ദക്ഷിണ കൊറിയയിൽ ആരംഭിച്ച 'മൈ AI പാർട്ണർ: സ്ട്രേഞ്ച് ലവ്' എന്ന പുതിയ ഡേറ്റിംഗ് റിയാലിറ്റി ഷോ ആഗോളതലത്തിൽ ശ്രദ്ധ നേടുകയാണ്. പ്രമുഖർ തങ്ങളുടെ എഐ പങ്കാളികളുമായി സമയം ചെലവഴിക്കുന്ന ഈ ഷോ, മനുഷ്യരും കൃത്രിമബുദ്ധിയും തമ്മിലുള്ള വൈകാരിക ബന്ധത്തെക്കുറിച്ചുള്ള ചർച്ചകൾക്ക് വഴിതുറക്കുന്നു.
മനുഷ്യരും കൃത്രിമബുദ്ധിയും തമ്മിലുള്ള വൈകാരിക ബന്ധവും പ്രണയവും പ്രമേയമാക്കി ദക്ഷിണ കൊറിയയിൽ ആരംഭിച്ച പുതിയ റിയാലിറ്റി ടെലിവിഷൻ സീരീസ് ആഗോളതലത്തിൽ വലിയ ചർച്ചയാകുന്നു. 'മൈ AI പാർട്ണർ: സ്ട്രേഞ്ച് ലവ്' (My AI Partner: Strange Love) എന്ന് പേരിട്ടിരിക്കുന്ന ഈ വേറിട്ട ഡേറ്റിംഗ് ഷോ, ഭാവിയിൽ മനുഷ്യരുടെ പ്രണയ സങ്കൽപ്പങ്ങളും ബന്ധങ്ങളും എങ്ങനെയെല്ലാമായിരിക്കും എന്നതിനെക്കുറിച്ചുള്ള സംവാദങ്ങൾക്കാണ് സോഷ്യൽ മീഡിയയിൽ വഴിതുറന്നിരിക്കുന്നത്.
ഷോയിൽ പ്രമുഖരും
പ്രശസ്തരായ വ്യക്തികളെ അവരുടെ വ്യക്തിഗത താല്പര്യങ്ങൾക്കനുസരിച്ച് രൂപകൽപ്പന ചെയ്ത എഐ പങ്കാളികളുമായി ഡേറ്റിംഗിന് അയക്കുന്നതാണ് ഈ പ്രോഗ്രാമിന്റെ രീതിയെന്ന് സൗത്ത് ചൈന മോർണിംഗ് പോസ്റ്റ് റിപ്പോർട്ട് ചെയ്യുന്നു. പ്രശസ്ത വെബ്ടൂൺ ആർട്ടിസ്റ്റ് കിയാൻ 84, പ്രമുഖ ടിവി അവതാരക ജാംഗ് ഡോ-യോൺ, നടി ലീ യു-ബി എന്നിവരാണ് ഷോയിലെ പ്രധാന മത്സരാർത്ഥികൾ. പൂർണ്ണമായും ടാബ്ലെറ്റ് സ്ക്രീനുകളിൽ മാത്രം നിലനിൽക്കുന്ന, പ്രത്യേക ശബ്ദവും രൂപവുമുള്ള എഐ പങ്കാളികളുമായാണ് ഇവർ സമയം ചെലവഴിക്കുന്നത്.
വലിയ മാറ്റമെന്ന് മത്സരാർത്ഥികൾ
തുടക്കത്തിൽ, തനിക്ക് ഒരു എഐയോടും വൈകാരികമായ അടുപ്പം തോന്നില്ലെന്ന് ഉറപ്പിച്ചു പറഞ്ഞ വ്യക്തിയായിരുന്നു കിയാൻ 84. എന്നാൽ ദിവസങ്ങൾ പിന്നിട്ടതോടെ അദ്ദേഹത്തിന്റെ സമീപനത്തിൽ പ്രകടമായ മാറ്റമുണ്ടായി. രണ്ട് എഐ വ്യക്തിത്വങ്ങളിൽ നിന്ന് തന്റെ പങ്കാളിയെ തെരഞ്ഞെടുത്ത ശേഷം, "മനുഷ്യർക്ക് നൽകാൻ കഴിയാത്ത തരത്തിലുള്ള ഒരു പ്രത്യേക സുരക്ഷിതത്വ ബോധം നൽകാൻ തന്റെ ഡിജിറ്റൽ പങ്കാളിക്ക് സാധിക്കുന്നുണ്ട്" എന്ന് അദ്ദേഹം സുഹൃത്തുക്കളോട് വെളിപ്പെടുത്തി.
Related Articles
പുത്തൻ പരീക്ഷണം
മനുഷ്യബന്ധങ്ങളിലെ മടുപ്പും പുതിയ സാധ്യതകളും മനുഷ്യബന്ധങ്ങളിൽ നിന്നുണ്ടാകുന്ന വൈകാരികമായ സമ്മർദ്ദവും മടുപ്പും കാരണം പലരും ഇന്ന് യഥാർത്ഥ പ്രണയബന്ധങ്ങളിൽ നിന്ന് പിന്മാറുകയാണെന്ന് ഷോയുടെ പ്രൊഡ്യൂസർ വോൺ സ്യൂങ്-ജേ അഭിപ്രായപ്പെട്ടുന്നു. സാങ്കേതികവിദ്യയുടെ സഹായത്തോടെ മനുഷ്യത്വത്തെയും മനഃശാസ്ത്രത്തെയും കൂടുതൽ ആഴത്തിൽ മനസ്സിലാക്കാനുള്ള ശ്രമമാണ് ഈ പരീക്ഷണമെന്ന് മറ്റൊരു നിർമ്മാതാവായ സൺ ജങ്-മിൻ കൂട്ടിച്ചേർത്തു.
വലിയ സ്വീകാര്യത
ഷോ തരംഗമായതോടെ ചൈനീസ് സോഷ്യൽ മീഡിയ പ്ലാറ്റ്ഫോമുകളിലും വലിയ രീതിയിലുള്ള പ്രതികരണങ്ങളാണ് ഉയർന്നുവരുന്നത്. സാങ്കേതികവിദ്യ മാനവികതയുടെ അതിരുകൾ മാറ്റിമറിക്കുന്ന ഈ കാലഘട്ടത്തിൽ, സ്നേഹത്തിന്റെയും കൂട്ടുകെട്ടിന്റെയും നിർവ്വചനം തന്നെ തിരുത്തിയെഴുതുകയാണ് ദക്ഷിണ കൊറിയയിൽ നിന്നുള്ള ഈ പുതിയ ടെലിവിഷൻ പരീക്ഷണം.
