മകന്റെ പത്താം ക്ലാസ് ബോർഡ് പരീക്ഷയിലെ തോൽവി ആഘോഷിക്കാൻ പാര്ട്ടി നടത്തി മാതാപിതാക്കൾ
സാധാരണയായി കുട്ടികളുടെ പരീക്ഷാ വിജയങ്ങളിലാണ് രക്ഷിതാക്കൾ സന്തോഷിക്കുകയും ആഘോഷിക്കുകയും ചെയ്യാറുള്ളത്. എന്നാല്, കർണാടകയിലെ ഒരു ദമ്പതികൾ വ്യത്യസ്തമായ ഒരു വഴി തിരഞ്ഞെടുത്തിരിക്കുകയാണ്. മകന്റെ പത്താം ക്ലാസ് ബോർഡ് പരീക്ഷയിലെ തോൽവി ആഘോഷിക്കാൻ മാതാപിതാക്കൾ ഒരു പാർട്ടി തന്നെ സംഘടിപ്പിച്ചു. വിജയത്തിനായുള്ള മകന്റെ ആത്മാർത്ഥമായ ശ്രമങ്ങളെ അംഗീകരിക്കുന്നതിനായിരുന്നു ഇത്.
കർണാടകയിലെ ബാഗൽകോട്ടിലെ ഒരു സ്വകാര്യ സ്കൂളിലെ വിദ്യാർത്ഥിയായ അഭിഷേക് സംസ്ഥാന ബോർഡ് പരീക്ഷയിൽ 625 ൽ 200 മാർക്ക് മാത്രം നേടി എല്ലാ വിഷയങ്ങളിലും പരാജയപ്പെട്ടു. എന്നാൽ അഭിഷേകിന്റെ മാതാപിതാക്കൾ കുട്ടിയെ വഴക്കുപറയുന്നതിനുപകരം മനോവീര്യം ഉയർത്താനാണ് തീരുമാനിച്ചത്.
മകനെ സന്തോഷിപ്പിക്കാനും അടുത്ത ശ്രമത്തിൽ മികച്ച പ്രകടനം നടത്താൻ പ്രോത്സാഹിപ്പിക്കാനും കേക്കും മധുരപലഹാരങ്ങളും ഓർഡർ ചെയ്തു. പരീക്ഷയില് പരാജയപ്പെട്ടെങ്കിലും അഭിഷേക് ആത്മാർത്ഥമായി പഠിക്കുകയും പരീക്ഷയെ ഗൗരവമായി സമീപിക്കുകയും ചെയ്തിരുന്നുവെന്ന് പിതാവ് പറഞ്ഞു. ഈ ആഘോഷം അഭിഷേകിന്റെ നിരാശയെ മറികടക്കാൻ സഹായിച്ചുവെന്ന് കുടുംബം കൂട്ടിച്ചേർത്തു. അടുത്ത ശ്രമത്തിൽ താൻ എല്ലാ വിഷയങ്ങളിലും വിജയിക്കുമെന്ന് ദൃഢനിശ്ചയത്തോടെ അഭിഷേക് പറഞ്ഞു.
