61-ാം വയസ്സിൽ, ഏറ്റവും കൂടുതൽ സമയം പ്ലാങ്ക് ചെയ്ത വനിതയെന്ന ലോക റെക്കോർഡ് ഡോണജീൻ വൈൽഡ് 5 മണിക്കൂർ സമയം കൊണ്ട് തകർത്തിരിക്കുന്നു.'
അമേരിക്കയിൽ നടന്ന ഹണ്ട്സ്മാൻ വേൾഡ് സീനിയർ ഗെയിംസിൽ അഞ്ച് മണിക്കൂർ നീണ്ട പ്ലാങ്ക് റെക്കോർഡ് സ്വന്തമാക്കി 61 -കാരിയായ ഡോണജീൻ വൈൽഡ് . സ്ത്രീകളുടെ വിഭാഗത്തിൽ ഏറ്റവും ദൈർഘ്യമേറിയ അബ്ഡോമിനൽ പ്ലാങ്ക് എന്ന ലക്ഷ്യത്തോടെയാണ് അവർ ഈ കടുത്ത വെല്ലുവിളി ഏറ്റെടുത്തത്. മണിക്കൂറുകൾ പിന്നിട്ടിട്ടും തളരാതെ, അസാധാരണമായ ഇച്ഛാശക്തിയോടെ അവർ അഞ്ച് മണിക്കൂർ പൂർത്തിയാക്കുകയായിരുന്നു.
ഈ റെക്കോർഡ് നേട്ടത്തിന്റെ ദൃശ്യങ്ങൾ ഹണ്ട്സ്മാൻ വേൾഡ് സീനിയർ ഗെയിംസിന്റെ ഔദ്യോഗിക ഇൻസ്റ്റാഗ്രാം പേജിൽ പങ്കുവെച്ചിട്ടുണ്ട്. '61-ാം വയസ്സിൽ, ഏറ്റവും കൂടുതൽ സമയം പ്ലാങ്ക് ചെയ്ത വനിതയെന്ന ലോക റെക്കോർഡ് ഡോണജീൻ വൈൽഡ് 5 മണിക്കൂർ സമയം കൊണ്ട് തകർത്തിരിക്കുന്നു' എന്ന അടിക്കുറിപ്പോടെയാണ് വീഡിയോ പങ്കുവെച്ചത്.
സാമൂഹിക മാധ്യമങ്ങളിൽ വീഡിയോ വലിയ രീതിയിലാണ് ശ്രദ്ധിക്കപ്പെട്ടത്. നിരവധി പേരാണ് ഡോണജീന്റെ കഠിനാധ്വാനത്തെ പ്രശംസിച്ച് രംഗത്തെത്തിയത്. 'ഇത് കാണുമ്പോൾ തന്നെ എന്റെ ശരീരം വേദനിക്കുന്നു' എന്ന് ഒരാൾ കുറിച്ചു. 'ഇത് അവിശ്വസനീയമാണ്! എന്റെ കണ്ണ് തള്ളിപ്പോയി' എന്ന് മറ്റൊരാൾ കമന്റ് ചെയ്തു.
സ്വന്തം പ്ലാങ്ക് സമയം വർദ്ധിപ്പിക്കാൻ ഇത് തനിക്ക് വലിയ പ്രചോദനമായെന്ന് പലരും തമാശയായി കുറിച്ചു. സാധാരണയായി 30 സെക്കൻഡോ ഒരു മിനിറ്റോ മാത്രം പ്ലാങ്ക് ചെയ്യാറുള്ളവർ, ഈ വീഡിയോ കണ്ടതിന് ശേഷം തങ്ങളുടെ സമയം ഒന്നര മിനിറ്റായി ഉയർത്തുമെന്നും ചിലർ പറഞ്ഞു.
അതേസമയം, മുഴുവൻ സമയവും കൃത്യമായ ഫോം നിലനിർത്താൻ കഴിഞ്ഞിട്ടുണ്ടോ എന്നതിനെക്കുറിച്ച് സംശയങ്ങൾ പ്രകടിപ്പിച്ചവരും ഉണ്ടായിരുന്നു. എങ്കിലും, ഈ പ്രായത്തിൽ അഞ്ച് മണിക്കൂർ പ്ലാങ്ക് എന്നത് വലിയൊരു അദ്ഭുതം തന്നെയാണെന്ന് എല്ലാവരും സമ്മതിക്കുന്നു.
