മുറി വിട്ടുപോകാതെ തന്നെ യൂറോപ്പിലൂടെ ഒരു ആഡംബര ട്രെയിൻ യാത്ര! വൃദ്ധസദനത്തിലെ വേറിട്ട അനുഭവം വൈറൽ, വീഡിയോ

ഓസ്‌ട്രേലിയയിലെ ഒരു വൃദ്ധസദനം വെർച്വൽ റിയാലിറ്റി ഉപയോഗിച്ച് അന്തേവാസികൾക്കായി ഒരു ആഡംബര ട്രെയിൻ യാത്ര ഒരുക്കുന്നു. 'സെന്‍റ് വിൻസെന്‍റ്സ് എക്സ്പ്രസ്' എന്ന ഈ യാത്ര, കാഴ്ചകളും ശബ്ദങ്ങളും അതത് രാജ്യത്തെ ഭക്ഷണവും നൽകി, മറവിരോഗമുള്ളവർക്ക് ഒരു മികച്ച ചികിത്സാ രീതിയായി മാറുന്നു.

St Vincent’s Express

Image Credit: twitter

ഒരു ആഡംബര ട്രെയിനിൽ ചായയും കുടിച്ചിരുന്ന് യൂറോപ്പിന്‍റെ മനോഹാരിത ആസ്വദിക്കുന്നത് ഒന്ന് സങ്കൽപ്പിച്ച് നോക്കൂ. അതും സ്വന്തം മുറിയിൽ നിന്ന് ഒരടി പോലും പുറത്തിറങ്ങാതെ! ഓസ്‌ട്രേലിയയിലെ ഒരു വൃദ്ധസദനത്തിലെ അന്തേവാസികൾ ഇപ്പോൾ ഇത്തരമൊരു അത്ഭുതകരമായ യാത്രാനുഭവത്തിലാണ്. ഇതിന്‍റെ വീഡിയോകൾ സമൂഹ മാധ്യമങ്ങളിൽ തരംഗമായി മാറിക്കഴിഞ്ഞു.

വെർച്വൽ റിയാലിറ്റി യാത്ര

ടുവൂംബയിലെ സെന്‍റ് വിൻസെന്‍റ്സ് കെയർ എന്ന സ്ഥാപനത്തിലാണ് 'സെന്‍റ് വിൻസെന്‍റ്സ് എക്സ്പ്രസ്' (St Vincent’s Express) എന്ന ഈ വേറിട്ട പരീക്ഷണം നടക്കുന്നത്. ഒരു ആഡംബര ട്രെയിൻ കംപാർട്ട്‌മെന്‍റിന് സമാനമായാണ് ഈ മുറി രൂപകൽപ്പന ചെയ്തിരിക്കുന്നത്. വെർച്വൽ റിയാലിറ്റി (VR), വലിയ ഡിജിറ്റൽ ജാലകങ്ങൾ, സറൗണ്ട് സൗണ്ട് സിസ്റ്റം എന്നിവയുടെ സഹായത്തോടെയാണ് ഈ യാത്ര ഒരുക്കിയിരിക്കുന്നത്. സ്വിറ്റ്‌സർലൻഡ് ഉൾപ്പെടെ പത്തോളം രാജ്യങ്ങളിലൂടെ ട്രെയിനിൽ കടന്നു പോകുന്ന അതേ അനുഭവം ഇത് നൽകുന്നു. യാത്രയുടെ യാഥാർത്ഥ്യബോധം വർദ്ധിപ്പിക്കാനായി റെയിൽവേ സ്റ്റേഷനുകളിലെ സുപരിചിതമായ അനൗൺസ്‌മെന്‍റുകളും ഒരു എ ഐ ഗൈഡും ഇതിൽ സജ്ജീകരിച്ചിട്ടുണ്ട്.

വീഡിയോ കാണാൻ ഇവിടെ ക്ലിക്ക് ചെയ്യുക

കാഴ്ചയോടൊപ്പം ഭക്ഷണവും

കാഴ്ചകൾക്ക് പുറമെ, ഓരോ രാജ്യത്തെയും രുചികളും ഈ യാത്രയുടെ ഭാഗമാണ്. സ്വിസ് ചോക്ലേറ്റുകൾ മുതൽ വിവിധ രാജ്യങ്ങളിലെ തനത് വിഭവങ്ങൾ വരെ ആ നാട്ടിലൂടെ യാത്ര ചെയ്യുമ്പോൾ അന്തേവാസികൾക്ക് വിളമ്പുന്നു. "യാത്ര ശരിക്കും അത്ഭുതകരമാണ്. പണ്ട് എന്‍റെ ഭാര്യയോടൊപ്പം നടത്തിയ യാത്രയുടെ എല്ലാ ഓർമ്മകളും ഇത് വീണ്ടും എന്നിലേക്ക് എത്തിച്ചു." എന്നാണ് ക്വീൻസ്‌ലാന്‍റിലെ മുൻ മന്ത്രിയായിരുന്ന വിൻസ് ലെസ്റ്റർ തന്‍റെ അനുഭവം പങ്കുവെച്ചത്.

മികച്ച ചികിത്സാ രീതി

സെന്‍റ് വിൻസെന്‍റ്സിലെ റെസിഡൻഷ്യൽ കെയർ മാനേജരായ എൽസെറ്റ് ലേറ്റഗൻ ആണ് ഈ പദ്ധതിക്ക് പിന്നിൽ. മറവിരോഗവും (Dementia) മറ്റ് മാനസിക വെല്ലുവിളികളും നേരിടുന്നവർക്ക് പുതിയൊരു ഉന്മേഷം നൽകുക എന്നതായിരുന്നു ലക്ഷ്യം. സ്ഥാപനത്തിലെ 175 അന്തേവാസികളിൽ പകുതിയോളം പേരും ഇത്തരം വെല്ലുവിളികൾ നേരിടുന്നവരാണ്. ഈ വെർച്വൽ യാത്ര അവരുടെ പഴയകാല ഓർമ്മകളെ ഉണർത്താനും പരസ്പരമുള്ള ആശയവിനിമയം മെച്ചപ്പെടുത്താനും സഹായിക്കുന്നു. "അന്തേവാസികൾക്ക് ലോകം ചുറ്റിക്കാണാൻ കഴിയില്ലെങ്കിൽ, നമുക്ക് ആ ലോകത്തെ അവർക്ക് മുന്നിലേക്ക് എത്തിച്ചുകൂടേ?" എന്ന ലളിതമായ ചിന്തയാണ് ഈ മാറ്റത്തിന് തുടക്കമിട്ടതെന്ന് ലേറ്റഗൻ പറയുന്നു. വെറുമൊരു കൗതുകം എന്നതിലുപരി, ഇതൊരു മികച്ച ചികിത്സാ രീതിയായാണ് ഇപ്പോൾ കണക്കാക്കപ്പെടുന്നത്.