കേപ്ടൗൺ: ദക്ഷിണാഫ്രിക്കൻ ബാറ്റ്സ്മാൻമാരെ വെള്ളം കുടിപ്പിക്കുന്ന ചാഹല്-കുല്ദീപ് യാദവ് കൂട്ടുകെട്ടില് നേരിടാൻ ഏറ്റവും ബുദ്ധിമുട്ട് കുൽദീപ് യാദവിനെയാണെന്ന് ഇന്ത്യൻ ഓപ്പണർ ശീഖർ ധവാൻ. ആദ്യ രണ്ട് ഏകദിനങ്ങളിൽനിന്നായി 13 വിക്കറ്റ് സ്വന്തമാക്കിയ ചാഹൽ–കുൽദീപ് ദ്വയമാണ് ഇന്ത്യയ്ക്ക് പരമ്പരയിൽ ലീഡ് സമ്മാനിച്ചത്. ആദ്യ ഏകദിനത്തിൽ കുൽദീപ് മൂന്നും ചാഹൽ രണ്ടും വിക്കറ്റ് വീഴ്ത്തിയപ്പോൾ, രണ്ടാം മൽസരത്തിൽ ചാഹൽ അഞ്ചും കുൽദീപ് മൂന്നും വിക്കറ്റ് വീഴ്ത്തി.
എന്റെ സ്വന്തം അനുഭവത്തിൽ ഇവരിൽ നേരിടാൻ കൂടുതൽ ബുദ്ധിമുട്ടുള്ള താരം കുൽദീപ് യാദവാണ്. കുൽദീപിന്റെ ഗൂഗ്ലികൾ മനസ്സിലാക്കാനാകാതെ ബുദ്ധിമുട്ടുന്ന ഒട്ടേറെ താരങ്ങളുണ്ട്. ചാഹലിന്റെ ഗൂഗ്ലികളും ബാറ്റ്സ്മാൻമാരെ കബളിപ്പിക്കാറുണ്ട്. എനിക്കു പക്ഷേ നേരിടാൻ ബുദ്ധിമുട്ട് കുൽദീപിനെയാണ് – ധവാൻ പറഞ്ഞു.
രോഹിത് ശർമയുടെ ഫോമിനെക്കുറിച്ച് ആശങ്കപ്പെടേണ്ടതില്ലെന്നും ധവാൻ വ്യക്തമാക്കി. ഏതു നിമിഷവും ഫോമിലെത്താൻ കഴിവുള്ള താരമാണ് രോഹിത്. ചില സമയത്ത് വലിയ സ്കോറുകൾ നേടാനാകാതെ പോകുന്നത് സ്വാഭാവികമാണെന്നും ധവാൻ പറഞ്ഞു.
