സൗജന്യ വിപിഎൻ ആപ്പുകളും എക്സ്റ്റൻഷനുകളും ഉപയോഗിക്കുന്നവർക്ക് ഗൂഗിൾ മുന്നറിയിപ്പ്. വ്യാജ വിപിഎന് ആപ്പുകള് ഉപയോക്താക്കളുടെ സ്വകാര്യ വിവരങ്ങൾ മോഷ്ടിക്കുന്നതിനാണ് തയ്യാറാക്കിയിരിക്കുന്നത്.
കാലിഫോര്ണിയ: വ്യാജ വിപിഎൻ ആപ്പുകളും എക്സ്റ്റൻഷനുകളും അതിവേഗം വർധിച്ചുവരികയാണെന്ന് മുന്നറിയിപ്പുമായി ഗൂഗിൾ. ഉപയോക്താക്കളുടെ സ്വകാര്യ വിവരങ്ങൾ മോഷ്ടിക്കുന്നതിനാണ് ഈ ആപ്പുകൾ രൂപകൽപ്പന ചെയ്തിരിക്കുന്നതെന്നും സൗജന്യ വിപിഎന്നുകള് ഉപയോക്താക്കളെ അപകടത്തിലാക്കുന്നതായും ഗൂഗിൾ വ്യക്തമാക്കുന്നു. നിരവധി സൗജന്യ വിപിഎൻ ആപ്പുകൾ ഉപയോക്തൃ ഡാറ്റ ലോഗ് ചെയ്യുകയും ട്രാക്കറുകൾ ഇൻസ്റ്റാൾ ചെയ്യുകയും വ്യാജ അവലോകനങ്ങൾ ഉപയോഗിച്ച് അവരുടെ റാങ്കിംഗ് വർധിപ്പിക്കുകയും ചെയ്യുന്നുവെന്നും, മാൽവെയർ പ്രചരിപ്പിക്കാൻ തട്ടിപ്പ് ഗ്രൂപ്പുകൾ ഈ ആപ്പുകൾ ഉപയോഗിക്കുന്നുവെന്നും ഗൂഗിൾ മുന്നറിയിപ്പ് നൽകുന്നു.
വ്യാജ വിപിഎൻ ആപ്പുകൾ: എന്താണ് അപകടം?
വ്യാജ വിപിഎൻ ആപ്പുകൾ യഥാർഥ ബ്രാൻഡുകളായി സ്വയം അവതരിപ്പിക്കുന്നുവെന്ന് ഗൂഗിൾ പറയുന്നു. ഉപയോക്താക്കളെ ആപ്പ് ഡൗൺലോഡ് ചെയ്യാൻ പ്രേരിപ്പിക്കുന്നതിനായി അവർ തെറ്റിദ്ധരിപ്പിക്കുന്ന പരസ്യങ്ങളോ ട്രെൻഡിംഗ് ഇവന്റുകളിലേക്കുള്ള ലിങ്കുകളോ ഉപയോഗിക്കുന്നു. ഇൻസ്റ്റാൾ ചെയ്തുകഴിഞ്ഞാൽ, ഇൻഫോ-സ്റ്റീലറുകൾ (വിവരങ്ങൾ മോഷ്ടിക്കുന്ന വൈറസുകൾ), റിമോട്ട് ആക്സസ് ടൂളുകൾ, ബാങ്കിംഗ് ട്രോജനുകൾ (ബാങ്ക് വിശദാംശങ്ങൾ മോഷ്ടിക്കുന്ന സോഫ്റ്റ്വെയർ) തുടങ്ങിയ അപകടകരമായ സോഫ്റ്റ്വെയർ (മാൽവെയർ) അവർ ഇൻസ്റ്റാൾ ചെയ്യുന്നു. ഇവ ഹാക്കർമാർക്ക് നിങ്ങളുടെ ബ്രൗസിംഗ് ഡാറ്റ, സന്ദേശങ്ങൾ, ബാങ്ക് വിശദാംശങ്ങൾ, ക്രിപ്റ്റോ വാലറ്റുകൾ എന്നിവയിലേക്ക് ആക്സസ് നൽകും.
വ്യാജ വിപിഎൻ ആപ്പ് എങ്ങനെ തിരിച്ചറിയാം?
Related Articles
വ്യാജ വിപിഎന് ആപ്പുകൾ അനാവശ്യമായ അനുമതികൾ ഉപയോക്താക്കളില് നിന്ന് ആവശ്യപ്പെടുന്നു. തെറ്റിദ്ധരിപ്പിക്കുന്ന പരസ്യങ്ങളിലൂടെയും മറ്റും അവർ ഡൗൺലോഡുകൾ നിർബന്ധിക്കുന്നു. ഈ ആപ്പുകൾ നിങ്ങളുടെ പ്രവർത്തനം ട്രാക്ക് ചെയ്യുകയോ ഡാറ്റ വിൽക്കുകയോ ചെയ്യുന്നു. ഈ ആപ്പുകൾക്ക് പലപ്പോഴും വ്യക്തതയില്ലാത്ത സ്വകാര്യതാ നയങ്ങൾ ആണുള്ളത്. ഈ കമ്പനികൾ പലപ്പോഴും സ്വന്തം വിവരങ്ങളോ സുരക്ഷാ ഓഡിറ്റുകളോ നൽകാറില്ല. സുരക്ഷിത ബ്രൗസിംഗ് എന്ന വ്യാജേന അവർ നിങ്ങളെ കബളിപ്പിച്ച് മാൽവെയർ ഇൻസ്റ്റാൾ ചെയ്യുന്നുവെന്നും ഗൂഗിൾ പറയുന്നു.
ഒരു അപകടകാരിയായ വിപിഎൻ എങ്ങനെ തിരിച്ചറിയാം?
ദോഷകരമായ വിപിഎന്നുകളുടെ പൊതു സ്വഭാവവും സൂചനകളും ഗൂഗിൾ പട്ടികപ്പെടുത്തിയിട്ടുണ്ട്. ഇവയിൽ ഇവ ഉൾപ്പെടുന്നു:
1. വിപിഎൻ ഫംഗ്ഷനുകളുമായി ബന്ധമില്ലാത്ത അനുമതികൾക്കായുള്ള അഭ്യർഥനകൾ.
2. ഡൗൺലോഡുകൾ വർധിപ്പിക്കുന്നതിന് പ്രേരിപ്പിക്കുന്നതോ തെറ്റിദ്ധരിപ്പിക്കുന്നതോ ആയ പരസ്യങ്ങൾ ഉപയോഗിക്കുന്നത്.
3. ഉപയോക്തൃ പ്രവർത്തനം ട്രാക്ക് ചെയ്യുക, അല്ലെങ്കിൽ ഡാറ്റ വിൽക്കുക.
4. വ്യക്തമല്ലാത്ത സ്വകാര്യതാ നയങ്ങൾ
5. പരിശോധിച്ച ഓഡിറ്റുകളോ കമ്പനി വിവരങ്ങളോ ഇല്ല.
6 . സുരക്ഷിത ബ്രൗസിംഗ് വാഗ്ദാനം ചെയ്യുന്നുവെന്ന് അവകാശപ്പെട്ടുകൊണ്ട് മാൽവെയർ ഇൻസ്റ്റാൾ ചെയ്യുന്നു.
