ചൈനയിൽ റോബോട്ടുകൾ തന്നെ മറ്റ് വ്യാവസായിക ഹ്യൂമനോയിഡ് റോബോട്ടുകളെ നിർമിക്കുന്ന പുതിയ ഫാക്ടറി ഉബിടെക് റോബോട്ടിക്സ് ആരംഭിച്ചു. പ്രതിവർഷം 10,000 റോബോട്ടുകളെ നിർമിക്കാൻ ശേഷിയുള്ള ഇവിടെ 'സ്മാർട്ട് ബ്രെയിൻ' സംവിധാനമാണ് പ്രവർത്തനങ്ങൾ നിയന്ത്രിക്കുന്നത്. ചൈനയുടെ റോബോട്ടിക്സ് വ്യവസായത്തിലെ വൻ കുതിച്ചുചാട്ടമാണ് ഈ അത്യാധുനിക നിർമാണകേന്ദ്രം വ്യക്തമാക്കുന്നത്.
റോബോട്ടുകൾ മറ്റ് റോബോട്ടുകളെ നിർമിക്കുന്ന കാലം എത്തിയിരിക്കുകയാണ്. സയൻസ് ഫിക്ഷൻ സിനിമകളിലെ രംഗമെന്ന് തോന്നുമെങ്കിലും സംഭവം യാഥാർഥ്യമാണ്. ചൈനയിൽ വ്യാവസായിക ഹ്യൂമനോയിഡ് റോബോട്ടുകളുടെ വൻതോതിലുള്ള നിർമാണത്തിനായി പുതിയ ഫാക്ടറി പ്രവർത്തനം ആരംഭിച്ചു. ഉബിടെക് റോബോട്ടിക്സാണ് ലിയുഷൗവിൽ പുതിയ നിർമാണകേന്ദ്രം തുറന്നത്. ഗ്വാങ്സി ഷുവാങ് സ്വയംഭരണ മേഖലയിലാണ് ഫാക്ടറി സ്ഥിതി ചെയ്യുന്നത്. നിർമാണപ്രക്രിയയുടെ വിവിധ ഘട്ടങ്ങളിൽ റോബോട്ടുകളെ തന്നെ ഉപയോഗിക്കുന്നതാണ് ഈ ഫാക്ടറിയുടെ പ്രധാന പ്രത്യേകത. ഓരോ 10 മിനിറ്റിലും ഒരു വ്യാവസായിക ഹ്യൂമനോയിഡ് റോബോട്ട് നിർമിക്കാൻ ഇവിടെ സാധിക്കും.
വർഷം 10,000 റോബോട്ടുകൾ
കമ്പനി പുറത്തുവിട്ട വിവരങ്ങൾ പ്രകാരം പുതിയ ഫാക്ടറിക്ക് പ്രതിവർഷം 10,000 റോബോട്ടുകൾ നിർമിക്കാനുള്ള ശേഷിയുണ്ട്. 14,000 ചതുരശ്രമീറ്റർ വിസ്തൃതിയുള്ള കെട്ടിടത്തിന് 13.8 മീറ്റർ ഉയരമുണ്ട്. ഉബിടെക്കിന്റെ വാക്കർ എസ്, ക്രൂസർ ശ്രേണിയിലുള്ള വ്യാവസായിക ഹ്യൂമനോയിഡ് റോബോട്ടുകളാണ് പ്രധാനമായും ഇവിടെ നിർമിക്കുന്നത്. ഉബിടെക്കും സീമെൻസ് ഡിജിറ്റൽ ഇൻഡസ്ട്രീസ് സോഫ്റ്റ്വെയറും ചേർന്നാണ് ഫാക്ടറി ഒരുക്കിയത്.
നിയന്ത്രിക്കുന്നത് 'സ്മാർട്ട് ബ്രെയിൻ'
'സ്മാർട്ട് ബ്രെയിൻ' എന്ന് ഉബിടെക് വിശേഷിപ്പിക്കുന്ന ഡിജിറ്റൽ സംവിധാനം വഴിയാണ് ഫാക്ടറിയുടെ പ്രവർത്തനങ്ങൾ നിയന്ത്രിക്കുന്നത്. എന്താണ് നിർമിക്കേണ്ടത്, ആവശ്യമായ ഭാഗങ്ങൾ എവിടേക്ക് മാറ്റണം, നിർമിച്ച റോബോട്ടുകളുടെ ഗുണനിലവാരം എങ്ങനെ പരിശോധിക്കണം തുടങ്ങിയ കാര്യങ്ങൾ ഈ സംവിധാനം നിയന്ത്രിക്കുന്നു. നിർമിക്കുന്ന ഓരോ റോബോട്ടിനും പ്രത്യേക സീരിയൽ നമ്പറും നൽകുന്നുണ്ട്. ഇതുവഴി നിർമാണത്തിന്റെ ഓരോ ഘട്ടത്തിലും റോബോട്ടിന്റെ വിവരങ്ങൾ പിന്തുടരാൻ സാധിക്കും.
Related Articles
റോബോട്ടുകൾക്ക് എന്താണ് ജോലി?
