ഓരോ തവണ പ്രണയിക്കുമ്പോഴും ഒരേ തരം സ്വഭാവമുള്ള പങ്കാളികളെ തിരഞ്ഞെടുക്കുകയും, ഒടുവിൽ ഒരേ കാരണങ്ങളാൽ ആ ബന്ധങ്ങൾ പരാജയപ്പെടുകയും ചെയ്യുന്ന അവസ്ഥയെക്കുറിച്ച് ചിന്തിച്ചിട്ടുണ്ടോ? ആധുനിക ഡേറ്റിംഗ് ലോകത്ത് ഇതിനെ 'ഗ്രൗണ്ട്ഹോഗിംഗ്' എന്നാണ് വിളിക്കുന്നത്.
ഒരേ തെറ്റുകൾ ആവർത്തിക്കുന്നത് മനുഷ്യസഹജമാണെന്ന് പറയാറുണ്ട്. എന്നാൽ പ്രണയബന്ധങ്ങളുടെ കാര്യത്തിൽ, ഒരേ സ്വഭാവമുള്ള ആളുകളെ വീണ്ടും വീണ്ടും തിരഞ്ഞെടുക്കുകയും ഒരേ തരം പരാജയങ്ങൾ ഏറ്റുവാങ്ങുകയും ചെയ്യുന്ന ഒരു അവസ്ഥയെയാണ് 'ഗ്രൗണ്ട്ഹോഗിംഗ്' എന്ന് വിളിക്കുന്നത്. 1993-ൽ പുറത്തിറങ്ങിയ 'ഗ്രൗണ്ട്ഹോഗ് ഡേ' എന്ന സിനിമയിലെ നായകൻ ഒരേ ദിവസത്തിൽ തന്നെ കുടുങ്ങിപ്പോകുന്നതുപോലെ, ഡേറ്റിംഗിൽ ഒരു പ്രത്യേക ലൂപ്പിൽ കുടുങ്ങിക്കിടക്കുന്ന അവസ്ഥയാണിത്. ആധുനിക ഡേറ്റിംഗ് ലോകത്ത്, പ്രത്യേകിച്ച് ഡേറ്റിംഗ് ആപ്പുകളുടെ കാലത്ത് ഏറെ ചർച്ച ചെയ്യപ്പെടുന്ന ഒരു പ്രവണതയാണിത്.
എന്താണ് ഗ്രൗണ്ട്ഹോഗിംഗ്?
സിമ്പിളായി പറഞ്ഞാൽ, ഒരേ ടൈപ്പ് ആളുകളെ വീണ്ടും വീണ്ടും ഡേറ്റ് ചെയ്യുന്ന പ്രവണതയാണിത്. നമ്മൾ തിരഞ്ഞെടുക്കുന്ന പങ്കാളികൾ കാഴ്ചയിൽ വ്യത്യസ്തരാണെങ്കിലും അവരുടെ സ്വഭാവം, വൈകാരിക പ്രതികരണങ്ങൾ, ബന്ധങ്ങളോടുള്ള സമീപനം എന്നിവയെല്ലാം മുൻപ് പരാജയപ്പെട്ട ബന്ധങ്ങളിലെ പങ്കാളികളുടേതിന് സമാനമായിരിക്കും. ആദ്യമൊക്കെ ഇത് തികച്ചും ആകസ്മികമാണെന്ന് തോന്നുമെങ്കിലും, തുടർച്ചയായി ഒരേ പാറ്റേണിലുള്ള ബ്രേക്കപ്പുകൾ സംഭവിക്കുമ്പോഴാണ് നമ്മൾ ഈ ലൂപ്പിലാണെന്ന് തിരിച്ചറിയുക. ഡേറ്റിംഗ് ആപ്പുകളിൽ നമുക്ക് പരിചിതമായ അല്ലെങ്കിൽ പെട്ടെന്ന് ആകർഷകമായി തോന്നുന്ന പ്രൊഫൈലുകൾ മാത്രം സ്വൈപ്പ് ചെയ്യുന്നത് വഴിയാണ് പലപ്പോഴും ഈ ലൂപ്പ് ആരംഭിക്കുന്നതെന്നാണ് റിപ്പോർട്ടുകൾ പറയുന്നത്.
