ലഡാക്കിൽ നിന്ന് ഏകദേശം ഒരു മണിക്കൂര് സഞ്ചരിച്ചാൽ മാഗ്നറ്റിക് ഹില്ലിലെത്താം.
ലഡാക്ക്: ഭൂമിയിലെ സ്വര്ഗമെന്ന വിശേഷണമുള്ള ജമ്മു കശ്മീരിലേയ്ക്കുള്ള യാത്രയിൽ ഒരിക്കലും മിസ്സാക്കാൻ പാടില്ലാത്ത നിരവധി സ്ഥലങ്ങളുണ്ട്. അവയിലൊന്നാണ് ലഡാക്കിന് സമീപമുള്ള മാഗ്നറ്റിക് ഹിൽ. ഗുരുത്വാകർഷണ ബലത്തെ വെല്ലുവിളിക്കുന്ന സ്ഥലമാണെന്നതാണ് മാഗ്നറ്റിക് ഹില്ലിന്റെ സവിശേഷത.
14,000 അടി ഉയരത്തിലാണ് നിഗൂഢമായ മാഗ്നറ്റിക് ഹിൽ സ്ഥിതി ചെയ്യുന്നത്. ഇവിടെയുള്ള കുന്നിന് സമീപം വാഹനം ന്യൂട്രൽ ഗിയറിൽ പാർക്ക് ചെയ്താൽ ഗുരുത്വാകർഷണബലത്തിനെതിരെ വാഹനം യാന്ത്രികമായി മുകളിലേക്ക് നീങ്ങുന്നത് കാണാം. ഈ സവിശേഷ പ്രതിഭാസം നേരിട്ട് ആസ്വദിക്കാനായി നിരവധിയാളുകളാണ് മാഗ്നറ്റിക് ഹില്ലിലേയ്ക്ക് എത്തുന്നത്. മാഗ്നറ്റിക് ഹിൽ സ്വർഗ്ഗത്തിലേക്കുള്ള പടവാണെന്നാണ് ഇവിടെയുള്ളവരുടെ വിശ്വാസം.
മനോഹരമായ ചിത്രങ്ങൾ പകർത്താനും വിശ്രമിക്കാനുമെല്ലാം അനുയോജ്യമായ സ്പോട്ടാണ് മാഗ്നറ്റിക് ഹിൽ. മാഗ്നറ്റിക് ഹില്ലിന് ചുറ്റുമുള്ള പ്രകൃതിദൃശ്യങ്ങളുടെ ഭംഗി പറഞ്ഞറിയിക്കാൻ കഴിയില്ല. കിഴക്ക് സിന്ധു നദിയുടെ മനോഹരമായ കാഴ്ച, നിരവധി മഞ്ഞുമൂടിയ പർവതനിരകൾ, നഗര തിരക്കുകളില്ലാതെ നീണ്ടുകിടക്കുന്ന ഭൂമി തുടങ്ങിയ പ്രകൃതി അത്ഭുതങ്ങളാൽ നിറഞ്ഞിരിക്കുന്ന ഇടമാണിത്.
Related Articles
മെയ് മുതൽ സെപ്റ്റംബർ വരെയുള്ള മാസങ്ങളാണ് മാഗ്നറ്റിക് ഹിൽ സന്ദർശിക്കാൻ ഏറ്റവും അനുയോജ്യമായ സമയം. വേനൽക്കാലത്തിന്റെ അവസാന മാസങ്ങളിലാണ് മാഗ്നറ്റിക് ഹിൽ സന്ദർശിക്കേണ്ടത്. ഈ സമയം തെളിഞ്ഞ കാലാവസ്ഥയാണ് മാഗ്നറ്റിക് ഹില്ലിലുണ്ടാകുക. താപനിലയും സുഖകരമായിരിക്കും. ആളുകളുടെ തിരക്കുകളില്ലാതെ മാഗ്നറ്റിക് ഹിൽ സന്ദർശിക്കണമെങ്കിൽ അതിരാവിലെ ഇവിടേയ്ക്ക് എത്തുന്നതാണ് നല്ലത്. സൂര്യൻ ഉദിച്ചതിന് ശേഷം ഇവിടെ പൊതുവേ അൽപ്പം തിരക്ക് അനുഭവപ്പെടാറുണ്ട്.