ക്രൂസർ വൈ1, ക്രൂസർ എസ്2 എന്നീ റോബോട്ടുകളാണ് ഫാക്ടറിയിലെ വിവിധ ജോലികളിൽ ഉപയോഗിക്കുന്നത്. നിർമാണത്തിനാവശ്യമായ വസ്തുക്കൾ ഇറക്കുക, അവ അടുക്കിവയ്ക്കുക, ഉൽപ്പാദന കേന്ദ്രത്തിലേക്ക് എത്തിക്കുക, വിവിധ ഭാഗങ്ങളിലേക്ക് മാറ്റുക തുടങ്ങിയ ജോലികൾ ഇവ ചെയ്യുന്നു. റോബോട്ടുകളെ നിർമിക്കാൻ ആവശ്യമായ ഘടകങ്ങൾ തയ്യാറാക്കുന്നതിലും റോബോട്ടുകൾക്ക് പങ്കാളിത്തമുണ്ട്. സഹകരണ റോബോട്ടിക് കൈകൾ, ഡ്രൈവറില്ലാത്ത ചരക്ക് വാഹനങ്ങൾ, വൈദ്യുത സഹായമുള്ള യന്ത്രങ്ങൾ, കറങ്ങുന്ന ജോലിമേശകൾ തുടങ്ങിയവയും അന്തിമ അസംബ്ലിയിൽ ഉപയോഗിക്കുന്നു. ഒരേ ഉൽപ്പാദന നിരയിൽ തന്നെ വ്യത്യസ്ത മോഡലുകളിലുള്ള റോബോട്ടുകൾ നിർമിക്കാൻ ഈ സംവിധാനത്തിലൂടെ സാധിക്കും. ഓരോ മോഡലിനും പ്രത്യേകം നിർമാണ സംവിധാനം ഒരുക്കേണ്ടതില്ല എന്നതാണ് ഇതിന്റെ നേട്ടം.
റോബോട്ടുകൾക്കും ആരോഗ്യ പരിശോധന
ഫാക്ടറിയിൽ നിർമിക്കുന്ന ഒരു ഹ്യൂമനോയിഡ് റോബോട്ടും പരിശോധനകൾ പൂർത്തിയാക്കാതെ പുറത്തേക്ക് പോകില്ല. ഓരോ റോബോട്ടിനും 4 മണിക്കൂറിലധികം നീളുന്ന സമഗ്ര യന്ത്ര പരിശോധന നടത്തുന്നു. ഇതിന് പിന്നാലെ 360 ഡിഗ്രി ദൃശ്യ പരിശോധനയും നടക്കും. റോബോട്ടിന്റെ പുറംഭാഗം എല്ലാ കോണുകളിൽനിന്നും പരിശോധിച്ചാണ് ഗുണനിലവാരം ഉറപ്പാക്കുന്നത്.
65 ചതുരശ്രമീറ്ററിൽ 112 റോബോട്ടുകൾ
നിർമാണം പൂർത്തിയായ ശേഷവും പ്രവർത്തനങ്ങൾ സ്വയം നിയന്ത്രിതമായി തുടരുന്നു. ഫാക്ടറിയിലെ യാന്ത്രിക സംഭരണകേന്ദ്രത്തിൽ വെറും 65 ചതുരശ്രമീറ്റർ സ്ഥലത്ത് 112 ഹ്യൂമനോയിഡ് റോബോട്ടുകളെ സൂക്ഷിക്കാൻ കഴിയുമെന്ന് ഉബിടെക് പറയുന്നു. സ്വയം നിയന്ത്രിത വാഹനങ്ങൾ, ഡ്രൈവറില്ലാത്ത ഫോർക്ക്ലിഫ്റ്റുകൾ, മറ്റ് ചരക്ക് നീക്ക സംവിധാനങ്ങൾ എന്നിവ ഉപയോഗിച്ചാണ് റോബോട്ടുകളെയും ഘടകങ്ങളെയും നിർമാണം, പരിശോധന, സംഭരണം എന്നിവയ്ക്കിടയിൽ മാറ്റുന്നത്.
റോബോട്ടിക്സിൽ മുന്നേറി ചൈന
ചൈന റോബോട്ടിക്സ് വ്യവസായം അതിവേഗം വികസിപ്പിക്കുകയും ഗവേഷണശാലകളിൽ നിന്നുള്ള സാങ്കേതികവിദ്യകളെ യഥാർഥ വ്യാവസായിക ഉപയോഗത്തിലേക്ക് മാറ്റുകയും ചെയ്യുന്ന ഘട്ടത്തിലാണ് പുതിയ ഫാക്ടറിയുടെ പ്രവർത്തനം ആരംഭിച്ചിരിക്കുന്നത്. ചൈനയുടെ നാഷണൽ ബ്യൂറോ ഓഫ് സ്റ്റാറ്റിസ്റ്റിക്സിന്റെ കണക്കുകൾ പ്രകാരം ജൂലൈയിൽ രാജ്യത്ത് 98,677 വ്യാവസായിക റോബോട്ടുകളാണ് നിർമിച്ചത്. മുൻവർഷത്തെ ജൂലൈയെ അപേക്ഷിച്ച് 30.2 ശതമാനമാണ് വർധന. വർഷത്തിലെ ആദ്യ 7 മാസങ്ങളിൽ ചൈനയിലെ വ്യാവസായിക റോബോട്ട് ഉൽപ്പാദനം 635,056 യൂണിറ്റിലെത്തി. മുൻവർഷത്തെ ഇതേ കാലയളവിനെ അപേക്ഷിച്ച് 28.5 ശതമാനം വർധനവാണ് രേഖപ്പെടുത്തിയത്.
