രവർത്തകനായ അജാസാണ്(ajas) റൂബിയുടെ വരൻ. ഇരുവരുടെയും നിക്കാഹ് ചിത്രങ്ങൾ ആരാധകർ ഏറ്റെടുത്തിരിക്കുകയാണിപ്പോൾ. ഏഷ്യാനെറ്റ് പരമ്പര പരസ്പരത്തിൽ സുചിത്ര എന്ന കഥാപാത്രത്തിലൂടെ മലയാളികൾക്ക് പരിചിതമായ താരമാണ് റൂബി ജുവൽ.
കഴിഞ്ഞ ജൂലൈയിൽ ആയിരുന്നു താരത്തിന്റെ വിവാഹ നിശ്ചയം. ഈ ചടങ്ങ് രഹസ്യമായാണ് നടത്തിയതെന്നും അതിന് പിന്നിലെ കാരണങ്ങൾ അടക്കം കണ്ടെത്തിയും ചില യൂട്യൂബ് ചാനൽ നടത്തിയ പ്രചാരണങ്ങൾക്ക് മറുപടിയുമായി റൂബിയും, സുഹൃത്തും നടിയുമായ അഷിതയും എത്തിയത് വാർത്തയായിരുന്നു.
മാട്രിമോണിയൽ വഴിയാണ് അജാസിന്റെ പ്രൊപ്പോസൽ വന്നതെന്ന് നേരത്തെ താരം വ്യക്തമാക്കിയിരുന്നു. തന്റെ പ്രൊഫൈൽ കണ്ട് അജാസ് അപ്രോച്ച്ചെയ്തു. തുടർന്ന് ഇൻസ്റ്റയിൽ ഡയറക്ടായി മെസേജ് ചെയ്തു. കുടുംബത്തെ വീട്ടിലേക്ക് അയക്കട്ടെ എന്ന് അജാസാണ് ചോദിച്ചത്. അങ്ങനെയാണ് കാര്യങ്ങൾ വിവാഹത്തിലേക്ക് എത്തിയതെന്നും റൂബി പറഞ്ഞിരുന്നു.
കൊച്ചു ടിവിയിൽ അവതാരകയായി തുടങ്ങിയ റൂബി ഇന്ദിര എന്ന പരമ്പരയിൽ വേഷമിട്ടെങ്കിലും 'പരസ്പരത്തിലൂടെ ആയിരുന്നു ശ്രദ്ധ നേടിയത്. പരസ്പരത്തിൽ പത്മാവതിയുടെ മകൾ സുചിത്രയെന്ന, റൂബി അവതരിപ്പിച്ച കഥാപാത്രം ഏറെ ശ്രദ്ധ നേടിയിരുന്നു. പിന്നീട് സീരിയൽ രംഗത്ത് സജീവമായിരുന്നില്ലെങ്കിലും സോഷ്യൽ മീഡിയയിലൂടെ ആരാധകർക്കായി വിശേഷങ്ങളെല്ലാം പങ്കുവയ്ക്കാറുണ്ട് റൂബി.
നേരത്തെ വിവാഹ നിശ്ചയം സംബന്ധിച്ച കുപ്രചാരണങ്ങൾക്ക് രസകരമായ മറുപടിയായിരുന്നു അൻഷിതയും റൂബിയും നൽകിയത്. ഉണ്ണീ.., താങ്കളുടെ വിവാഹ നിശ്ചയം രഹസ്യമായി നടന്നുവെന്ന് ഞാനൊക്കെയിങ്ങനെ പരസ്യമായി അറിയുന്നത് എന്താണെന്ന് അൻഷിത പരിഹാസ രൂപേണ ചോദിക്കുന്നു. അത് രഹസ്യമായിരുന്നു എന്ന് ഞാൻ ഇപ്പോഴാണ് അറിയുന്നതെന്നായിരുന്നു റൂബിയുടെ മറുപടി.
30 പേർ കൂടിയ രഹസ്യമായ ചടങ്ങ് ഞാൻ ആദ്യമായാണ് കേൾക്കുന്നത്. കല്യാണവും ഇതുപോലെ രഹസ്യമായി ഇടണമെന്ന് റൂബി വീഡിയോയിൽ പറയുന്നു. കുടുംബാംഗങ്ങളെല്ലാം പങ്കെടുത്ത് ലോകത്ത് ആദ്യമായിട്ടായിരിക്കും രഹസ്യ വിവാഹ നിശ്ചയം നടക്കുന്നതെന്നായിരുന്നു അൻഷിതയുടെ പരിഹാസം. ഇത്തരം വാർത്തകൾ കാത്തിരിക്കുകയാണെന്നും വാർത്തകൾ കണ്ട് ഇനിയും ചിരിക്കാമല്ലോ എന്നും ഇരുവരും വീഡിയോയിൽ പറയുന്നുണ്ട്.
