ക്രിക്കറ്റില്‍ ഇതിഹാസമായി: ഇപ്പോള്‍ കബഡിയില്‍ ഒരു കൈ നോക്കി ധോണി!
വിശ്രമവേളയില്‍ കബഡിയില്‍ ഒരുകൈ നോക്കാന്‍ ധോണി ശ്രമം നടത്തി. ഇതിന്‍റെ ചിത്രങ്ങള്‍ സമൂഹമാധ്യമങ്ങളില്‍ ആരാധകര്‍ ആഘോഷിക്കുകയാണ്...
മുംബൈ: ഇന്ത്യന്‍ ക്രിക്കറ്റ് ടീമിന്‍റെ തിരക്കുപിടിച്ച യാത്രയ്ക്കിടയില്‍ ഇടയ്ക്ക് മാത്രം വീണുകിട്ടുന്ന വിശ്രമവേള ആസ്വദിക്കുകയാണ് മുന്‍ നായകന്‍ എംഎസ് ധോണി. അടുത്തിടെ അവസാനിച്ച വിന്‍ഡീസിനെതിരായ ടി20 പരമ്പരിയില്‍ ധോണിയെ ഉള്‍പ്പെടുത്തിയിരുന്നില്ല. വരാനിരിക്കുന്ന ഓസ്‌ട്രേലിയന്‍ പര്യടനത്തിലും ധോണി ടി20 കളിക്കില്ല. എന്നാല്‍ ഈ വിശ്രമവേളയില്‍ കബഡിയില്‍ ഒരുകൈ നോക്കാന്‍ ധോണി ശ്രമംനടത്തി.
മുംബൈയില്‍ പ്രോ കബഡി ലീഗിന്‍റെ പ്രചരണാര്‍ത്ഥമുള്ള പരസ്യചിത്രത്തിനായാണ് ധോണി കബഡി കോര്‍ട്ടിലിറങ്ങിയത്. ഈ ചിത്രങ്ങള്‍ സമൂഹമാധ്യമങ്ങളില്‍ 'തല' ആരാധകര്‍ ഏറ്റെടുക്കുകയും ചെയ്തു.
വിന്‍ഡീസ്- ഓസീസ് സീരിസുകളില്‍ നിന്ന് പുറത്തായതോടെ ധോണിയുടെ ടി20 കരിയറിന് അന്ത്യമായി എന്ന് വിലയിരുത്തലുണ്ട്. എന്നാല്‍ രണ്ടാം വിക്കറ്റ് കീപ്പറെ കണ്ടെത്താന്‍ ധോണിക്ക് വിശ്രമം അനുവദിച്ചതാണെന്നായിരുന്നു മുഖ്യ സെലക്ടര്‍ എംഎസ്‌കെ പ്രസാദ് ഈ വാദത്തോട് പ്രതികരിച്ചത്.