ഈ ലൂപ്പിൽ കുടുങ്ങുന്നത് എന്തുകൊണ്ട്?
പലരും മനഃപൂർവ്വമല്ല ഈ പാറ്റേൺ പിന്തുടരുന്നത്. ഇതിന് പിന്നിൽ പ്രധാനമായും മൂന്ന് കാരണങ്ങളാണുള്ളതെന്ന് വിദഗ്ധർ പറയുന്നു:
Related Articles
- പരിചിതമായതിനോടുള്ള താൽപ്പര്യം: നമ്മുടെ മസ്തിഷ്കം എപ്പോഴും പരിചിതമായ കാര്യങ്ങളോട് കൂടുതൽ അടുപ്പം കാണിക്കും. മുൻപ് വേദനിപ്പിച്ച സ്വഭാവമാണെങ്കിൽ പോലും, അത് നമുക്ക് പരിചിതമായ ഒന്നായതുകൊണ്ട് നമ്മൾ അറിയാതെ തന്നെ അത്തരം വ്യക്തികളിലേക്ക് ആകർഷിക്കപ്പെടുന്നു.
- കെമിസ്ട്രിയും ഇൻ്റെൻസിറ്റിയും: ചില ബന്ധങ്ങളിലെ അസ്ഥിരത നമ്മൾ പലപ്പോഴും പാഷനായി തെറ്റിദ്ധരിക്കും. പങ്കാളി സ്നേഹം പ്രകടിപ്പിക്കുകയും പെട്ടെന്ന് അകലം പാലിക്കുകയും ചെയ്യുമ്പോൾ ലഭിക്കുന്ന ആ ഒരു വൈകാരിക പിരിമുറുക്കം വലിയൊരു കെമിസ്ട്രിയാണെന്ന് നമ്മൾ കരുതും.
- മാറ്റത്തോടുള്ള ഭയം: തികച്ചും വ്യത്യസ്തനായ ഒരാളെ തിരഞ്ഞെടുക്കുമ്പോൾ അത് നൽകുന്ന അനിശ്ചിതത്വം പലരെയും ഭയപ്പെടുത്തുന്നു. പരാജയപ്പെടുമെന്ന് ഉറപ്പാണെങ്കിൽ പോലും പഴയ പാറ്റേൺ തന്നെ പിന്തുടരാൻ സുരക്ഷിതബോധം അവരെ പ്രേരിപ്പിക്കുന്നുവെന്നാണ് പഠനങ്ങൾ പറയുന്നത്.
2026-ലെ ഡേറ്റിംഗ് സംസ്കാരത്തിൽ ഗോസ്റ്റിംഗ് , ബ്രെഡ്ക്രംബിംഗ് എന്നിവ പോലെ തന്നെ ഗൗരവകരമായി കാണേണ്ട ഒന്നാണ് 'ഗ്രൗണ്ട്ഹോഗിംഗ്'. ഒരേ പടുകുഴിയിൽ വീണ്ടും വീണ്ടും വീഴാതിരിക്കാൻ സ്വന്തം മുൻഗണനകളെ പുനർചിന്തിക്കേണ്ടത് അത്യാവശ്യമാണെന്നാണ് വിദഗ്ധർ നൽകുന്ന മുന്നറിയിപ്പ്. സ്നേഹബന്ധങ്ങളിൽ പുതിയ അനുഭവങ്ങളും വ്യത്യസ്തമായ വ്യക്തിത്വങ്ങളും പരീക്ഷിക്കാൻ തയ്യാറായാൽ മാത്രമേ ആരോഗ്യകരമായ ഒരു ബന്ധം കെട്ടിപ്പടുക്കാൻ സാധിക്കൂ.
