വ്യവസായമന്ത്രി പി. രാജീവ്, ഹൈബി ഈഡന് എംപി തുടങ്ങി നിരവധി പ്രമുഖര് പരിപാടിയില് പങ്കെടുക്കും.
കൊച്ചി: കൊരട്ടി ഇന്ഫോപാര്ക്ക് ആസ്ഥാനമായി പ്രവര്ത്തിക്കുന്ന ആഗോള ഡിജിറ്റല് പരിവര്ത്തന കമ്പനിയായ വെബ് ആന്ഡ് ക്രാഫ്റ്റ്സ് (WAC), സംഘടിപ്പിക്കുന്ന WAC ബിയോണ്ട് - ടെക്നോളജി ആന്ഡ് മാര്ക്കറ്റിംഗ് സമ്മിറ്റ് നാളെ ഉച്ചയ്ക്ക് 2 മണി മുതല് കൊച്ചി ഗ്രാന്ഡ് ഹയാത്തില് നടക്കും. WAC-യുടെ പതിമൂന്നാം വാര്ഷികത്തിന്റെ ഭാഗമായുള്ള സമ്മിറ്റ്, നൂതനാശയങ്ങള്ക്കും ബിസിനസ് പരിവര്ത്തനത്തിനുമുള്ള കേരളത്തിലെ ഏറ്റവും വലിയ പ്ലാറ്റ്ഫോമുകളിലൊന്നായി വിഭാവനം ചെയ്യപ്പെടുന്ന WAC ബിയോണ്ട് 2026-ന് മുന്നോടിയായാണ് സംഘടിപ്പിക്കുന്നത്. വ്യവസായമന്ത്രി പി. രാജീവ്, ഹൈബി ഈഡന് എംപി തുടങ്ങി നിരവധി പ്രമുഖര് പരിപാടിയില് പങ്കെടുക്കും.
നിര്മിതബുദ്ധി, ഓട്ടോമേഷന്, ക്ലൗഡ് സാങ്കേതികവിദ്യകള്, പുതുതലമുറ മാര്ക്കറ്റിംഗ് തന്ത്രങ്ങള് എന്നീ രംഗങ്ങളിലെ പരിവര്ത്തന സാധ്യതകള് കണ്ടെത്താനായി ബിസിനസ്സ് തലവന്മാര്, നയരൂപീകര്ത്താക്കള്, സംരംഭകര്, നൂതനാശയങ്ങളുള്ളവര് ഉള്പ്പെടെ 1,000-ത്തിലധികം പേര് സമ്മിറ്റില് പങ്കെടുക്കും. ഗൂഗിളുമായുള്ള കമ്പനിയുടെ പങ്കാളിത്തം പ്രഖ്യാപിക്കുന്ന ഗൂഗിള് സ്പോട്ട്ലൈറ്റ് സെഷന് പുറമേ പ്രമുഖര് നയിക്കുന്ന സെഷനുകളും സമ്മിറ്റിന്റെ ഭാഗമായി നടക്കും.
രാജ്യത്തെ പ്രമുഖ സുഗന്ധവ്യഞ്ജന കയറ്റുമതി സ്ഥാപനമായ സിന്തൈറ്റ് ഇന്ഡസ്ട്രീസ് പ്രൈവറ്റ് ലിമിറ്റഡിന്റെയും ജെയിന് സര്വകലാശാലയുടെയും ഔദ്യോഗിക വെബ്സൈറ്റുകളുടെ പ്രകാശനവും ചടങ്ങില് നടക്കും. 2012-ല് കൊരട്ടി ഇന്ഫോപാര്ക്കില് സ്ഥാപിതമായ വെബ് ആന്ഡ് ക്രാഫ്റ്റ്സ്, ഒരു സിംഗിള് കമ്പ്യൂട്ടര് സ്റ്റാര്ട്ടപ്പില് നിന്ന് ലോകമെമ്പാടുമുള്ള 500-ലധികം ക്ലയന്റുകളുടെ വിശ്വസ്ത പങ്കാളിയായി വളര്ന്നുകഴിഞ്ഞിട്ടുണ്ട്. വെബ്, മൊബൈല് ആപ്പ് വികസനം, ഇ-കൊമേഴ്സ് സൊല്യൂഷനുകള്, എഐ-പവര്ഡ് പ്ലാറ്റ്ഫോമുകള്, ബ്രാന്ഡിംഗ്, ക്ലൗഡ് ഇന്റഗ്രേഷന്, ഡിജിറ്റല് മാര്ക്കറ്റിംഗ് എന്നീ മേഖലകളില് വൈദഗ്ദ്ധ്യമുള്ള കമ്പനി ഇതിനോടകം റീട്ടെയില്, നിര്മ്മാണം, ധനകാര്യം, ആരോഗ്യ സംരക്ഷണം, ഹോസ്പിറ്റാലിറ്റി തുടങ്ങിയ രംഗങ്ങളില് 1,500-ലധികം പ്രോജക്ടുകള്ക്ക് സേവനം ലഭ്യമാക്കിയിട്ടുണ്ട്.
