'സ്മാർട്ട്‍ഫോൺ സോംബികളെ സൂക്ഷിക്കുക'; വൈറലായ ആ ബോർഡിന് പിന്നിലെന്ത്? 

സ്മാർട്ട് ഫോണുകൾ കയ്യിലില്ലാതെ നമുക്കിപ്പോൾ ഒട്ടും ജീവിക്കാൻ വയ്യ എന്ന അവസ്ഥയാണ്. ഊണിലും ഉറക്കത്തിലും വരെ ഫോൺ നമ്മോടൊപ്പമുണ്ട്. ചിലരാവട്ടെ ഫോൺ കയ്യിലുണ്ടെങ്കിൽ പരിസരം പോലും മറന്നു പോകും. അത്തരക്കാരെ ലക്ഷ്യം വച്ചുകൊണ്ട് ബം​ഗളൂരുവിൽ സ്ഥാപിച്ച ഒരു സൈൻബോർഡാണ് ഇപ്പോൾ നെറ്റിസൺസിന്റെ ശ്രദ്ധയാകർഷിക്കുന്നത്. 'സ്മാർട്ട്‍ഫോൺ സോംബികളെ സൂക്ഷിക്കുക' എന്നതാണ് ആ ബോർഡ്. ഫോണിൽ നോക്കി ചുറ്റുപാടും ശ്രദ്ധിക്കാതെ നടന്നുപോകുന്ന രണ്ടുപേരെയും അതിനൊപ്പം വരച്ചു ചേർത്തിട്ടുണ്ട്. 

ചുറ്റുപാടുകൾ ശ്രദ്ധിക്കാതെ ഫോണുമായി നടക്കുന്ന ആളുകൾക്കുള്ള മുന്നറിയിപ്പ് നൽകാനാണ് ഈ ബോർഡ് സ്ഥാപിച്ചിരിക്കുന്നത്. ഇങ്ങനെ നടക്കുന്ന ആളുകൾ അവരവർക്ക് മാത്രമല്ല മറ്റുള്ളവർക്ക് കൂടി ചിലപ്പോൾ അപകടമുണ്ടാക്കിയേക്കും എന്നാണ് നെറ്റിസൺസിന്റെ അഭിപ്രായം. അതുകൊണ്ട് തന്നെ ഈ ബോർഡ് സ്ഥാപിച്ചത് നല്ല തീരുമാനം തന്നെ എന്നും ആളുകൾ അഭിപ്രായപ്പെടുന്നു. റോഡ് മുറിച്ച് കടക്കുമ്പോൾ ഫോൺ ഉപയോ​ഗിക്കുന്ന രണ്ടുപേരെയാണ് ബോർഡിലുള്ള ചിത്രത്തിൽ കാണുന്നത്. 

നിരവധിപ്പേരാണ് സോഷ്യൽ മീഡിയയിൽ പങ്കുവച്ചിട്ടുള്ള ചിത്രത്തിന് കമന്റുകളുമായി എത്തിയത്. പലരും വളരെ രസകരമായ കമന്റുകളാണ് കുറിച്ചിരിക്കുന്നത്. 'നമ്മുടെ ജനറേഷനെ മൊത്തത്തിൽ കളിയാക്കുന്നതാണ് ഈ ബോർഡ്' എന്നാണ് പല യുവാക്കളും കമന്റ് ചെയ്തിരിക്കുന്നത്. മറ്റൊരാൾ കമന്റ് നൽകിയിരിക്കുന്നത്, 'മെസ്സേജ് അയച്ചുകൊണ്ട് ഡ്രൈവ് ചെയ്യുന്നവരെ കുറിച്ചും ഇങ്ങനെ ഒരു ബോർഡ് തയ്യാറാക്കേണ്ടതുണ്ട്' എന്നാണ്. മറ്റൊരാളുടെ കമന്റ്, 'നിർഭാ​ഗ്യവശാൽ സ്മാർട്ട്‍ഫോൺ സോംബികൾ ഈ ബോർഡ് പോലും കാണാൻ‌ പോകുന്നില്ല' എന്നാണ്. മറ്റൊരാൾ അതിലും രസകരമായ ഒരു കമന്റാണ് നൽകിയിരിക്കുന്നത്, 'ഇതുപോലെ ഒരു ബോർഡ് താൻ തന്റെ വീട്ടിലും സ്ഥാപിക്കാൻ ആ​ഗ്രഹിക്കുന്നു' എന്നായിരുന്നു അത്. 

അപ്പോൾ ഇനി റോഡ് മുറിച്ച് കടക്കുമ്പോഴും തിരക്കുള്ള റോഡിലുമൊക്കെ ഫോൺ നോക്കി നടക്കുന്നവരാണ് നിങ്ങളെങ്കിൽ ഒന്ന് സൂക്ഷിക്കുന്നത് നല്ലതാണ്. 

വായിക്കാം: വായിൽ കാൻ കുടുങ്ങി, കണ്ണ് നിറഞ്ഞ് സഹായം തേടി കരടി, മനുഷ്യർ ചെയ്തത് കണ്ടോ? വീഡിയോ

ഏഷ്യാനെറ്റ് ന്യൂസ് ലൈവ് കാണാം: 

ഏഷ്യാനെറ്റ് ന്യൂസ് വാർത്തകൾ തത്സമയം കാണാം

• Smartphone
• viral