ഇംഗ്ലണ്ട് വനിതകള്ക്കെതിരായ രണ്ടാം ഏകദിനത്തില് ഇന്ത്യക്ക് ബാറ്റിംഗ് തകര്ച്ച. ലോര്ഡ്സില് മഴയെ തുടര്ന്ന് 29 ഓവറാക്കിയ മത്സരത്തില് അഞ്ച് വിക്കറ്റുകള് നഷ്ടമായി.
ലണ്ടന്: ഇംഗ്ലണ്ട് വനിതകള്ക്കെതിരായ രണ്ടാം ഏകദിനത്തില് ഇന്ത്യക്ക് ബാറ്റിംഗ് തകര്ച്ച. ലോര്ഡ്സില് മഴയെ തുടര്ന്ന് 29 ഓവറാക്കിയ മത്സരത്തില് ടോസ് നഷ്ടപ്പെട്ട് ബാറ്റിംഗിനെത്തിയ ഇന്ത്യ ഒടുവില് വിവരം ലഭിക്കുമ്പോള് 16 ഓവറില് അഞ്ചിന് 72 എന്ന നിലയിലാണ്. സ്മൃതി മന്ദാന (28), ദീപ്തി ശര്മ (0) എന്നിവരാണ് ക്രീസില്. പ്രതിക റാവല് (3), ഹര്ലീന് ഡിയോള് (16), ഹര്മന്പ്രീത് കൗര് (7), ജമീമ റോഡ്രിഗസ് (3), റിച്ച ഘോഷ് (2) എന്നിവരുടെ വിക്കറ്റുകളാണ് ഇന്ത്യക്ക് നഷ്ടമായത്. സോഫി എക്ലെസ്റ്റോണ് മൂന്ന് വിക്കറ്റ് വീഴ്ത്തി.
രണ്ടാം ഓവറില് തന്നെ ഇന്ത്യക്ക് ആദ്യ വിക്കറ്റ് നഷ്ടമായി. പ്രതികയെ എം ആര്ലോട്ട് ബൗള്ഡാക്കി. തുടര്ന്ന് മൂന്നാം വിക്കറ്റില് സ്മൃതി - ഹര്ലീന് സഖ്യം 40 റണ്സ് കൂട്ടിചേര്ത്തു. ഇരുവരും മികച്ച കൂട്ടുകെട്ടുണ്ടാക്കി ഇന്ത്യയെ രക്ഷപ്പെടുത്തുമെന്ന് തോന്നിച്ചെങ്കിലും എക്ലെസ്റ്റോണിന്റെ പന്തില് ഹര്ലീന് പുറത്തായി. പിന്നാലെ എത്തിയ ക്യാപ്റ്റന് ഹര്മന്പ്രീതിന് ഒമ്പത് പന്ത് മാത്രമായിരുന്നു ആയുസ്. ഹര്മന് എക്ലെസ്റ്റോണിന്റെ പന്തില് ബൗള്ഡാവുകയായിരുന്നു. തുടര്ന്ന് ക്രീസിലെത്തിയ ജെമീമയെ, ചാര്ലി ഡീന് സ്വന്തം പന്തില് ക്യാച്ചെടുത്ത് പുറത്താക്കി. റിച്ച ആവട്ടെ എക്ലെസ്റ്റോണിന്റെ പന്തില് വിക്കറ്റിന് മുന്നില് കുടുങ്ങുകയും ചെയ്തു.
നേരത്തെ, ആദ്യ ഏകദിനം കളിച്ച ടീമില് നിന്ന് ഒരു മാറ്റവുമായിട്ടാണ് ഇന്ത്യ ഇറങ്ങിയത്. അമന്ജോത് കൗറിന് പകരം അരുന്ധതി റെഡ്ഡി ടീമിലെത്തി. മൂന്ന് മത്സരങ്ങളുടെ പരമ്പരില് ഇന്ത്യ 1-0ത്തിന് മുന്നിലാണ്. ഏകദിനത്തില് നാല് വിക്കറ്റിന് ഇന്ത്യ ജയിച്ചിരുന്നു. ഇരു ടീമുകളുടേയും പ്ലേയിംഗ് ഇലവന് അറിയാം.
ഇംഗ്ലണ്ട്: ടാമി ബ്യൂമോണ്ട്, ആമി ജോണ്സ് (വിക്കറ്റ് കീപ്പര്), എമ്മ ലാംബ്, നാറ്റ് സ്കൈവര്-ബ്രണ്ട് (ക്യാപ്റ്റന്), സോഫിയ ഡങ്ക്ലി, മയ്യ ബൗച്ചിയര്, എം ആര്ലോട്ട്, ഷാര്ലറ്റ് ഡീന്, സോഫി എക്ലെസ്റ്റോണ്, ലിന്സി സ്മിത്ത്, ലോറന് ബെല്.
ഇന്ത്യ: പ്രതിക റാവല്, സ്മൃതി മന്ദാന, ഹര്ലീന് ഡിയോള്, ഹര്മന്പ്രീത് കൗര് (ക്യാപ്റ്റന്), ജെമീമ റോഡ്രിഗസ്, റിച്ച ഘോഷ് (വിക്കറ്റ് കീപ്പര്), ദീപ്തി ശര്മ, അരുന്ധതി റെഡ്ഡി, സ്നേഹ റാണ, ശ്രീ ചരണി, ക്രാന്തി ഗൗത്.
