ഭേദപ്പെട്ട തുടക്കമായിരുന്നു കാലിക്കറ്റിന്. ഒന്നാം വിക്കറ്റില് സച്ചിന് സുരേഷ് (10) - രോഹന് സഖ്യം 36 റണ്സ് ചേര്ത്തു.
തിരുവനന്തപുരം: കേരള ക്രിക്കറ്റ് ലീഗില് ഉദ്ഘാടന മത്സരത്തില് കാലിക്കറ്റ് ഗ്ലോബ്സ്റ്റാര്സിനെതിരായ മത്സരത്തില് ഏരീസ് കൊല്ലം സെയ്ലേഴ്സിന് 139 റണ്സ് വിജയലക്ഷ്യം. കാര്യവട്ടം, ഗ്രീന്ഫീല്ഡ് സ്റ്റേഡിയത്തില് ടോസ് നഷ്ടപ്പെട്ട് ബാറ്റിംഗിനെത്തിയ കാലിക്കറ്റ് 18 ഓവറില് എല്ലാവരും പുറത്താവുകയായിരുന്നു. നാല് വിക്കറ്റ് വീഴ്ത്തിയ ഷറഫുദ്ദീന്, മൂന്ന് പേരെ പുറത്താക്കിയ അമല് എന്നിവരാണ് കാലിക്കറ്റിനെ തകര്ത്തത്. ക്യാപ്റ്റന് രോഹന് കുന്നുമ്മല് കാലിക്കറ്റിന് വേണ്ടി 54 റണ്സെടുത്തു.
ഭേദപ്പെട്ട തുടക്കമായിരുന്നു കാലിക്കറ്റിന്. ഒന്നാം വിക്കറ്റില് സച്ചിന് സുരേഷ് (10) - രോഹന് സഖ്യം 36 റണ്സ് ചേര്ത്തു. എന്നാല് സുരേഷിനെ പുറത്താക്കി ഷറഫുദ്ദീന്, സെയ്ലേഴ്സിന് ബ്രേക്ക് ത്രൂ നല്കി. പിന്നീടെത്തിയ അഖില് സ്കറിയക്ക് ഏഴ് റണ്സ് മാത്രമാണ് നേടാന് സാധിച്ചത്. എങ്കിലും ഒരറ്റത്ത് രോഹന് അടി തുടര്ന്നു. എന്നാല് ഒമ്പതാം ഓവറില് രോഹന് മടങ്ങിയതോടെ കാലിക്കറ്റിന്റെ തകര്ച്ചയും തുടങ്ങി. ബിജു നാരായണന് വിക്കറ്റ് നല്കി രോഹന് മടങ്ങുമ്പോള് മൂന്നിന് 76 എന്ന നിലയിലായിരുന്നു കാലിക്കറ്റ്.
തുടര്ന്ന് 62 റണ്സിനിടെ ശേഷിക്കുന്ന വിക്കറ്റുകളും കാലിക്കറ്റിന് നഷ്ടമായി. സല്മാന് നിസാര് (18 പന്തില് 21), മനു കൃഷ്ണന് (25) എന്നിവരാണ് രണ്ടക്കം കണ്ട മറ്റുതാരങ്ങള്. അജിനാസ് (3), പി അന്ഫല് (9), കൃഷ്ണ ദേവന് (2), ഹരികൃഷ്ണന് (1), എസ് മിഥുന് (1) എന്നിവരാണ് പുറത്തായ മറ്റുതാരങ്ങള്. അഖില് ദേവ് (2) പുറത്താവാതെ നിന്നു. മറുപടി ബാറ്റിംഗ് ആരംഭിച്ച സെയ്ലേഴ്സ് ഏഴ് ഓവര് പിന്നിടുമ്പോള് രണ്ടിന് 45 എന്ന നിലയിലാണ്. വിഷ്ണു വിനോദ് (0), സച്ചിന് ബേബി (24) എന്നിവര് പുറത്തായി. അഭിഷേക് നായര് (20), വത്സല് ഗോവിന്ദ് (1) എന്നിവരാണ് ക്രീസില്.
കൊല്ലം സെയ്ലേഴ്സ്: സച്ചിന് ബേബി (ക്യാപ്റ്റന്), വിഷ്ണു വിനോദ് (വിക്കറ്റ് കീപ്പര്), അഭിഷേക് നായര്, വത്സല് ഗോവിന്ദ്, എം സജീവന് അഖില്, ഷറഫുദ്ദീന്, രാഹുല് ശര്മ്മ, അമല് എജി, ഈഡന് ആപ്പിള് ടോം, ബിജു നാരായണന്, പവന് രാജ്.
കാലിക്കറ്റ് ഗ്ലോബ്സ്റ്റാര്സ്: രോഹന് കുന്നുമ്മല് (ക്യാപ്റ്റന്), സുരേഷ് സച്ചിന് (വിക്കറ്റ് കീപ്പര്), അജിനാസ്, സല്മാന് നിസാര്, പള്ളം മുഹമ്മദ് അന്ഫല്, സുധേശന് മിഥുന്, അഖില് സ്കറിയ, ഹരികൃഷ്ണന്, മനു കൃഷ്ണന്, അഖില് ദേവ്, ഇബ്നുല് അഫ്താബ്.