മികച്ചയാളുകള്, മൂല്യങ്ങള്, ദര്ശനം എന്നിവയിലൂടെ ഏറ്റവും ചെറിയ തുടക്കങ്ങള് പോലും ഏറ്റവും വലിയ സ്വാധീനം സൃഷ്ടിക്കുമെന്ന് തെളിയിക്കുന്നതാണ് WAC-യുടെ യാത്രയെന്ന് കമ്പനി മാനേജിംഗ് ഡയറക്ടറും സ്ഥാപകനുമായ എബിന് ജോസ് ടോം പറഞ്ഞു. സാങ്കേതികവിദ്യ, ആളുകള്, പങ്കാളിത്തം, സാധ്യതകള് എന്നിവയുടെ ആഘോഷമായിരിക്കും ഈ സമ്മിറ്റെന്നും അദ്ദേഹം കൂട്ടിച്ചേര്ത്തു.
പതിമൂന്നാം വാര്ഷികത്തിന്റെ ഭാഗമായി കമ്പനിയില് ദീര്ഘകാലമായി മികച്ച സേവനം നല്കിവരുന്ന മാര്ക്കറ്റിംഗ് ഹെഡ് ശ്രീവേദ് എംപി; പിഎച്ച്പി വിഭാഗം ഹെഡ് മിഥുന് രാജ് കെ ആര്; WAC-യുടെ അന്താരാഷ്ട്ര ബിസിനസ്സ് വളര്ച്ചയ്ക്ക് നേതൃത്വം നല്കുന്ന ഗ്ലോബല് സെയില്സ് ഹെഡ് അനൂപ് കെ ജോസഫ് എന്നിവരെ പുതിയ മഹീന്ദ്ര എക്സ് ഇ വി 9ഇ കാറുകള് നല്കി ചടങ്ങില് ആദരിക്കും. കമ്പനിയിലെ ജീവനക്കാരാണ് WAC-യുടെ ഏറ്റവും വലിയ കരുത്തെന്ന് സിഇഒ ജിലു ജോസഫ് പറഞ്ഞു. പതിമൂന്നാം വാര്ഷികം ആഘോഷിക്കുകയെന്നത് ഒരു കമ്പനി എന്ന നിലയിലുള്ള വളര്ച്ചയ്ക്ക് പുറമേ അവരെ ആദരിക്കുകയെന്നത് കൂടിയാണെന്നും അവര് പറഞ്ഞു.
സംഗീതജ്ഞന് അല്ഫോണ്സ് ജോസഫ് പങ്കെടുക്കുന്ന മദ്രാസ് മെയില് ബാന്ഡിന്റെ സംഗീത പരിപാടിയും അത്താഴവിരുന്നോടും കൂടി സമ്മിറ്റ് സമാപിക്കും. സമ്മിറ്റിലേക്കുള്ള പ്രവേശനം സൗജന്യമാണ്, എന്നാല് https://webandcrafts.com/13th-anniversary എന്ന വെബ്സൈറ്റില് മുന്കൂട്ടി രജിസ്റ്റര് ചെയ്യേണ്ടതുണ്ട്.
